បារាំង ក្លាយជាប្រទេសដំបូងគេលើលោក ដាក់​បញ្ចូល​សិទ្ធិ​រំលូត​កូន ​ក្នុង​រដ្ឋធម្មនុញ្ញ​

បារាំង ​បាន​ក្លាយ​ជា​ប្រទេស​ដំបូង​គេ​លើ​ពិភពលោក ​ដែលដាក់​បញ្ចូល​សិទ្ធិ​រំលូត​កូន​ពេញលេញទៅ​ក្នុង​រដ្ឋធម្មនុញ្ញ​របស់​ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ AFP, សមាជិកសភាបារាំង បានបោះឆ្នោតនៅក្នុងសម័យប្រជុំរួមនៃសភាទាំងពីរ កាលពីថ្ងៃចន្ទទី៤ខែមីនា ដើម្បីអនុម័តវិសោធនកម្មរដ្ឋធម្មនុញ្ញជាមួយសំឡេងគាំទ្រ ៧៨០ ទល់នឹង៧២។

ក្រោយការបោះឆ្នោត លោកប្រធានាធិបតី Emmanuel Macron បានបង្ហោះ Twitter ថា សូមអបអរសាទរជាមួយគ្នា នូវការដាក់បញ្ចូលសេរីភាពថ្មីមួយ ដែលត្រូវបានធានានៅក្នុងរដ្ឋធម្មនុញ្ញលើកដំបូងជាប្រវត្តិសាស្ត្រ។ ស្របពេលជាមួយគ្នានោះដែរ លោក Macron បានហៅ​ការ​បោះឆ្នោតនេះ​ថា​ជា “​មោទកភាព​របស់​បារាំង” និង “​សារ​ជា​សកល”។

លើសពីនេះ ប៉ម Eiffel ក្នុងទីក្រុងប៉ារីស ក៏ត្រូវបានបំភ្លឺភ្លើងក្នុងពិធីអបអរសាទរផងដែរ ជាមួយនឹងសារថា “រាងកាយខ្ញុំ ជម្រើសខ្ញុំ”។

ទោះបីជាយ៉ាងណាក៏ដោយ ក្រុមប្រឆាំងការរំលូតកូន បានរិះគន់ខ្លាំងណាស់ ចំពោះការដាក់​បញ្ចូល​សិទ្ធិ​រំលូត​កូន​យ៉ាង​ច្បាស់ ទៅ​ក្នុង​រដ្ឋធម្មនុញ្ញ​បារាំង ជាពិសេសវិមានវ៉ាទីកង់ តែម្តង។

បើងាកទៅមើលសហរដ្ឋអាមេរិកឯណោះវិញ សិទ្ធិរំលូតកូនត្រូវបានទទួលស្គាល់យ៉ាងស្របច្បាប់ថា ទទួលបានការពារដោយរដ្ឋធម្មនុញ្ញអស់រយៈពេល៥០ឆ្នាំ ក្រោមសេចក្តីសម្រេច Roe v. Wade ជាប្រវត្តិសាស្រ្ត ប៉ុន្តែមកដល់ខែមិថុនាឆ្នាំ២០២២ តុលាការកំពូលរបស់សហរដ្ឋអាមេរិក បានលុបចោលសេចក្តីសម្រេចនោះវិញ ដោយទុកឲ្យសភាក្នុងរដ្ឋនីមួយៗដាក់កំហិតលើការបញ្ចប់ភាពមានផ្ទៃពោះរៀងៗខ្លួន។ ជាលទ្ធផល រដ្ឋជាង២០របស់សហរដ្ឋអាមេរិក បានហាមឃាត់ការរំលូតកូន។

ចំណែកនៅបារាំង ការរំលូតកូនគឺជារឿងស្របច្បាប់ចាប់តាំងពីឆ្នាំ១៩៧៤មក ពោលគឺអនុញ្ញាតឲ្យបញ្ចប់ភាពមានផ្ទៃពោះក្នុងរយៈពេល១៤សប្តាហ៍នៃការមានគភ៌ ហើយតាមការស្ទង់មតិបានបង្ហាញថា ៨០% នៃជនជាតិបារាំងពេញវ័យ បានគាំទ្រការកែប្រែរដ្ឋធម្មនុញ្ញនេះ៕

អត្ថបទ៖ សុខ សុវណ្ណ

ចុចអាន៖ ក្មេងស្រី ១៣ ឆ្នាំនៅអាមេរិក ត្រូវបង្ខំចិត្តសម្រាលកូន ដោយសារច្បាប់ហាមរំលូត