យានអវកាសអាមេរិក និងផ្កាយរណបរុស្ស៊ី កំពុងស្ថិតក្នុងគន្លង អាចហោះទៅបុកគ្នា

តាមការផ្សាយរបស់ Reuters, ទីភ្នាក់ងារអវកាស ណាសា បានព្រមាននៅថ្ងៃពុធទី២៨ខែកុម្ភៈថា ក្រសួងការពារជាតិអាមេរិក កំពុងឃ្លាំមើលយ៉ាងដិតដល់ជាទីបំផុត ចំពោះយានអវកាសអាមេរិក Thermosphere Ionosphere Mesosphere Energetics and Dynamics Mission (TIMED) និងផ្កាយរណបរុស្ស៊ី Cosmos 2221 ដែលកំពុងស្ថិតក្នុងគន្លងត្រូវហោះមកទល់មុខគ្នា អាចនឹងបុកគ្នាថែមទៀត។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ត្បិតណាសា ប្រកាសថា យានអវកាសនិងផ្កាយរណបនេះ ទំនងចៀសផុតពីការប៉ះគ្នាក៏ដោយ ប៉ុន្តែបើវាបុកគ្នាមែន វាអាចបណ្តាលឲ្យបែកបាក់និងធ្លាក់កម្ទេចកម្ទី ប៉ុន្តែខ្លួនកំពុងបន្តតាមដានស្ថានភាពនេះជាប់ជានិច្ចជាមួយក្រសួងការពារជាតិ។

ទោះបីជាយ៉ាងណាក៏ដោយ សេចក្តី​ថ្លែងការណ៍ខាងលើ មិន​បញ្ជាក់ច្បាស់ថាតើយានអវកាសនិងផ្កាយរណបនេះ ហោះកៀកគ្នាជិតកម្រិតណានោះទេ ប៉ុន្តែក្រុមអ្នកវិទ្យាសាស្រ្តរំពឹងថា បើបុកមែន វានឹងបុកគ្នានៅរយៈកម្ពស់៦០០គីឡូម៉ែត្រលើផ្ទៃផែនដី។

សូមបញ្ជាក់ យានអវកាស TIMED របស់សហរដ្ឋអាមេរិក ត្រូវបានបាញ់បង្ហោះក្នុងបេសកកម្មវិទ្យាសាស្ត្រ ដើម្បីសិក្សាពីឥទ្ធិពលនៃព្រះអាទិត្យនិងសកម្មភាពរបស់មនុស្សនៅលើមណ្ឌលកណ្តាលនិងបរិយាកាសខាងលើរបស់ផែនដី។

ចំណែក Cosmos 2221 គឺជាផ្កាយរណបប្រភេទ ELINT ទម្ងន់២តោនរបស់រុស្ស៊ី ដែលបាញ់បង្ហោះក្នុងឆ្នាំ ១៩៩២ តាមរយៈរ៉ុកកែត Tsiklon-3 នៅស្ថានីយ Plesetsk៕

អត្ថបទ៖ សុខ សុវណ្ណ

ចុចអាន៖ ក្រុមហ៊ុនអាមេរិក បង្កើតប្រវត្តិសាស្រ្ត នាំយានអវកាសឯកជន ចុះចតលើឋានព្រះចន្ទ ដោយជោគជ័យ