ថៃ ព្រមានឲ្យប្រយ័ត្នជំងឺឈាមខ្មៅ ព្រោះនៅឡាវ មានករណីឆ្លងមកមនុស្សហើយ

Bangkok Post ចុះផ្សាយកាលពីថ្ងៃអាទិត្យទី១០ខែមីនាថា នាយកដ្ឋានអភិវឌ្ឍន៍បសុសត្វ នៃប្រទេសថៃ បានព្រមានដល់អ្នកចិញ្ចឹមគោក្របី ឲ្យប្រុងប្រយ័ត្នចំពោះជំងឺឈាមខ្មៅ បន្ទាប់ពីជនជាតិឡាវ៣នាក់ រស់នៅក្នុងខេត្តចំប៉ាសក្តិ ភាគខាងត្បូងប្រទេសឡាវ បានធ្លាក់ខ្លួនឈឺ ក្រោយបរិភោគសាច់គោឆៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីលោក Somchuan Ratanamungklanon អគ្គនាយកនៃនាយកដ្ឋានខាងលើ, ពាក់ព័ន្ធបញ្ហានេះ មន្ត្រីបសុសត្វដែលមានមូលដ្ឋាននៅខេត្តភាគឦសានជាប់ព្រំដែនជាមួយឡាវ ត្រូវណែនាំឲ្យរៀបចំយុទ្ធនាការចាក់វ៉ាក់សាំងដល់សត្វគោក្របីរួចហើយ។

លោកបន្ថែមថា អ្នកចិញ្ចឹមគោក្របី ក៏ត្រូវបានណែនាំឲ្យរាយការណ៍ជាបន្ទាន់ដល់មន្ត្រីបសុសត្វនៅក្នុងមូលដ្ឋានរបស់ខ្លួនផងដែរ ប្រសិនបើគោ ក្របី ពពែឬចៀម ឈឺនិងងាប់លឿន ហើយកុំប៉ះពាល់ ឬយកសាច់ទៅចម្អិនឲ្យសោះ រង់ចាំអាជ្ញាធរចុះទៅពិនិត្យសិន។

ស្របពេលជាមួយគ្នានោះដែរ អ្នកនាំពាក្យរងនៃវិមានរដ្ឋាភិបាលថៃកញ្ញា Kaenika Oonchit និយាយថា មន្ត្រីនៅមណ្ឌលចក្តាឡីស័កសត្វតាមព្រំដែនថៃ-ឡាវ ត្រូវបានបញ្ជាឲ្យពង្រឹងការគ្រប់គ្រងសណ្តាប់ធ្នាប់ ដើម្បីការពារការរត់ពន្ធគោក្របី ពពែ ឬចៀម ឬសាច់ចូលទៅក្នុងប្រទេសថៃ។

សូមបញ្ជាក់ ឈាមខ្មៅ គឺជាជំងឺឆ្លងធ្ងន់ធ្ងរដែលបណ្តាលមកពីបាក់តេរី Bacillus anthracis។ វាកើតឡើងដោយធម្មជាតិនៅក្នុងដី ហើយជាទូទៅប៉ះពាល់ដល់សត្វក្នុងស្រុក និងសត្វព្រៃ។

មនុស្សអាចឆ្លងជំងឺនេះតាមរយៈការប៉ះពាល់ផ្ទាល់ ឬដោយប្រយោលជាមួយសត្វឈឺ។ ទោះបីជាយ៉ាងណាក៏ដោយ មិនមានព័ស្តុតាងណាមួយបង្ហាញថា ជំងឺឈាមខ្មៅ អាចចម្លងពីមនុស្សទៅមនុស្សបានទេ។

រោគ​សញ្ញាជំងឺនេះមានដូចជាចេញពងបែក​តូចៗ ឈឺក្បាល រាគ​ ​និងដង្ហើម​ខ្លី ហើយរោគសញ្ញានឹងចេញក្រោយការឆ្លង២ខែ។ បើមិនមានការព្យាបាលទាន់ពេលទេ មនុស្សអាចស្លាប់បាន៕

អត្ថបទ៖ សុខ សុវណ្ណ

ចុចអាន៖ ថៃ ជួបព្យុះរដូវប្រាំង បណ្តាលឲ្យអាកាសធាតុ ក្តៅហែង