ឆេះអគារពាណិជ្ជកម្មបង់ក្លាដែស ស្លាប់មនុស្ស ៤៣នាក់

រដ្ឋមន្ត្រីសុខាភិបាលបង់ក្លាដែសនិយាយថា មនុស្សចំនួន៤៣នាក់ត្រូវបាត់បង់ជីវិត បន្ទាប់ពីអគ្គិភ័យដ៏កាចសាហាវមួយ បានឆាបឆេះអគារពាណិជ្ជកម្មកម្ពស់៧ជាន់ កាលពីរាត្រីថ្ងៃព្រហស្បតិ៍ទី២៩ខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម Reuters, ដំបូងឡើយ អគ្គិភ័យ បានចាប់ផ្តើមចេញពីភោជនីយដ្ឋាន Kacchi Bhai នៅម៉ោងប្រហែល ១០យប់ ក្នុងរដ្ឋធានីដាកា ក្រោយមកវាបានរាលដាលយ៉ាងលឿនតាមអាគារ បណ្តាលឲ្យមនុស្សរាប់សិបនាក់ ត្រូវជាប់នៅទីនោះ។

ក្នុងអគារនោះ មិនមែនមានត្រឹមភោជនីដ្ឋានប៉ុណ្ណោះទេ ពោលគឺមានហាងជាច្រើនទៀតដូចជាហាងលក់សម្លៀកបំពាក់ លក់ទូរស័ព្ទ និងហាងលក់គ្រឿងទេសជាដើម។ 

ទោះបីជាយ៉ាងណាក៏ដោយ មូលហេតុបង្កជាអគ្គិភ័យនេះ មិនទាន់ត្រូវបានគេដឹងទេ ខណៈមន្ត្រីជំនាញកំពុងបើកការស៊ើបអង្កេត។

សាក្សីម្នាក់ប្រាប់ទៅ AFP ថា “យើងស្ថិតនៅជាន់ទីប្រាំមួយ ពេលដែលយើងឃើញផ្សែងហុយពេញជណ្តើរ។​ មនុស្សជាច្រើន រត់សម្រុកឡើងលើ ហើយយើងបានតោងទុយយោទឹក ដើម្បីចុះក្រោម ប៉ុន្តែមានអ្នក​ខ្លះ​រង​របួស ព្រោះពួកគេលោតចុះពីអគារ”។

សូមបញ្ជាក់ថា គ្រោះអគ្គិភ័យ​នៅ​អគារ​ពាណិជ្ជកម្មនិង​លំនៅដ្ឋាន ​គឺ​ជា​រឿង​ធម្មតាទៅហើយ​ក្នុង​ប្រទេស​បង់ក្លាដែស ហើយជារឿយៗបញ្ហានេះ ត្រូវបានគេស្តីបន្ទោសទៅលើការអនុវត្តន៍បទប្បញ្ញត្តិសុវត្ថិភាពមិនគ្រប់គ្រាន់។

កាលពីខែកក្កដាឆ្នាំ២០២១ មនុស្ស៥២នាក់ រួមទាំងកុមារផងដែរ ត្រូវបានសម្លាប់ នៅពេលអគ្គិភ័យ ឆាបឆេះរោងចក្រកែច្នៃអាហារមួយកន្លែង ហើយនៅខែកុម្ភៈឆ្នាំ២០១៩ មនុស្ស៧០នាក់ក៏ត្រូវបាត់បង់ជីវិតផងដែរ ពេលគ្រោះអគ្គិភ័យឆាបឆេះប្លុកផ្ទះល្វែងក្នុងទីក្រុងដាកា៕

អត្ថបទ៖ សុខ សុវណ្ណ

ចុចអាន៖ ១ យប់ ផ្ទះ ២ ខ្នង ត្រូវអគ្គិភ័យបំផ្លាញគ្មានសល់