ថៃ រឹបអូសថ្នាំញៀន ក្នុងចំនួនបំបែកកំណត់ត្រា ជិត២០លានគ្រាប់

តាមការចុះផ្សាយរបស់ Bangkok Post, ប៉ូលិសនិងកម្លាំងទាហានប៉ារ៉ាក្នុងខេត្ត Nakhon Sawan, Lampang និង Chiang Rai កាលពីថ្ងៃចន្ទទី១១ខែមីនា បានរឹបអូសថ្នាំញៀនមេតំហ្វេតាមីនក្នុងចំនួនបំបែកកំណត់ត្រា ជិត២០លានគ្រាប់ ខណៈថ្នាំញៀននៅតែបន្តហូរចូលប្រទេសថៃ ពីមីយ៉ាន់ម៉ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងស្រុក Phayuha Khiri នៃខេត្ត Nakhon Sawan ប៉ូលិសដែលគ្រប់គ្រងប៉ុស្តិ៍ត្រួតពិនិត្យមួយ បានឃាត់និងឆែកឆេររថយន្តដឹកបន្លែមួយគ្រឿងព្រោះសង្ស័យមានផ្ទុកសារធាតុញៀនខុសច្បាប់។

ក្រោយមក រថយន្តត្រូវបានបញ្ជូនទៅការិយាល័យនគរបាលចរាចរណ៍ផ្លូវគោក ដើម្បីពិនិត្យកាំរស្មីអ៊ិច ជាលទ្ធផលរកឃើញថា មានថង់ដាក់ថ្នាំ មេតំហ្វេតាមីនប្រមាណ​១០​លាន​គ្រាប់លាក់ទុកក្នុងបន្លែ។ 

ដោយឡែកការ​រឹបអូសនៅខេត្ត Lampang ឯណោះវិញ ប៉ូលិស​ស្រុក Thoen បាន​រក​ឃើញ​រថយន្ត​ដឹក​អ្នក​ដំណើរ​មួយ​គ្រឿង ត្រូវគេទុក​ចោល​ក្នុង​បរិវេណ​ប្រាសាទ Huey Ko Luang ក្រោយ​ទទួល​ព័ត៌មាន​ថា រថយន្ត​ជួលសង្ស័យដឹក​ជញ្ជូន​សារធាតុ​ញៀន​​នឹង​ឆ្លង​កាត់ស្រុកនេះ តាមផ្លូវឆ្ពោះទៅភូមិភាគកណ្តាល។ ជាលទ្ធផល ការ​ឆែកឆេរ​រថយន្ត បាន​រក​ឃើញ​ថ្នាំ​ញៀន​មេ​តំ​ហ្វេ​តា​មីន​ចំនួន​៥​លាន​គ្រាប់។

រីឯការរឹបអូសនៅកន្លែងទីបី, មន្ត្រីយោធាបានប៉ះទង្គិចជាមួយក្រុមប្រដាប់អាវុធ ដែលជួញដូរគ្រឿងញៀននៅជិតព្រំដែនថៃ-មីយ៉ាន់ម៉ា ជិតភូមិមួយក្នុងស្រុក Mae Fah Luang នៃខេត្ត Chiang Rai។

ក្រុមនេះ បានរត់គេចខ្លួនពីកន្លែងកើតហេតុ បន្ទាប់ពីផ្ទុះអាវុធមួយប្រាវ ប៉ុន្តែមានមនុស្សស្លាប់ម្នាក់និងបន្សល់ទុកកាបូបស្ពាយចំនួន៤ មានថ្នាំញៀនមេតំហ្វេតាមីនចំនួន៤៥០ ០០០គ្រាប់។

ស្របពេលជាមួយគ្នានោះ នៅខេត្ត Nakhon Si Thammarat ភាគខាងត្បូង ប៉ូលិសនិយាយថា ចាប់តាំងពីបើកប្រតិបត្តិការបង្ក្រាបគ្រឿងញៀនកាលពីថ្ងៃទី ១៥ ខែកុម្ភៈមក ពួកគេរឹបអូសបានថ្នាំមេតំហ្វេតាមីនប្រមាណ ៨ លានគ្រាប់ ខេតាមីន ២៥ ៣១០ គ្រាប់ និងប្រាក់ប្រហែល ១.២ លានបាត៕

អត្ថបទ៖ សុខ សុវណ្ណ

ចុចអាន៖ បង្ក្រាបទីតាំងខារ៉ាអូខេ «ជីនឌានហ្ស៊ីយី» ឃាត់ខ្លួនមនុស្សជិត៩០នាក់ ពាក់ព័ន្ធករណីគ្រឿង​ញៀន