ព័ត៌មានអន្ដរជាតិ

រកឃើញផ្នូរបុរាណដ៏ធំនៅ អាល្លឺម៉ង់ មានគ្រោងឆ្អឹងមនុស្ស ១ ពាន់នាក់

បានផុស

១ year មុន

នៅ

ថ្ងៃសុក្រ ៨ មីនា ២០២៤

ដោយ

ក្រុមអ្នកបុរាណវត្ថុវិទូបានរកឃើញផ្នូរដ៏ធំបំផុតដែលមិនធ្លាប់មានពីមុនមកនៅក្នុងទ្វីបអឺរ៉ុប ហើយទីតាំងមួយកន្លែងនោះគឺនៅភាគខាងត្បូងប្រទេសអាល្លឺម៉ង់ ។ នេះបើយោងតាមការចេញផ្សាយរបស់សារពត៌មាន CNN កាលពីថ្ងៃទី៧ ខែមីនា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមអ្នកបុរាណវិទូបានរកឃើញគ្រោងឆ្អឹងជនរងគ្រោះដែលស្លាប់ ដោយសារជំងឺអាសន្នរោគប៉េស្តប្រហែល ១,០០០ នាក់ក្នុងផ្នូរដ៏ធំនៅកណ្តាលទីក្រុង Nuremberg ដែលអ្នកជំនាញជឿថា អាចមានមនុស្សសរុបជាង ១,៥០០ នាក់ឯណោះ ខណៈគ្រោងឆ្អឹងទាំងនេះត្រូវបានគេរកឃើញ ក្នុងអំឡុងពេលការសិក្សាស្រាវជ្រាវបុរាណវិទ្យា មុនការសាងសង់អគារលំនៅឋានថ្មីក្នុងទីក្រុងនេះ ។

លោកស្រី Melanie Langbein មកពីនាយកដ្ឋានសម្រាប់ការអភិរក្សបេតិកភណ្ឌរបស់ទីក្រុង Nuremberg បានប្រាប់ CNN ថា រណ្តៅកប់សាកសពអ្នកស្លាប់ ដោយសារជំងឺអាសន្នរោគប៉េស្តចំនួន ៨ ត្រូវបានកំណត់អត្តសញ្ញាណ ដែលនីមួយៗមានសាកសពរាប់រយនាក់ ។

លោកស្រីបន្ថែមថា មនុស្សទាំងនេះ មិនត្រូវបានកប់នៅក្នុងទីបញ្ចុះសពធម្មតាទេ ទោះបីជាមានកន្លែងបញ្ចុះសពនៅទីក្រុង Nuremberg ក៏ដោយ ប្រហែលជាដោយសារតែមានចំនួនអ្នកស្លាប់ច្រើនពេក ដូច្នេះការបញ្ចុះសពបែបនេះគឺប្រើពេលខ្លី ។

ស្របពេលជាមួយគ្នានេះ យោងតាមការស្រាវជ្រាវបានឲ្យដឹងថា ទីក្រុង Nuremberg ជារឿយៗតែងតែទទួលរងនូវការផ្ទុះជំងឺប៉េស្តប្រហែលរៀងរាល់ ១០ ឆ្នាំម្តង ចាប់ពីសតវត្សទី ១៤ មកម្ល៉េះ ដែលធ្វើឲ្យវាក្លាយជាបញ្ហាប្រឈមមួយដើម្បីកំណត់កាលបរិច្ឆេទនៃសគ្រោងឆ្អឹងទាំងនេះ ។

ប៉ុន្តែក្រុមអ្នកបុរាណវិទូក៏បានរកឃើញកំណត់ត្រាមួយពីឆ្នាំ ១៦៣៤ ដែលរៀបរាប់លម្អិតអំពីការផ្ទុះជំងឺប៉េស្តដ៏អាក្រក់ដែលបានសម្លាប់មនុស្សជាង ១៥,០០០ នាក់ក្នុងចន្លោះឆ្នាំ ១៦៣២-១៦៣៣ ដែលនិយាយថា មនុស្សជិត ២,០០០ នាក់ត្រូវបានកប់នៅជិតតំបន់ St. Sebastian Spital ដែលជាទីតាំងនៃការធ្វើកំណាយបច្ចុប្បន្ននេះ ។

គួរបញ្ជាក់ថា ការរកឃើញនេះនឹងផ្ដល់នូវគំរូសំណាកដែលកើតមានជាដំណាក់កាលនៃសង្គមនីមួយៗ ដោយអនុញ្ញាតឲ្យក្រុមអ្នកបុរាណវិទូអាចសិក្សាស្វែងយល់បន្ថែមពីលក្ខណៈរស់នៅរបស់ប្រជាជននាសម័យកាលនោះ ៕