ព័ត៌មានអន្ដរជាតិ

អាមេរិក ប្រកាសផ្តល់ជំនួយសព្វាវុធ ៣០០លានដុល្លារដល់អ៊ុយក្រែន យ៉ាងភ្ញាក់ផ្អើល

បានផុស

១១ ខែ មុន

នៅ

ថ្ងៃពុធ ១៣ មីនា ២០២៤

ដោយ

សេតវិមានប្រកាសថា សហរដ្ឋអាមេរិក នឹងបញ្ជូនជំនួយសព្វាអាវុធក្នុងទំហំទឹកប្រាក់៣០០លានដុល្លារទៅឲ្យអ៊ុយក្រែន ដែលនេះគឺជាសេចក្តីប្រកាសដ៏គួរឲ្យភ្ញាក់ផ្អើលបំផុត ព្រោះថា វិក្កយបត្របញ្ជូនជំនួយបន្ថែមទៀតដល់ទីក្រុងកៀវ កំពុងជជែកដេញដោលនិងជាប់គាំងក្នុងសភានៅឡើយ។ នេះបើតាមការចុះផ្សាយរបស់ Reuters នៅថ្ងៃពុធទី១៣ខែមីនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីក្រុងវ៉ាស៊ីនតោន ការផ្តល់ជំនួយគ្រាប់កាំភ្លើង រ៉ុកកែត និងមីស៊ីលប្រឆាំងយន្តហោះជាលើកដំបូងក្នុងរយៈពេលជិតបីខែមកនេះ គឺមានគោលបំណងទប់អ៊ុយក្រែន មិនឲ្យបាត់បង់ទឹកដីបន្ថែមទៀតទៅដៃរុស្ស៊ី។

ទោះបីជាយ៉ាងណាក៏ដោយ ទីប្រឹក្សាសន្តិសុខជាតិអាមេរិក លោក Jake Sullivan អះអាងថា ជំនួយនេះ មិនអាចបំពេញតម្រូវការសមរភូមិរបស់អ៊ុយក្រែនបានទាំងស្រុងទេ។ គ្រឿងសឹកទាំងនេះ នឹងជួយអ៊ុយក្រែនបានត្រឹមរយៈពេលខ្លីប៉ុណ្ណោះ។

ទីប្រឹក្សាសន្តិសុខជាតិអាមេរិក លោក Jake Sullivan (រូបថត៖ AFP)

នារយៈពេលប៉ុន្មានខែមកនេះ សេតវិមាន បានអំពាវនាវម្តងហើយម្តងទៀតទៅកាន់សភា ឲ្យអនុម័តកញ្ចប់ថវិកា ដែលនឹងបញ្ជូនជំនួយទៅអ៊ុយក្រែន ក៏ដូចជាអ៊ីស្រាអែល និងតៃវ៉ាន់ផងដែរ។ វិក្កយបត្រជំនួយទឹកប្រាក់៦០ពាន់លានដុល្លារ បានអនុម័តពីព្រឹទ្ធសភារួចហើយ ប៉ុន្តែមិនទាន់ឆ្លងការបោះឆ្នោតក្នុងរដ្ឋសភា នៅឡើយទេ។

មកទល់ពេលនេះ ប្រធានរដ្ឋសភាលោក ម៉ាយ ចនសុន ដែលជាសម្ព័ន្ធមិត្តរបស់លោក ដូណាល់ ត្រាំ បានបដិសេធពិចារណាលើសេចក្តីព្រាងច្បាប់ព្រឹទ្ធសភា ដោយរក្សាជំហរថា សភានឹងបោះឆ្នោតលើវិក្កយបត្រជំនួយរបស់ខ្លួន លុះត្រាតែសមាជ អនុម័តថវិកាយកទៅជួសជុលប្រព័ន្ធអន្តោប្រវេសន៍របស់សហរដ្ឋអាមេរិក ជាមុនសិន។

សេចក្តីប្រកាសជំនួយចុងក្រោយនេះ កើតឡើងចំពេលលោក ចូ បៃដិន ស្វាគមន៍ប្រធានាធិបតីនិងនាយករដ្ឋមន្ត្រីប៉ូឡូញ នៅសេតវិមាន ដើម្បីបង្ហាញការគាំទ្រសម្រាប់អ៊ុយក្រែន ហើយនៅថ្ងៃដដែលនោះ ប្រទេសដាណឺម៉ាក ក៏បានប្រកាសដែរថា ខ្លួននឹងបញ្ជូនអាវុធព្រមទាំងកាំភ្លើងធំក្នុងទំហំទឹកប្រាក់ប្រមាណ ៣៣៦ លានដុល្លារទៅឲ្យអ៊ុយក្រែន។

សូមបញ្ជាក់ថា គិតត្រឹមពេលនេះ សហរដ្ឋអាមេរិក បានសន្យាផ្តល់ជំនួយសន្តិសុខទឹកប្រាក់ជាង៤៤.៩ពាន់លានដុល្លារហើយ ដល់អ៊ុយក្រែន ចាប់តាំងពីរដ្ឋបាលលោក បៃដិន ចូលកាន់តំណែង ដោយក្នុងនោះរួមទាំងជំនួយ៤៤.២ពាន់លានដុល្លារផងដែរ ចាប់តាំងពីរុស្ស៊ី បើកការវាយលុកពេញទំហឹងនៅថ្ងៃទី២៤ខែកុម្ភៈឆ្នាំ២០២២៕

អត្ថបទ៖ សុខ សុវណ្ណ

ចុចអាន៖ រុស្ស៊ី ថា លោក Macron “កំសាក” មិនហ៊ានធ្វើទស្សនកិច្ច នៅអ៊ុយក្រែន