ព័ត៌មានអន្ដរជាតិ

តាក់ស៊ីរ៉ូបូតនៅ ចិន ទទួលភ្លើងខៀវដឹកអ្នកដំណើរទៅព្រលានយន្តហោះ

បានផុស

១០ ខែ មុន

នៅ

ថ្ងៃអង្គារ ២៧ កុម្ភៈ ២០២៤

ដោយ

រដ្ឋបាលក្រុងប៉េកាំងប្រទេសចិន ថ្មីៗនេះបានអនុញ្ញាតឲ្យក្រុមហ៊ុនប្រតិបត្តិករតាក់ស៊ីស្វ័យប្រវត្តិ ពោលគឺតាក់ស៊ីរ៉ូបូតបើកដោយខ្លួនឯងចំនួន ២ ក្រុមហ៊ុនដឹកអ្នកដំណើរទៅកាន់ព្រលានយន្តហោះអន្តរជាតិ Beijing Daxing ហើយនេះគឺជាជំហានឆ្ពោះទៅអនាគតបច្ចេកវិទ្យាដ៏សំខាន់នៃរដ្ឋធានីប៉េកាំង និងជាទីក្រុងដំបូងគេលើពិភពលោក ដែលអនុវត្តការដឹកជញ្ជូនអ្នកដំណើរដោយបច្ចេកវិទ្យាគ្មានមនុស្សបើកទៅកាន់ព្រលានយន្តហោះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពពីសារព័ត៌មាន China Daily និងអ្នកជំនាញផ្នែកឧស្សាហកម្មបច្ចេកវិទ្យាបានឲ្យដឹងថា ក្រុមហ៊ុនតាក់ស៊ីស្វ័យប្រវត្តិចិនទាំងពីររួមមាន ក្រុមហ៊ុន Baidu Inc និងក្រុមហ៊ុន Pony.AI ដែលនេះគឺជាសមិទ្ធផលដ៏សំខាន់មួយនៃវិស័យដឹកជញ្ជូនចិន ។ ពិសេសនោះគឺការខិតខំប្រឹងប្រែងអភិវឌ្ឍវិស័យបច្ចេកវិទ្យាបញ្ញាសប្បនិម្មិត (AI) ដែលអាចជំរុញឲ្យមានអាជីវកម្មជាច្រើនលូតទៅមុខនៅលើបច្ចេកវិទ្យាស្វ័យប្រវត្តិបើកបរដោយខ្លួនឯង ។

សម្រាប់ការបើកភ្លើងខៀវនេះទៀតសោត គឺអនុញ្ញាតដោយការិយាល័យកណ្តាលរដ្ឋធានីប៉េកាំងនៃតំបន់បើកបរស្វ័យប្រវត្តិ ដែលឲ្យក្រុមហ៊ុនទាំងពីរអាចអនុវត្តសេវាបើកបរលើផ្លូវល្បឿនលឿន ៤០ គីឡូម៉ែត្រភ្ជាប់តំបន់ Yizhuang នៃក្រុងប៉េកាំងទៅកាន់ព្រលានយន្តហោះ ក៏ដូចជាតំបន់មួយចំនួនដែលបានរៀបចំរួចក្នុងតំបន់ដដែលនោះ ។

យ៉ាងណាមិញ ដើម្បីធានាឲ្យបានសុវត្ថិភាពជាចម្បងជានិច្ច រួមជាមួយលក្ខខណ្ឌអនុញ្ញាតឲ្យដឹកអ្នកដំណើរបាន គឺតម្រូវឲ្យមានបុគ្គលិកពិនិត្យប្រចាំការជាប់នឹងចង្កូតឡាន និងអាចគ្រប់គ្រងស្ថានការណ៍ភ្លាមៗវិញបានក្នុងករណីមានអាសន្នបន្ទាន់ណាមួយ ។

គួររំឭកថា រដ្ឋាភិបាលក្រុងប៉េកាំងកាលពីដើមឆ្នាំ ២០២៤ នេះ ក៏បានបង្ហាញនូវគម្រោង និងពង្រីកនូវវិសាលភាពបច្ចេកវិទ្យាកម្រិតខ្ពស់ផងដែរសម្រាប់ឆ្នាំ ២០២៤ នេះផងដែរ ហើយក្នុងនោះវិស័យគន្លឹះរួមមានការអភិវឌ្ឍទៅលើបច្ចេកវិទ្យាបើកបរដឹកជញ្ជូនស្វ័យប្រវត្តិដោយខ្លួនឯងក្នុងតំបន់មួយចំនួន បច្ចេកវិទ្យានៅស្ថានីយ៍រថភ្លើង ព្រលានយន្តហោះ និងតំបន់ផ្លូវក្នុងទីប្រជុំជនទីក្រុងផងដែរ ៕

ដោយ៖ មាន រតនា