ទូត EU និងប្រទេស ២ ទៀតចាប់ផ្ដើមជម្លៀសក្រុមការងារចេញពី ហៃទី ដែលកំពុងផ្ទុះអំពើហិង្សា

ស្ថានទូតអាមេរិក អាល្លឺម៉ង់ និងសហភាពអឺរ៉ុប ចាប់ផ្តើមជម្លៀសបុគ្គលិក​ចេញ​ពី​ប្រទេស​ហៃទី ខណៈ​ប្រទេស​នេះ​បន្ត​ឈាន​ទៅ​រក​អំពើ​ហិង្សាកាន់តែក្ដៅគគុក​ដោយក្រុម​ក្មេង​ទំនើង ។ នេះបើយោងតាមការចេញផ្សាយរបស់សារព័ត៌មាន BBC កាលពីថ្ងៃទី​១០ ខែមីនា ។

ស្ថានទូតអាមេរិកបានបង្ហោះនៅលើប្រព័ន្ធផ្សព្វផ្សាយសង្គមថា អំពើហិង្សាកាន់តែខ្លាំងឡើងនៅក្នុងសង្កាត់ក្បែរបរិវេណស្ថានទូតអាមេរិក និងនៅជិតអាកាសយានដ្ឋានបាននាំឲ្យក្រសួងការបរទេសសម្រេចជម្លៀសបុគ្គលិកស្ថានទូតចេញពីប្រទេសមួយនេះ ។

ស្របពេលជាមួយគ្នានេះ អាមេរិកក៏បានបង្កើនសន្តិសុខនៅក្នុងបេសកកម្មជម្លៀសរបស់ពួកគេនៅក្នុងរដ្ឋធានី Port-au-Prince ផងដែរ ខណៈស្ថានទូតអាល្លឺម៉ង់ និងសហភាពអឺរ៉ុបក៏ចាប់ផ្តើមជម្លៀសបុគ្គលិករបស់ខ្លួនបណ្ដើរៗដូចគ្នា ។

ក្រុមក្មេងទំនើងបានបង្កើនការវាយប្រហារ នៅពេលដែលលោកនាយករដ្ឋមន្ត្រី Ariel Henry បានចាកចេញទៅកាន់កិច្ចប្រជុំកំពូលក្នុងតំបន់កាលពីសប្តាហ៍មុន ហើយក្រុមនេះបានទាញយកផលប្រយោជន៍ពីការអវត្តមានរបស់នាយករដ្ឋមន្ត្រី ដើម្បីបញ្ចេញការវាយប្រហាររួមគ្នាជាបន្តបន្ទាប់ក្នុងគោលបំណងជំរុញឲ្យមានការដកលោកចេញពីតំណែង ។

ក្នុងចំណោមគោលដៅរបស់ពួកគេ គឺព្រលានយន្តហោះដើម្បីរារាំងលោក Henry ពីការហោះហើរត្រឡប់មកវិញ និងពន្ធនាគារចំនួន ២ ដែលពួកគេបានដោះលែងអ្នកទោសរាប់ពាន់នាក់ សម្លាប់មន្ត្រីនគរបាលចំនួន ៦ នាក់ ខណៈអគារមួយចំនួនទៀតក៏ត្រូវបានបំផ្លាញផងដែរ ។

ទន្ទឹមនោះ លោក Henry បានព្យាយាមហោះហើរត្រឡប់ទៅទីក្រុង Port-au-Prince វិញនៅថ្ងៃអង្គារ ប៉ុន្តែបែជាត្រូវទៅចុះចតនៅក្នុងទឹកដី Puerto Rico ជំនួសវិញ ព្រោះតែព្រលានយន្តហោះអន្តរជាតិរបស់ខ្លួនត្រូវបានបិទដោយសារការវាយប្រហារ ។

គួរបញ្ជាក់ថា អំពើ​ហិង្សា​នេះ​បាន​ធ្វើ​ឲ្យ​វិបត្តិ​មនុស្សធម៌​របស់​ប្រទេស​ហៃទី​កាន់តែ​យ៉ាប់យ៉ឺន​ទៅ​ៗ ខណៈយោងតាមអង្គការអន្តរជាតិសម្រាប់ការធ្វើចំណាកស្រុក (IOM) ភាពចលាចលនេះបានធ្វើឲ្យជនជាតិហៃទី ៣៦២,០០០ នាក់ត្រូវបានផ្លាស់ទីលំនៅ ហើយច្រើនជាងពាក់កណ្តាលនៃពួកគេគឺជាកុមារ ៕

អត្ថបទ ៖ ប៊ុន សុភាព