ព័ត៌មានអន្ដរជាតិ

ចាប់ខ្លួនប៉ូលិសជប៉ុនម្នាក់ទាំងកណ្តាលយប់ ពីបទលួចខោអាវក្នុងស្រីៗ

បានផុស

១១ ខែ មុន

នៅ

ថ្ងៃអាទិត្យ ៣ មីនា ២០២៤

ដោយ

នាយកដ្ឋានប៉ូលិសទីក្រុងតូក្យូបានចាប់ខ្លួនមន្ត្រីប៉ូលិសម្នាក់ អាយុ ៤៤ ឆ្នាំ ដោយសង្ស័យថា បានទំលុះចូលលួចខោអាវក្នុងរបស់ស្រីៗ បន្ទាប់ពីគាត់ត្រូវបានគេចាប់ខ្លួននៅក្នុងផ្ទះមួយក្នុង Edogawa Ward ប្រទេសជប៉ុន កាលពីថ្ងៃទី១ ខែមីនា ឆ្នាំ២០២៤។

គេហទំព័រ Japan Today បានរាយការណ៍ដោយដកស្រង់សម្តីប៉ូលិសថា មន្ត្រីម្នាក់ឈ្មោះ Kensuke Tsunoda ដែលធ្វើការនៅនាយកដ្ឋានប៉ូលិស Ushigome គាត់បានប្រព្រឹត្តបទល្មើសដោយលួចចូលទៅក្នុងផ្ទះដែលបុរសម្នាក់ និងប្រពន្ធរបស់គាត់កំពុងរស់នៅ ដើម្បីលួចខោក្នុងរបស់ស្រីៗ។ ក្នុងពេលនោះផងដែរ បុរសម្ចាស់ផ្ទះបានភ្ញាក់ពីដំណេកនៅម៉ោង៥និង៤០នាទីព្រឹក ហើយឃើញ Tsunoda នៅក្នុងផ្ទះ ទើបចាប់ចងទុកនិងបានទូរស័ព្ទទៅប៉ូលិសភ្លាមៗដោយឥតបង្អង់យូរ ។

ក្រោយមក ប៉ូលិសបានធ្វើការស៊ើបអង្កេតហើយនិយាយថា ជនសង្ស័យបានសារភាពថាពិតជាបានប្រព្រឹត្តបទល្មើសពិតប្រាកដមែន។ ជាពិសេសរូបគេនឹងទទួលទោសដែលខ្លួនបានប្រព្រឹត្ត ដោយមិនយកងារជាប៉ូលិសមកដាក់ពីមុខដើម្បីរំលងច្បាប់នោះទេ។

ទោះយ៉ាងណាក៏ដោយ អ្នកនាំពាក្យរបស់នាយកដ្ឋានប៉ូលិសទីក្រុងតូក្យូបាននិយាយថា “វាពិតជាគួរឲ្យសោកស្ដាយខ្លាំងណាស់ ដែលមន្ត្រីម្នាក់ត្រូវបានចាប់ខ្លួន យើងនឹងធ្វើការស៊ើបអង្កេតឲ្យបានហ្មត់ចត់ចំពោះឧប្បត្តិហេតុនេះបន្ថែមទៀតផងដែរ”៕