ពលរដ្ឋហ្គាហ្សា ខ្លះជិះទូក ខ្លះហែលទឹក ចូលសមុទ្រ ប្រថុយជីវិតទៅយកជំនួយ

ប្រជាជនប៉ាឡេស្ទីនរាប់ពាន់នាក់នៅភាគខាងត្បូងជ្រោយហ្គាហ្សា នាំគ្នាប្រមូលផ្តុំនៅឆ្នេរសមុទ្រ រង់ចាំយន្តហោះដឹកជំនួយ ហើយពេលជំនួយទម្លាក់មក មានខ្លះធ្លាក់ចូលសមុទ្រជាហេតុបង្ខំឲ្យពលរដ្ឋមួយចំនួន ត្រូវហែលទឹក និងខ្លះជិះទូកទៅយក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងវីដេអូចែកចាយលើបណ្តាញសង្គមនិងផ្សាយដោយសារព័ត៌មាន Aljazeera, គេបានឃើញមនុស្សម្នា រត់ប្រសាចដណ្តើមគ្នាយកជំនួយ ហើយអ្នកខ្លះរត់ចូលសមុទ្រ ទាំងប្រថុយជីវិត។ 

ជំនួយ​កាល​ពី​ថ្ងៃ​ពុធទី២៨ខែកុម្ភៈ គឺ​ត្រូវ​បាន​ទម្លាក់នៅតំបន់ហ្គាហ្សា ក្នុងយុទ្ធនាការមួយ​ដោយ​មាន​ការ​ចូល​រួមសម្របសម្រួល​ពី​ប្រទេស​អារ៉ាប់រួម និង​ហ្ស៊កដានី។

ពលរដ្ឋហ្គាហ្សាប្រហែល២.៣លាននាក់ កំពុងប្រឈមមុខនឹងស្ថានភាពដ៏មហន្តរាយសឹងដាច់ពោះស្លាប់ ព្រោះតែមិនមានស្បៀងអាហារគ្រប់គ្រាន់ ក្រោយ​អ៊ីស្រាអែល ​រារាំងមិនឲ្យ​ជំនួយដឹកចូលទៅភាគ​ខាង​ជើងតំបន់នេះ។

អង្គការកម្មវិធីស្បៀងអាហារពិភពលោក បានព្រមានថា គ្រោះទុរ្ភិក្សនឹងកើតមាននៅទីនោះជាក់ជាមិនខាន ខណៈពួកគេមិនអាចបញ្ជូនជំនួយទៅទីនោះ ចាប់តាំងពីថ្ងៃទី២៣ខែមករាមកម្ល៉េះ។

កាលពីសប្តាហ៍មុន ប្រធានផ្នែកជំនួយរបស់អង្គការសហប្រជាជាតិ លោក Martin Griffiths បានជូនដំណឹងទៅកាន់ក្រុមប្រឹក្សាសន្តិសុខ ដោយអំពាវនាវឲ្យសមាជិកទាំងឡាយ ត្រូវធ្វើសកម្មភាពជាបន្ទាន់ ហាមឃាត់ការប្រើប្រាស់ភាពអត់ឃ្លានរបស់ជនស៊ីវិល ធ្វើជាយុទ្ធសាស្រ្តសង្គ្រាម។

ដោយឡែក មូលនិធិកុមាររបស់ UN ហៅកាត់ UNICEF ក៏បានព្រមានផងដែរកាលពីថ្ងៃទី១៩ខែកុម្ភៈថា កង្វះអាហារូបត្ថម្ភកាន់តែខ្លាំងឡើងៗក្នុងចំណោមកុមារ ស្ត្រីមានផ្ទៃពោះ និងស្រ្តីបំបៅដោះកូន កំពុងបង្កការគំរាមកំហែងយ៉ាងធ្ងន់ធ្ងរដល់សុខភាព។

សូមជម្រាបជាថ្មី ជាការសងសឹក​បន្ទាប់​ពីក្រុមហាម៉ាស វាយឆ្មក់​កាល​ពី​ថ្ងៃ​ទី៧ខែ​តុលា, ភាគីអ៊ីស្រាអែល​ ក៏បាន​បើក​ការ​វាយលុកនៅ​តំបន់​ហ្គាហ្សា​ សម្លាប់មនុស្ស​ប្រមាណ៣០០០០នាក់។

ស្របពេលជាមួយគ្នានោះ យោងតាម UN, ប្រហែល៦០% នៃហេដ្ឋារចនាសម្ព័ន្ធទីនោះ ត្រូវបានបំផ្លាញឬកម្ទេចទាំងស្រុង៕

អត្ថបទ៖ សុខ សុវណ្ណ

ចុចអាន៖ លោក Biden និង Netanyahu ប៉ះសម្តីគ្នាខ្លាំង រឿងសង្គ្រាមនៅ ហ្គាហ្សា