រុស្ស៊ី ដាក់លក្ខខណ្ឌ ចរចាសន្តិភាពជាមួយ អ៊ុយក្រែន

ប្រធានាធិបតីរុស្ស៊ី លោក វ្ល៉ាឌីមៀរ ពូទីន និយាយថា ទីក្រុងមូស្គូ ត្រៀមខ្លួនរួចជាស្រេចសម្រាប់កិច្ចចរចាដើម្បីបញ្ចប់សង្គ្រាមនៅអ៊ុយក្រែន ប៉ុន្តែលក្ខខណ្ឌគឺថា កិច្ចចរចានឹងប្រព្រឹត្តទៅបានលុះត្រាតែខ្លួន ទទួលបានការធានាផ្នែកសន្តិសុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសជាមួយ RIA Novosti ដែលចេញផ្សាយនៅថ្ងៃពុធទី១៣ខែមីនា លោក ពូទីន បានរំលឹកឡើងវិញនូវឆន្ទៈរបស់រុស្ស៊ី ក្នុងការដោះស្រាយជម្លោះនេះដោយសន្តិភាព។ លោកពូទីននិយាយថា “ក្នុងករណីនេះ យើងចាប់អារម្មណ៍ខ្លាំងបំផុត លើសន្តិសុខរបស់រុស្ស៊ី។ យើងនឹងផ្តើមពីរឿងនេះ”។

នៅពេលសួរថាតើ កិច្ចព្រមព្រៀងយុត្តិធម៌ជាមួយលោកខាងលិច អាចទៅរួចឬទេ? លោកពូទីនឆ្លើយទាំងគ្មានស្ទាក់ស្ទើរថា “ខ្ញុំមិនទុកចិត្តនរណាម្នាក់ឡើយ ប៉ុន្តែយើងត្រូវការការធានា។ គ្មានភាពចាំបាច់ត្រូវប្រើប្រាស់អាវុធនុយក្លេអ៊ែរយុទ្ធសាស្ត្រឡើយ ក្នុងសង្រ្គាមនៅអ៊ុយក្រែន”។

ទោះបីជាយ៉ាងណាក៏ដោយ លោកក៏ព្រមានដែរ! ប្រទេសណាដែលប្រកាសថា ពួកគេមិនមានបន្ទាត់ក្រហមចំពោះរុស្ស៊ី គួរតែយល់ហើយថា រុស្ស៊ីនឹងឆ្លើយតបតាមរបៀបដូចគ្នា។

សូមបញ្ជាក់ ការលុកលុយរបស់រុស្ស៊ីនៅអ៊ុយក្រែន ឥឡូវបានឈានដល់ឆ្នាំទី៣ហើយ ខណៈកងកម្លាំងរបស់លោក ពូទីន កាន់តែរុលទៅមុខជាលំដាប់ រីឯរដ្ឋាភិបាលក្នុងទីក្រុងកៀវ នៅតែតស៊ូដើម្បីទប់ទល់ ដោយពឹងផ្នែកខ្លាំងបំផុតទៅលើជំនួយរបស់អាមេរិកនិងអឺរ៉ុប។

កាលពីថ្ងៃទី១២ខែមីនា សេតវិមានបានប្រកាសកញ្ចប់ជំនួយយោធាទំហំទឹកប្រាក់ ៣០០លានដុល្លារអាមេរិក ដល់អ៊ុយក្រែន បើទោះបីជាការអំពាវនាវរបស់លោកប្រធានាធិបតី ចូ បៃដិន សុំជំនួយជាង៦០ពាន់លានដុល្លារ នៅតែជាប់គាំងក្នុងសភា ដោយសារជម្លោះជាមួយគណបក្សសាធារណរដ្ឋក៏ដោយ។

គិតត្រឹមពេលនេះ សហរដ្ឋអាមេរិក បានសន្យាផ្តល់ជំនួយសន្តិសុខទឹកប្រាក់ជាង៤៤.៩ពាន់លានដុល្លារហើយ ដល់អ៊ុយក្រែន ចាប់តាំងពីរដ្ឋបាលលោក បៃដិន ចូលកាន់តំណែង ដោយក្នុងនោះរួមទាំងជំនួយ៤៤.២ពាន់លានដុល្លារផងដែរ ចាប់តាំងពីរុស្ស៊ី បើកការវាយលុកពេញទំហឹងនៅថ្ងៃទី២៤ខែកុម្ភៈឆ្នាំ២០២២៕

អត្ថបទ៖ សុខ សុវណ្ណ

ចុចអាន៖ លោក ពូទីន ប្រកាស ត្រៀមបញ្ឆេះសង្គ្រាមនុយក្លេអ៊ែរ