ព័ត៌មានអន្ដរជាតិ
មីយ៉ាន់ម៉ា បន្ទន់ឥរិយាបថមួយកាំទៀត បញ្ជូនមន្ត្រីជាន់ខ្ពស់ចូលរួមកិច្ចប្រជុំរដ្ឋមន្ត្រីការពារជាតិ អាស៊ាន នៅឡាវ
មន្ត្រីជាន់ខ្ពស់នៃរដ្ឋាភិបាលយោធាមីយ៉ាន់ម៉ានៅថ្ងៃអង្គារនេះបានអញ្ជើញចូលរួមកិច្ចប្រជុំចង្អៀតរដ្ឋមន្ត្រីការពារជាតិអាស៊ាន (ADMM RETREAT) នៅប្រទេសឡាវ ហើយនេះក៏ជាសញ្ញានៃការបន្ទន់ឥរិយាបថមួយកាំទៀតរបស់របបសឹកក្នុងការសហការជាមួយប្លុកក្នុងតំបន់ ។ នេះបើយោងតាមការចេញផ្សាយដោយសារព័ត៌មានជប៉ុន Kyodo នៅថ្ងៃទី៥ ខែមីនានេះ ។
ស្របពេលជាមួយគ្នានេះ យោងតាមប្រភពការទូតបានឲ្យដឹងថា តំណាងមីយ៉ាន់ម៉ាដែលបានហោះមកចូលរួមកិច្ចប្រជុំចង្អៀតរដ្ឋមន្ត្រីការពារជាតិអាស៊ាន (ADMM RETREAT) នៅក្នុងទីក្រុងហ្លួងព្រះបាងនៅថ្ងៃអង្គារនេះគឺមានឈ្មោះ Zaw Naing Win លោកជាអគ្គនាយកនៃនាយកដ្ឋានកិច្ចការអន្តរជាតិរបស់ក្រសួងការពារជាតិមីយ៉ាន់ម៉ា ។
របបសឹកមីយ៉ាន់ម៉ាដែលឡើងកាន់អំណាចតាមរយៈការធ្វើរដ្ឋប្រហារទម្លាក់រដ្ឋាភិបាលស៊ីវិលរបស់លោកស្រី អ៊ុងសាន ស៊ូជី កាលពីខែកុម្ភៈ ឆ្នាំ២០២១ បានធ្វើពហិការមិនចូលរួមក្នុងកិច្ចប្រជុំថ្នាក់រដ្ឋមន្ត្រីអាស៊ាន ចាប់តាំងពីប្លុកមួយនេះបានឯកភាពនៅពេលនោះថា រាល់កិច្ចប្រជុំពាក់ព័ន្ធទាំងអស់អនុញ្ញាតឲ្យមានតែអ្នកតំណាងមិនមែនជាអ្នកនយោបាយមកពីប្រទេសនេះចូលរួមប៉ុណ្ណោះ ។
ទោះយ៉ាងណា នេះជាលើកទី ២ ហើយសម្រាប់មីយ៉ាន់ម៉ាដែលបានបញ្ជូនមន្ត្រីជាន់ខ្ពស់ឲ្យអញ្ជើញមកចូលរួមក្នុងកិច្ចប្រជុំជាមួយសមាជិកអាស៊ានទាំង ១០ ប្រទេស ខណៈកាលពីលើកដំបូងនោះ រដ្ឋាភិបាលយោធាបានបន្ទន់ឥរិយាបថបញ្ជូនមន្ត្រីជាន់ខ្ពស់មួយរូបគឺលោកស្រី Marlar Than Htike ជាលេខាធិការអចិន្ត្រៃយ៍នៃក្រសួងការបរទេស ហោះមកចូលរួមកិច្ចប្រជុំចង្អៀតរដ្ឋមន្ត្រីការបរទេសអាស៊ាននៅទីក្រុងហ្លួងព្រះបាងកាលពីចុងខែមករាកន្លងទៅ ហើយលោកស្រីក៏បានពេញចិត្តពេញថ្លើមនូវគំនិតផ្តួចផ្តើមរបស់ប្រទេសថៃក្នុងការបង្កើតច្រករបៀងមនុស្សធម៌ដើម្បីផ្តល់ជំនួយដល់ជនស៊ីវិលដែលកំពុងរត់ភៀសខ្លួន ដោយសារតែភ្លើងសង្គ្រាមស៊ីវិលនៅតែបន្តឆេះរោលរាលក្នុងប្រទេស ។
ពាក់ព័ន្ធនឹងបញ្ហានេះដែរ រដ្ឋមន្ត្រីការពារជាតិថៃ លោក Sutin Klungsang បានប្រាប់សារព័ត៌មាន Kyodo ថា វត្តមានចូលរួមរបស់មន្ត្រីយោធាមីយ៉ាន់ម៉ានៅក្នុងកិច្ចប្រជុំចង្អៀតរដ្ឋមន្ត្រីការពារជាតិនាពេលនេះ គឺនឹងផ្ដល់ផលប្រយោជន៍ក្រាស់ក្រែលទាំងសម្រាប់ប្រជាជនមីយ៉ាន់ម៉ា និងភាគីពាក់ព័ន្ធទាំងអស់ ។
គួរបញ្ជាក់ថា កិច្ចប្រជុំចង្អៀតរដ្ឋមន្ត្រីការពារជាតិអាស៊ាន (ADMM RETREAT) បានប្រព្រឹត្តទៅកាលពីថ្ងៃទី៤ ខែមីនា រហូតដល់ថ្ងៃទី៦ ខែមីនាក្នុងទីក្រុងហ្លួងព្រះបាង នៃសាធារណរដ្ឋប្រជាធិបតេយ្យប្រជាមានិតឡាវ ក្រោមមូលបទ “អាស៊ានរួមគ្នាដើម្បីសន្តិភាព សន្តិសុខ និងភាពធន់” ៕
ដោយ ៖ សុខ ជីវ័ន្ត
-
ព័ត៌មានអន្ដរជាតិ៣ ថ្ងៃ ago
បាក់ស្ពាននៅវៀតណាម ធ្លាក់រថយន្តនិងម៉ូតូច្រើនគ្រឿងចូលទន្លេ
-
ព័ត៌មានអន្ដរជាតិ១ ថ្ងៃ ago
មិនត្រឹមទឹកជំនន់ ពេលនេះ ទីក្រុងហាណូយ ចេញការព្រមានអំពីរន្ទះបាញ់ ថែមទៀត
-
ព័ត៌មានជាតិ១៤ ម៉ោង ago
ផុតពីព្យុះ យ៉ាកជី ព្យុះទី១៣ឈ្មោះ ប៊ីប៊ីនកា បានចូលមកបន្ត កម្ពុជា ក៏ត្រូវរងឥទ្ធិពលផងដែរចាប់ពីថ្ងៃទី១២ ដល់ទី១៤កញ្ញានេះ
-
ព័ត៌មានអន្ដរជាតិ៤ ថ្ងៃ ago
វៀតណាមជួបគ្រោះផ្ទួនៗ ព្យុះទីហ្វុងផងនិងរញ្ជួយដីផង
-
ព័ត៌មានអន្ដរជាតិ១ ថ្ងៃ ago
ថៃ ព្រមានឲ្យខេត្តចំនួន៤៨ រួមទាំងរាជធានីបាងកក ត្រូវប្រយ័ត្នគ្រោះទឹកជំនន់
-
ព័ត៌មានអន្ដរជាតិ៨ ម៉ោង ago
ទីក្រុង វៀងចន្ទន៍ ប្រកាសអាសន្នគ្រោះទឹកជំនន់ ខណៈទឹកទន្លេមេគង្គ ហក់ឡើងខ្ពស់
-
ព័ត៌មានអន្ដរជាតិ៥ ថ្ងៃ ago
វៀតណាម មានមនុស្សស្លាប់និងរបួសសរុប ៨២នាក់ ដោយឥទ្ធិពលព្យុះ យ៉ាកជី
-
ចរាចរណ៍១ សប្តាហ៍ ago
ចាប់វាយខ្នោះលោក ម៉ៃ សុគន្ធ បន្ទាប់ពីព្យាយាមបើករថយន្ដគេចពីសមត្ថកិច្ចរហូតបង្កគ្រោះថ្នាក់ចរាចរណ៍