FBI តាមចាប់ខ្លួនចារបុរសអ៊ីរ៉ង់ ដែលកំពុងប្រមែប្រមូលគ្នីគ្នា ធ្វើឃាតមន្ត្រីអាមេរិក

តាមការចុះផ្សាយរបស់សារព័ត៌មាន Independent កាលពីថ្ងៃអង្គារទី៥ខែមីនា, FBI បានចេញការព្រមានថា ភ្នាក់ងារចារកម្មអ៊ីរ៉ង់ម្នាក់ កំពុងប្រមែប្រមូលគ្នានៅសហរដ្ឋអាមេរិក ដើម្បីឲ្យជួយសម្លាប់មន្ត្រីរដ្ឋាភិបាលរូបណា ដែលជាប់ពាក់ព័ន្ធក្នុងការធ្វើឃាតមេទ័ពកំពូលអ៊ីរ៉ង់ កាលពីខែមករាឆ្នាំ២០២០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេនៅចាំបានថា រដ្ឋបាលរបស់អតីតប្រធានាធិបតីអាមេរិក ដូណាល់ ត្រាំ បានសម្លាប់មេបញ្ជាការកងឆ្មាំបដិវត្តឥស្លាម (IRGC) ឧត្តមសេនីយ៍ Qassem Soleimani ហើយក្រោយមក ទីក្រុងតេហេរ៉ង់ បានគំរាមសងសឹកម្តងហើយម្តងទៀត។

នៅពេលនេះ ការិយាល័យ FBI ក្នុងទីក្រុង Miami បានបញ្ជាក់ក្នុងការបង្ហោះលើបណ្តាញសង្គម X ថា FBI កំពុងតាមចាប់ខ្លួនបុរសឈ្មោះ Majid Dastjani Farahani ដើម្បីសាកសួរសំណួរពាក់ព័ន្ធផែនការសម្លាប់មន្រ្តីអាមេរិក។ បុរសអាយុ៤១ឆ្នាំរូបនេះ បានធ្វើសកម្មភាពឬត្រូវបានគេសន្មត់ថា ធ្វើសកម្មភាពក្នុងនាមក្រសួងស៊ើបការណ៍សម្ងាត់និងសន្តិសុខអ៊ីរ៉ង់ ព្រោះថាគាត់បានជ្រើសរើសគ្នីគ្នាដើម្បីបើកប្រតិបត្តិការនៅសហរដ្ឋអាមេរិក។

មន្ត្រី FBI អះអាងថា ខ្លួនកំពុងធ្វើការទាំងយប់ទាំងថ្ងៃ និងយកចិត្តទុកដាក់ខ្លាំងបំផុតចំពោះករណីនេះ។

សូមបញ្ជាក់ជាថ្មី លោក Soleimani ត្រូវបានសម្លាប់ ក្នុងការវាយប្រហារដោយយន្តហោះគ្មានមនុស្សបើករបស់សហរដ្ឋអាមេរិក នៅជិតអាកាសយានដ្ឋានអន្តរជាតិទីក្រុងបាកដាដ ពេលធ្វើដំណើរទៅជួបជាមួយលោក Adil Abdul-Mahdi ដែលជាអតីតនាយករដ្ឋមន្ត្រីអ៊ីរ៉ាក់។

ពេលនោះ ទីក្រុងវ៉ាស៊ីនតោននិយាយថា លោក Soleimani ជាអ្នកបញ្ជាដោយផ្ទាល់ឲ្យវាយប្រហារលើទីតាំងការទូតនិងយោធារបស់សហរដ្ឋអាមេរិក ក្នុងប្រទេសអ៊ីរ៉ាក់និងស៊ីរី។

ក្រោយការធ្វើឃាតនោះ មន្ត្រីអ៊ីរ៉ង់ជាច្រើន បានប្រកាសដោយបើកចំហ អំពីការសងសឹកហើយឈានដល់ការគំរាមសម្លាប់លោក ត្រាំ និងមេដឹកនាំសហរដ្ឋអាមេរិកផ្សេងទៀតដូចជាអតីតរដ្ឋមន្ត្រីការបរទេស Mike Pompeo និងមេបញ្ជាការយោធាដែលពាក់ព័ន្ធនឹងការធ្វើឃាតនោះទៀតផង៕

អត្ថបទ៖ សុខ សុវណ្ណ

ចុចអាន៖ FBI៖ អ៊ីរ៉ង់ រៀបផែនការធ្វើឃាតមន្ត្រីអាមេរិក