ព័ត៌មានអន្ដរជាតិ

ពិធីជប់លៀងមុនរៀបការរបស់កូនពៅ មហាសេដ្ឋីឥណ្ឌា Ambani ចំណាយលុយសុទ្ធ ១៥២ លានដុល្លារ

បានផុស

១១ ខែ មុន

នៅ

ថ្ងៃចន្ទ ៤ មីនា ២០២៤

ដោយ

លោក Mukesh Ambani ដែលជាបុគ្គលមានទ្រព្យសម្បត្តិច្រើនជាងគេនៅអាស៊ី បានប្រារព្ធពិធីមុនអាពាហ៍ពិពាហ៍រយៈពេល៣ថ្ងៃ ដោយលោកចំណាយអស់ប្រាក់អស់ ១២០លានផោន (ប្រហែល ១៥១.៩ លានដុល្លារអាមេរិក) សម្រាប់កូនប្រុសសំណព្វចិត្ត ឈ្មោះ Anant និងគូដណ្តឹង Radhika Merchant នេះបើយោងតាមការរាយការណ៍ដោយ កាសែត Daily Mail នាថ្ងៃ០៤ ខែមីនា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងពិធីដ៏ឱឡារិកនេះផងដែរ ប្រព័ន្ធផ្យព្វផ្សាយធំៗបានសង្កេតឃើញថា វាបានទាក់ទាញការចូលរួមពីបុគ្គលល្បីៗទូទាំងពិភពលោក រួមទាំងមេ Meta លោក Mark Zuckerberg កូនស្រីរបស់អតីតប្រធានាធិបតីអាមេរិក Donald Trump អ្នកស្រី Ivanka Trump និងស្ថាបនិកក្រុមហ៊ុន Microsoft លោក Bill Gates ដែលជាអាហារសម្រាប់ព្រឹត្តិការណ៍ដ៏ប្រណីតដែលគ្រប់គ្រងដោយក្រុមសណ្ឋាគារលំដាប់កំពូលនៅក្នុងប្រទេសឥណ្ឌា ហើយត្រូវបានគេជឿថា មានតម្លៃប្រហែល ២០ លានផោន (២៥,៣៣១,២០០ដុល្លារ)។

ប្រភពជិតស្និទ្ធនឹងមហាសេដ្ឋី Ambanis ក៏បានទម្លាយដែរថា ការបង្ហាញខ្លួនរបស់តារាចម្រៀង R&B Rihanna នៅក្នុងព្រឹត្តិការណ៍ដែលធ្វើឡើងនៅទីក្រុង Jamnagar លោកបានចាយប្រាក់សុទ្ធដល់ទៅ ៦.៣ លានដុល្លារ ដើម្បីនាំតារាស្រីបរទេសរូបនេះមកកាន់ប្រទេសឥណ្ឌា ។

លើសពីនោះផងដែរ ថវិកាដែលនៅសេសសល់ត្រូវបានបម្រុងទុកសម្រាប់ចាយលើបុគ្គលិកជាច្រើននាក់ និងក្រុមចុងភៅចំនួន២១ នាក់មកពីទីក្រុង Indore ដែលបានរៀបចំមុខម្ហូបចំនួន ២,៥០០ យ៉ាងទូលំទូលាយដែលរួមមានម្ហូបឥណ្ឌា ថៃ, ម៉ិកស៊ិក, ចិន និងអឺរ៉ុប ខណៈដែលការរៀបចំកន្លែងស្នាក់នៅដ៏ប្រណិតនៅជិត Jamnagar សម្រាប់ភ្ញៀវកិត្តិយសប្រហែល ១,០០០ នាក់ គឺជាការចំណាយមួយផ្សេងទៀត។

យ៉ាងណាក៏ដោយ ដើម្បីរំលឹកដល់ពិធីមង្គលការនាពេលខាងមុខ Ambanis ក៏បានសាងសង់ប្រាសាទហិណ្ឌូនៅ Jamnagar ដូចដែលបានបង្ហាញនៅក្នុងការបង្ហោះដោយ Reliance Foundation ដែលជាផ្នែកនៃអាជីវកម្មគ្រួសាររបស់ពួកគេនៅលើប្រព័ន្ធផ្សព្វផ្សាយសង្គម។

អ្វីដែលកាន់តែចាប់អារម្មណ៍ខ្លាំងក្លានោះគឺ ការប្រារព្ធពិធីមុនអាពាហ៍ពិពាហ៍ដែលមានរយៈពេលពី៣ថ្ងៃ រាប់ចាប់តាំងពីថ្ងៃសុក្រ ដល់ ថ្ងៃអាទិត្យ បានបង្ហាញប្រធានបទ ព្រឹត្តិការណ៍ និងកូដសំលៀកបំពាក់ចម្រុះ ដោយចំណុចលេចធ្លោគឺការទៅទស្សនាមជ្ឈមណ្ឌលសង្គ្រោះសត្វនៅ Jamnagar កាលពីថ្ងៃសៅរ៍។ មជ្ឈមណ្ឌលនេះជាជម្រករបស់សត្វកម្រនិងអសកម្មផ្សេងៗតំណាងឲ្យគម្រោងពិសេស ដែលដឹកនាំដោយកូនប្រុសពៅ Anant នាពេលកន្លងមក។

សូមបញ្ចាក់និងរម្លឹកដែរថា គិតមកដល់ត្រឹមថ្ងៃទី ០៤ ខែមីនា ឆ្នាំ ២០២៤ ទស្សនាវដ្ដី Forbes បានចុះបញ្ជីទ្រព្យសម្បត្តិរបស់ លោក Mukesh Ambani ចំនួន ១១៧ ពាន់លានដុល្លារអាមេរិក ដែលធ្វើឲ្យគាត់ក្លាយជាអ្នកមានបំផុតនៅអាស៊ី និងជាមហាសេដ្ឋីទីប្រាំបួនរបស់ពិភពលោក៕