ជប៉ុន ត្រូវការពលករបរទេសដល់ ៨០ ម៉ឺននាក់ក្នុងរយៈពេល ៥ ឆ្នាំខាងមុខ

ជប៉ុនគ្រោងនឹងបង្កើនការទទួលយកពលករបរទេសដែលមានជំនាញស្របច្បាប់រហូតដល់ ៨០ ម៉ឺននាក់ក្នុងរយៈពេល ៥ ឆ្នាំខាងមុខ ដើម្បីបំពេញចន្លោះប្រហោងទៅនឹងបញ្ហាកង្វះកម្លាំងពលកម្មទ្រង់ទ្រាយធំនៅក្នុងប្រទេស ។ នេះបើយោងតាមការចេញផ្សាយដោយសារព័ត៌មាន Kyodo កាលពីថ្ងៃទី៥ ខែមីនា ។

ប្រភពព័ត៌មានបានឲ្យដឹងទៀតថា តួលេខដែលរដ្ឋាភិបាលជប៉ុនគ្រោងនឹងសម្រេចអនុវត្ត ចាប់ពីខែមេសាឆ្នាំនេះតទៅ គឺច្រើនជាងទ្វេដងនៃចំនួនពលករបរទេសសរុប ៣៤៥,១៥០ នាក់ដែលមកហោះមកធ្វើការនៅជប៉ុនគិតត្រឹមដើមខែមីនា ខណៈកាលពីចុងខែវិច្ឆិកាឆ្នាំ ២០២៣ មានពលករបរទេសប្រមាណ ២០ ម៉ឺននាក់ធ្វើការជាកម្មករជំនាញកម្រិត ១ លើការងារចំនួន ១២ វិស័យដូចជា សំណង់ និងកសិកម្មក្នុងរយៈពេល ៥ ឆ្នាំនៅលើទឹកដីនៃប្រទេសជប៉ុន ។

ពាក់ព័ន្ធនឹងបញ្ហានេះទៀតសោត រដ្ឋាភិបាលរំពឹងថា ជប៉ុននឹងត្រូវការកម្មករប្រហែល ៣៤,០០០ នាក់ដាក់ឲ្យធ្វើការនៅក្នុងវិស័យថ្មីចំនួន ៤ ដូចជា ផ្នែកដឹកជញ្ជូនតាមផ្លូវថ្នល់ ផ្លូវដែក ដាំដើមឈើ និងឧស្សាហកម្មកែច្នៃឈើជាដើម ប៉ុន្តែដំណាក់ការទាំងនេះកំពុងស្ថិតក្នុងការពិចារណាថ្លឹងថ្លែងនៅឡើយ ។

ក្នុងនោះពលករប្រមាណ ២៤,៥០០ នាក់អាចនឹងធ្វើការនៅក្នុងឧស្សាហកម្មដឹកជញ្ជូនផ្លូវគោកដូចជា អ្នកបើកតាក់ស៊ី រថយន្តក្រុង និងរថយន្តដឹកទំនិញ ដែលជាវិស័យមួយកំពុងប្រឈមមុខនឹងកង្វះកម្លាំងពលកម្មខ្លាំង ។ ចំណែកឧស្សាហកម្មផ្លូវដែករំពឹងនឹងមានកម្មករចំនួន ៣,៨០០ នាក់ ខណៈដែលពលករបរទេស ៦,០០០ នាក់ អាចនឹងចូលធ្វើការក្នុងវិស័យព្រៃឈើ ។

គួរបញ្ជាក់ថា ប្រទេសជប៉ុនប្រឈមនឹងកង្វះកម្លាំងពលកម្មធ្ងន់ធ្ងរ ដោយសារតែប្រជាជនរបស់ប្រទេសមហាអំណាចលំដាប់ទី ៤ មួយនេះ មានវ័យចំណាស់ស្ទើរតែពាក់កណ្តាលប្រទេសទៅហើយ ហើយកង្វះកម្លាំងពលកម្មភាគច្រើនគឺនៅក្នុងឧស្សាហកម្មសណ្ឋាគារ ស្របពេលដែលចំនួនអ្នកទេសចរទៅកាន់ទស្សនាជប៉ុនក៏ងើបឡើងវិញដល់ជាង ៦០ ភាគរយនៃកម្រិតមុនរោគរាតត្បាតកូវីដ ១៩ ៕

ដោយ ៖ សុខ ជីវ័ន្ត

ចុចអាន ៖ តើឆ្នាំនេះ ចិន នឹងជះលុយចាយលើវិស័យការពារជាតិប៉ុន្មានរយពាន់លាន ដុល្លារ?