លោក សេដ្ឋា បញ្ជាឲ្យចាត់តាំងមន្ត្រីជាបន្ទាន់ មកសហការជាមួយកម្ពុជា ដើម្បីប្រយុទ្ធនឹងភ្លើងឆេះព្រៃ

នាយករដ្ឋមន្រ្តីថៃ លោក សេដ្ឋា ថាវីស៊ីន បានចេញបញ្ជាឲ្យក្រសួងធនធានធម្មជាតិនិងបរិស្ថាន ពន្លឿនការចាត់តាំងមន្ត្រី មកសហការជាមួយភាគីកម្ពុជា ក្នុងគណៈកម្មការចម្រុះ ដើម្បីប្រយុទ្ធប្រឆាំងនឹងភ្លើងឆេះព្រៃឆ្លងដែន។ នេះបើតាមការចុះផ្សាយរបស់ The Nation នៅថ្ងៃអង្គារទី២៧ខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់អ្នកសារព័ត៌មានបន្ទាប់ពីកិច្ចប្រជុំគណៈរដ្ឋមន្ត្រីប្រចាំសប្តាហ៍ លោក សេដ្ឋា លើកឡើងថា ចំណុចក្តៅជាច្រើន ត្រូវបានរកឃើញនៅខាងភាគីកម្ពុជា ហើយក្រសួងការបរទេសថៃ ក៏បានរាយការណ៍អំពីអគ្គិភ័យទាំងនេះ មកកាន់រាជរដ្ឋាភិបាលកម្ពុជារួចហើយដែរ។

តាមការបញ្ជាក់ពីលោក សេដ្ឋា, ក្រសួងការបរទេសថៃ បានបញ្ជូនក្រុមមកជួបពិភាក្សាជាមួយកម្ពុជារួចទៅហើយ ដើម្បីបង្កើតមជ្ឈមណ្ឌលប្រយុទ្ធនឹងភ្លើងឆេះព្រៃរួមគ្នា។ ការ​បង្កើត​មជ្ឈមណ្ឌល​នេះ​ ​នឹង​អនុញ្ញាតឲ្យ​ប្រទេស​ទាំង​ពីរ សហការគ្នា​ជា​ផ្លូវការ​ក្នុង​ការ​គ្រប់គ្រង​អគ្គិភ័យ​។

បច្ចុប្បន្ន ខេត្តមួយចំនួនក្នុងប្រទេសថៃ កំពុងរងគ្រោះដោយភ្លើងឆេះព្រៃ តួយ៉ាងគឺខេត្តឈៀងម៉ៃ ដែលស្រុកចំនួន៣នៃខេត្តនេះ កំពុងជួបប្រទះអគ្គិភ័យក្នុងផ្ទៃដីទំហំ៤៨០០ហិកតា។

ស្រុក Hot, Chomg Thong និង Mae Cham គឺជា​តំបន់​រង​ផល​ប៉ះពាល់​ខ្លាំង​បំផុត ដោយ​ភ្លើង​នៅ​តែបន្ត​ឆាបឆេះ និង​មិន​អាច​ទប់ស្កាត់​បាន​។ ពេល​យប់ គេឃើញភ្លើងឆាបឆេះក្រហមពេញមេឃ ហើយពេលថ្ងៃ ផ្សែងយ៉ាងក្រាស់ បានគ្របដណ្តប់តំបន់នោះសឹងទាំងស្រុង។

លោក Thossapol Puan-udom អភិបាលរងខេត្តឈៀងម៉ៃ បានប្រាប់អ្នកសារព័ត៌មានថា កិច្ចខិតខំប្រឹងប្រែងពន្លត់ភ្លើង កំពុងជួបការលំបាកដោយសារតែទីនោះជាតំបន់ភ្នំខ្ពស់ៗ និងអាកាសធាតុស្ងួតនិងក្តៅខ្លាំង។

ទោះបីជាយ៉ាងណាក៏ដោយ បច្ចុប្បន្ន អាជ្ញាធរកំពុងព្យាយាមរកឲ្យឃើញនូវមូលហេតុ នៃភ្លើងឆេះព្រៃទាំងនេះ៕

អត្ថបទ៖ សុខ សុវណ្ណ

ចុចអាន៖ នាយករដ្ឋមន្ត្រីថៃ ថា ការដោះលែងលោក ថាក់ស៊ីន គឺស្របច្បាប់