វៀតណាម គ្រោងទិញអគ្គិសនីជាង ៤ ពាន់មេហ្គាវ៉ាត់ពី ឡាវ ព្រោះតម្លៃធូរថ្លៃ

រោងចក្រថាមពលខ្យល់ឡាវចំនួន ៧ គ្រោងនឹងលក់អគ្គិសនីសរុបចំនួន ៤,១៥០ មេហ្គាវ៉ាត់ទៅឲ្យប្រទេសវៀតណាម ខណៈការបញ្ជូនថាមពលទាំងនោះនឹងធ្វើឡើងជាដំណាក់កាល ពោលមុនឆ្នាំ ២០២៥ នឹងមានការផ្គត់ផ្គង់ថាមពលប្រមាណ ៦៨២ មេហ្គាវ៉ាត់ ចំណែកនៅសល់ប៉ុន្មានទៀតនឹងផ្គត់ផ្គង់ជាបន្តបន្ទាប់ ។ នេះបើយោងតាមការចេញផ្សាយដោយសារព័ត៌មាន VN Express កាលពីថ្ងៃទី២៧ ខែកុម្ភៈ ។

ទន្ទឹមនោះ អគ្គិសនីវៀតណាម (EVN) ក៏បានឲ្យដឹងដែរថា វៀតណាមបាននិងកំពុងចំណាយលុយទិញថាមពល ដែលភាគច្រើនចេញពីរោងចក្រវារីអគ្គិសនឡាវតាមរយៈកិច្ចព្រមព្រៀងអន្តររដ្ឋាភិបាល ចាប់តាំងពីឆ្នាំ ២០១៦ មកម្ល៉េះ ស្របពេលដែលរដ្ឋាភិបាលក៏ពេញចិត្តពេញថ្លើមនឹងសំណើទិញនេះផងដែរ ដោយសារតែការនាំចូលថាមពលពីឡាវ នឹងជួយសម្រាលបន្ទុកការខ្វះខាតការផ្គត់ផ្គង់ក្នុងប្រទេស ។

EVN បានបញ្ជាក់ទៀតថា ប្រសិនបើផែនការមេនៃថាមពលជាតិត្រូវបានអនុវត្តតាមគោលការណ៍មែននោះ តំបន់ភាគកណ្តាល និងប៉ែកខាងត្បូងវៀតណាម នឹងមានថាមពលប្រើពេញដៃរហូតដល់ឆ្នាំ ២០៣០ ប៉ុន្តែសម្រាប់ភាគខាងជើងវិញ ទំនងជាប្រឈមនឹងការខ្វះខាតនៅឆ្នាំ ២០២៥ ជាពិសេសក្នុងរដូវប្រាំង ចាប់ពីខែឧសភាដល់ខែកក្កដា ។

ស្របពេលជាមួយគ្នានេះ កត្តាមួយទៀតដែលរុញឲ្យវៀតណាមទិញយកថាមពលពីប្រទេសឡាវ ក៏ដោយសារតែមកពីតម្លៃសមរម្យផងដែរ ពោលថាមពលខ្យល់នៅប្រទេសឡាវបច្ចុប្បន្នមានតម្លៃជិត ៧ សេនក្នុងមួយគីឡូវ៉ាត់ម៉ោង បើធៀបនឹងវៀតណាមមានតម្លៃជាង ៨ ទៅជិត ១០ សេន អាស្រ័យលើថាតើរោងចក្រផលិតទាំងនេះស្ថិតនៅលើគោក ឬនៅឆ្នេរសមុទ្រ ។

គួរបញ្ជាក់ថា ពេញមួយឆ្នាំ ២០២៣ កន្លងទៅ ប្រទេសវៀតណាមបាននាំចូលអគ្គិសនីពីប្រទេសឡាវ រួមទាំងពីប្រទេសចិនផងដែរនោះ មានចំនួន ១.៥ ភាគរយនៃការផ្គត់ផ្គត់ថាមពលអគ្គិសនីសរុប ដោយសារតែប្រទេសអាស៊ានមួយនេះកំពុងត្រៀមខ្លួនទៅនឹងខ្វះខាតថាមពលនៅក្នុងតំបន់ភាគខាងជើង ៕

ដោយ ៖ សុខ ជីវ័ន្ត

ចុចអាន ៖ កម្ពុជា ជាប់លេខ ១ ជាគោលដៅទេសចរណ៍វប្បធម៌ល្អដាច់គេនៅ អាស៊ី ឯថៃ-វៀតណាម ត្រឹមតោងពីក្រោយ