បុរស វៀតណាម សង់ប្រាសាទ​​មាស​តម្លៃជិត ៣ លាន​ដុល្លារ​ ពីលុយសន្សំមុខរបរអេតចាយ

នៅលើផ្លូវជាតិមួយក្នុងខេត្ត Nghe An វិមានដ៏ស្រស់បំព្រងដែលបិទបន្ទះមាស 24k ត្រូវបានសាងសង់ឡើងក្នុងតំលៃ ៧០ ពាន់លានដុង លើផ្ទៃដី ៧,០០០ ម៉ែត្រការ៉េ ។​ ផ្ទះ​នេះ​ជា​កម្មសិទ្ធិ​របស់​បុរសម្នាក់ឈ្មោះ Nguyen Vinh Thoan អាយុ ៤៦ ឆ្នាំ នៅ​ឃុំ My Thanh ស្រុក Yen Thanh នៃ​ខេត្ត​ភាគ​ខាងជើងប្រទេសវៀតណាម។

តាមរយៈការចុះផ្សាយពីសារព័ត៌មាន vnexpress កាលពីថ្ងៃទី២៥ ខែកុម្ភៈ បានបញ្ចាក់តាមរបាយការណ៍ថា ការសាងសង់បានចាប់ផ្តើមចាប់តាំងពីខែកុម្ភៈ ឆ្នាំ ២០២២ ជាមួយនឹងការចំណាយសរុបប្រហែល ៧០ ពាន់លានដុង (២.៨៥ លានដុល្លារអាមេរិក) ខណៈពេលដែលឥឡូវនេះវាជិតរួចរាល់ជាស្ថាពរហើយ។

បុរសដែលសាងសង់ប្រាសាទបាន​និយាយ​ថា គាត់​បាន​រៀបការ​នៅ​អាយុ ២២ ឆ្នាំ ហើយ​គ្រួសារ​របស់​គាត់​ធ្លាប់​ប្រកប​របរ​លក់​អេតចាយពីមុន។ នៅ​ឆ្នាំ​២០០៤ គាត់​បាន​ចាប់​ផ្តើម​ទិញ​ដី​នៅ​ជាប់​ផ្លូវជាតិ​លេខ ៧A ដើម្បី​បើក​អាជីវកម្ម​លក់​គ្រឿងបន្លាស់​រថយន្ត។ បន្តិច​ម្ដងៗ គាត់​បាន​ចម្រើន​ឡើងសឹងមិនគួរឲ្យជឿ។

គាត់បានចែករំលែកថា “ជាច្រើនឆ្នាំមកនេះ ខ្ញុំ និងភរិយាបានពិភាក្សាគ្នាអំពីការលះបង់បេះដូង និងថវិការបស់យើងចំពោះអគារនេះ (ប្រាសាទ) ក្នុងគោលបំណងបង្កើតកន្លែងរស់នៅប្រកបដោយផាសុកភាព និងជាមូលដ្ឋានគ្រឹះដ៏រឹងមាំសម្រាប់កូនៗរបស់យើងនៅពេលពួកគេធំឡើង”។ ប្ដី​ប្រពន្ធ​មួយ​គូ​នេះ​​មាន​កូន​ប្រុស​ស្រី​ពីរ​នាក់ ​ដែល​សុទ្ធ​តែ​ធ្វើ​ការ​នៅ​ទីក្រុង​ហាណូយ។

លោក Thoan បាននិយាយថា ចម្លាក់ និងលំនាំតុបតែងនៅលើជញ្ជាំង សុទ្ធសឹងជាស្នាដៃរបស់សិប្បករជំនាញមកពីតំបន់ផ្សេងៗគ្នាទូទាំងប្រទេសវៀតណាម។ តាមរយៈរូបភាពដែលបានបង្ហាញ ជាន់ទី៣ របស់អគាររួមបញ្ចូលគ្នាសម្រាប់ផ្ទៃដីសរុប ៤,០០០ ម៉ែត្រការេ។ ផ្នែក​ខាង​ក្រៅ​នៃ​ប្រាសាទ​ត្រូវ​បាន​តុបតែង​ដោយ​ចម្លាក់​ស្រាល និង​លំនាំ​ដែល​មាន​រចនាបថធំៗ។ សាលធំត្រូវបានស្រោបដោយស្រទាប់ស្ពាន់ស្តើង ហើយកន្លែងជំនួយខ្លះនៅខាងក្រោយត្រូវបានលាបពណ៌មាសសុទ្ធសាធ។ ចំណែកបន្ទប់ទទួលភ្ញៀវនៅជាន់ទី១ គឺជាជញ្ជាំងមាស និងគ្រឿងសង្ហារឹមធ្វើពីឈើទាំងអស់។​ ក្រៅពីជណ្តើរ ជាន់ទី ២ និងទី ៣ នឹងអាចចូលទៅដល់បានដោយជណ្តើរយន្ត ដែលបច្ចុប្បន្នកំពុងត្រូវបានដំឡើង ហើយចំណុចកណ្តាលនៃអគារនេះ មានរចនាបថបែបអឺរ៉ុបទាំងអស់។

បុរសផ្ដើមពីអ្នកដើរទិញ-លក់អេតចាយនៅប្រទេសវៀតណាមរូបនេះបាននិយាយថា គោលបំណងនៃការសង់ប្រសាទដ៏ធំសម្បើម គឺសម្រាប់សម្រាកបន្ទាប់ពីធ្វើការដ៏តានតឹង។ គ្រប់ជាន់ទាំងអស់មានបន្ទប់គេង និងបន្ទប់ទទួលភ្ញៀវ ដែលមានច្រកចូល និងច្រកចេញធំទូលាយ។ គ្រឿងបរិក្ខារថ្លៃៗជាច្រើនតុបតែងលម្អខាងក្នុងប្រាសាទ រួមទាំងនាឡិកាធ្វើពីមាសទំហំ ២ ម៉ែត្រ 24k នៅជិតច្រកចូលនៅជាន់ទីមួយ។ ជាពិសេសទៀតនោះ នៅជាន់ដដែលក៏មានបន្ទប់ទឹកត្រូវបានស្រោបដោយមាសឧស្សាហកម្ម និងមាស 24k ផងដែរ។

យ៉ាងណាមិញ​ ការសាងសង់ប្រាសាទមាសនេះឡើងមកបានបង្កការភ្ញាក់ផ្អើលដល់មហាជនជាច្រើន ដែលបានធ្វើដំណើរឆ្លងកាត់តាមផ្លូវ​ ងាកមើលព្រោងព្រាត ព្រងទាំងឈប់ថតរូបហើយស្ងើចពីទឹកដីនៃការសង់រចនាបទបែបនេះឡើងមក។ ជាពិសេសនៅលើបណ្ដាញអ៉ិនធើណេតវៀតណាម ក្រោយបានដឹងថាលោកផ្ទាល់ផ្ដើមពីអ្នករើសអេតចាយតែមានលុយសាងសង់វិមានប្រណិត ម្នាក់ៗសុទ្ធតែបញ្ចេញមតិដូចៗគ្នាលោកមិនមែនជាមនុស្សធម្មតាទេ។ សូម្បីតែ មន្ត្រី​ឃុំ My Thanh បានចាត់​ទុក​ប្រាសាទរបស់លោកថាជា​ប្រាសាទ​ធំ​បំផុត និង​គួរ​ឲ្យ​ចាប់​អារម្មណ៍​បំផុត​ក្នុង​ឃុំនេះដែរ៕

អត្ថបទ៖ សាង ស្រីល័ក្ខ

ចុចអាន៖​កូនក្រមុំចិនម្នាក់ត្រូវគេស្ងើចសរសើរ ក្រោយផ្លាស់ប្ដូរជីវិតពីកម្មកររោងចក្រ​ ក្លាយជា​សេដ្ឋីនី