ព័ត៌មានអន្ដរជាតិ

CNN ផ្សាយថា ពេលនេះតំបន់ហ្គាហ្សារកតែកន្លែងទំនេរកប់សពមិនមានផង

បានផុស

១២ ខែ មុន

នៅ

ថ្ងៃសុក្រ ៨ មីនា ២០២៤

ដោយ

ភ្លើងសង្គ្រាមវាយប្រហារគ្រប់ច្រកល្ហកទាំងអស់ពីសំណាក់កងកម្លាំងអ៊ីស្រាអែលមកលើតំបន់ហ្គាហ្សាក្នុងរយៈពេល ៥ ខែមកនេះបានបណ្ដាលឲ្យជនស៊ីវិលស្លូតត្រង់រាប់ម៉ឺននាក់ស្លាប់គរជើងគ្នា ហើយរកតែកន្លែងកប់សាកសពសឹងតែមិនមានផង ។ នេះបើយោងតាមការចេញផ្សាយរបស់សារពត៌មាន CNN កាលពីថ្ងៃទី៧ ខែមីនា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីបញ្ចុះសពនៅតំបន់ Deir al-Balah កណ្តាលតំបន់ហ្គាហ្សាត្រូវបានពង្រីកជាច្រើនដងមកហើយក្នុងប៉ុន្មានខែថ្មីៗនេះ ដើម្បីទុកដាក់សាកសពដែលស្លាប់ជាបន្តកន្ទុយគ្នា ខណៈពេលនេះគ្មានកន្លែងទំនេរសម្រាប់សាកសពទៀតនោះទេ ។

អ្នកកប់សពឈ្មោះ Saadi Baraka និយាយថា គាត់បានកប់មនុស្ស ១៦,៨៨០ នាក់ ចាប់តាំងពីអ៊ីស្រាអែលបានបើកការវាយប្រហាររបស់ខ្លួនលើតំបន់ហ្គាហ្សាជាការឆ្លើយតបទៅនឹងការវាយប្រហារថ្ងៃទី៧ ខែតុលារបស់ក្រុមហាម៉ាស ហើយតួលេខនេះច្រើនជាងពាក់កណ្តាលនៃសពសរុប ៣០,៦៣១ នាក់ដែលត្រូវបានរាយការណ៍ដោយក្រសួងសុខាភិបាលរបស់ប៉ាឡេស្ទីន ខណៈអ៊ីស្រាអែលប៉ាន់ស្មានថាក្នុងចំណោមនោះមានប្រហែល ១,០០០ នាក់ជាយុទ្ធជនហាម៉ាស ។

ប៉ុន្តែលោក Baraka ប៉ាន់ប្រមាណថា ប្រហែល ៨៥ ភាគរយនៃអ្នកដែលគាត់បានកប់គឺជាស្ត្រី និងកុមារ ហើយក្នុងចំណោមសាកសពរាប់ពាន់នាក់ដែលបានអូសចូលទីបញ្ចុះសពមានសពយុទ្ធជនហាម៉ាសមិនលើសពី ៣ នាក់នោះទេ ពោលផ្ទុយនឹងអ្វីដែលនាយករដ្ឋមន្ត្រីអ៊ីស្រាអែលលោក Benjamin Netanyahu លើកឡើងពាក់ព័ន្ធនឹងតួលេខសម្លាប់ក្រុមហាម៉ាស ។

បើយោងតាមអង្គការសុខភាពពិភពលោក (WHO) បានឲ្យដឹងថា ក្រៅពីការស្លាប់បាត់បង់ជីវិតក្រោមកណ្ដាប់ដៃវាយប្រហារពីសំណាក់កងកម្លាំងអ៊ីស្រាអែលហើយ ពលរដ្ឋប៉ាឡេស្ទីនជាច្រើននាក់ផ្សេងទៀតក៏កំពុងស្គមរីងរៃ និងឃ្លាតចាកលោក ដោយសារតែភាពអត់ឃ្លានផងដែរក្នុងភ្លើងសង្គ្រាមរយៈពេល ៥ ខែមកនេះ ៕