ព័ត៌មានអន្ដរជាតិ

EU ប្រាប់ឲ្យអ៊ុយក្រែន ចាយលុយទិញអាវុធ កុំរំពឹងបានទទេៗ ពេក

បានផុស

១ year មុន

នៅ

ថ្ងៃអង្គារ ៥ មីនា ២០២៤

ដោយ

លោក Thierry Breton ស្នងការ សហភាពអឺរ៉ុប (EU) ផ្នែកទីផ្សារផ្ទៃក្នុង បានប្រាប់ទូរទស្សន៍ France Info កាលពីថ្ងៃចន្ទទី៤ខែមីនាថា អ៊ុយក្រែន ត្រូវចាយលុយទិញអាវុធ កុំរំពឹងទទួលបានគ្រាប់កាំភ្លើងធំចំនួន១លានដោយឥតគិតថ្លៃឲ្យសោះ ហើយគាត់ ក៏បានចោទលោក វ្ល៉ាឌីមៀរ ហ្សេលេនស្គី ជាមនុស្សយល់ខុសផងដែរ ក្រោយបន្ទោសប្លុកនេះថា មិនបានធ្វើតាមសន្យារបស់ខ្លួន។

លោក Thierry Breton (រូបថត៖ Audiovisual Service)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីសប្តាហ៍មុន លោក ហ្សេលេនស្គី ត្អូញត្អែរថា EU ប្រហែលមិនអាចសម្រេចបានគោលដៅបញ្ជូនគ្រាប់កាំភ្លើងធំចំនួន ៥២០០០០គ្រាប់ ដល់ទីក្រុងកៀវ ត្រឹមខែមីនា ដូចការរំពឹងទុកបាននោះទេ។ ក្នុងចំណោមគ្រាប់រាប់លានដែល EU សន្យាជួយ៥០% គឺបានមកតែ៣០%ប៉ុណ្ណោះ។

នៅពេលសួរអំពីសម្តីរបស់លោក ហ្សេលេនស្គី, លោក Breton បានច្រានចោលការអត្ថាធិប្បាយរបស់ប្រធានាធិនាធិបតីអ៊ុយក្រែនថាជា “រឿងមិនពិត”។ តួរលេខដែលលើកឡើងដោយលោក ហ្សេលេនស្គី គឺមិនស៊ីគ្នានឹងធាតុពិតទាល់តែសោះ។

លោក Breton ប្រាប់ទៅ France Info អំពីពាក្យសន្យារបស់ទីក្រុងព្រុចសែល កាលពីឆ្នាំមុនថា “ខ្ញុំនិយាយថា ផ្តល់ មិនមែនចែកជូនដោយឥតគិតថ្លៃទេ។ ប្លុកនេះរំពឹងថា អ៊ុយក្រែននឹងចំណាយប្រាក់យ៉ាងហោចណាស់ក៏មួយផ្នែកដែរ សម្រាប់ការផ្គត់ផ្គង់ទាំងនោះ”។

លោកស្នងការពន្យល់ថា ផែនការរបស់ EU បានគិតគូរដល់បីដំណាក់កាលធំៗសម្រាប់ទីក្រុងកៀវ ដើម្បីទទួលបានគ្រាប់កាំភ្លើង។ ទីមួយគឺពាក់ព័ន្ធនឹងការបរិច្ចាគ ហើយ EU បានផ្តល់៣០០០០០គ្រាប់ឲ្យអ៊ុយក្រែនដោយមិនគិតថ្លៃរួចទៅហើយ ខណៈត្រឹមខែមីនា តួលេខនេះនឹងលោតដល់ ៥៥០០០០គ្រាប់។

ទីពីរ ទីក្រុងកៀវ បានទិញ៣៥០០០០គ្រាប់រួចហើយពីក្រុមហ៊ុនផលិត ចាប់តាំងពីជាប់ពាក្យសន្យាមក ហើយរួមជាមួយការបរិច្ចាគរបស់ EU, ការទិញទាំងនេះនឹងនាំឲ្យអ៊ុយក្រែនទទួលបានគ្រាប់សរុប៩០០០០០ ត្រឹមចុងខែមីនា។ ប្រសិនបើអ៊ុយក្រែន នៅតែចង់បានច្រើនទៀត ទីក្រុងកៀវ អាចបន្តទិញដោយផ្ទាល់ពីឧស្សាហកម្មរបស់ EU បាន។ លោកបន្ថែមថា EU បាននិងកំពុងផ្តល់ជំនួយហិរញ្ញវត្ថុដល់រដ្ឋាភិបាលអ៊ុយក្រែនជាទឹកប្រាក់ ១.៦៣ពាន់លានដុល្លារ ក្នុងមួយខែ ដែលនេះមានន័យថា អ៊ុយក្រែន មានលទ្ធភាពទិញគ្រាប់ដោយខ្លួនឯងបាន។

ជំនួយយោធាលោកខាងលិចដឹកទៅអ៊ុយក្រែន (រូបថត៖ AC)

ទីបី ផែនការនេះរួមមានការបរិច្ចាគទ្វេភាគីដោយរដ្ឋជាសមាជិក EU នីមួយៗ គ្រាន់តែមិនផ្សព្វផ្សាយជាសាធារណៈប៉ុណ្ណោះ។

សូមបញ្ជាក់ជាថ្មី ទីក្រុងកៀវបានចោទប្រកាន់ម្ចាស់ជំនួយលោកខាងលិចម្តងហើយម្តងទៀតថា មិនបានផ្តល់គ្រឿងសឹកដល់ខ្លួនគ្រប់គ្រាន់។ តួយ៉ាង កាលពីចុងខែកុម្ភៈ រដ្ឋមន្ត្រីការពារជាតិអ៊ុយក្រែនលោក Rustem Umerov និយាយថា ពាក់កណ្តាលនៃអាវុធ និងគ្រាប់រំសេវដែលសន្យាដោយលោកខាងលិច គឺបានមកដល់យឺតពេល៕

អត្ថបទ៖ សុខ សុវណ្ណ

ចុចអាន៖ លោក Zelensky ថា ទាហានអ៊ុយក្រែនជាង ៣ ម៉ឺននាក់ពលីជីវិតក្នុងសង្គ្រាម តែ រុស្ស៊ី ចាត់ទុកចំនួននេះតិចពេកហើយ