Alibaba គ្រោងវិនិយោគ ១.១ ពាន់លានដុល្លារនៅ កូរ៉េខាងត្បូង

ក្រុមហ៊ុន Alibaba Group គ្រោងនឹងវិនិយោគចំនួន ១.១ ពាន់លានដុល្លារដើម្បីសាងសង់មជ្ឈមណ្ឌលដឹកជញ្ជូន និងពង្រីកអាជីវកម្មនៅប្រទេសកូរ៉េខាងត្បូងក្នុងរយៈពេល ៣ ឆ្នាំខាងមុខ ។ នេះបើយោងតាមសារព័ត៌មានកូរ៉េខាងត្បូង Yonhap ចេញផ្សាយកាលពីថ្ងៃទី​១៤ ​​ខែមីនាកន្លងទៅ ។

របាយការណ៍បាននិយាយថា ក្រុមហ៊ុនពាណិជ្ជកម្មអេឡិចត្រូនិកយក្សរបស់ចិនមួយនេះគ្រោងនឹងចំណាយប្រាក់ ២០០ លានដុល្លារនៅឆ្នាំនេះលើការសាងសង់មជ្ឈមណ្ឌលដឹកជញ្ជូន និង ១០០ លានដុល្លារដើម្បីជួយក្រុមហ៊ុនកូរ៉េខាងត្បូងខ្នាតតូច និងមធ្យមលក់ផលិតផលរបស់ពួកគេនៅក្រៅប្រទេស ។​ ទោះយ៉ាងណា Alibaba មិន​បាន​ឆ្លើយ​តប​ភ្លាមៗ​ចំពោះ​សំណើ​សុំ​ការ​អត្ថាធិប្បាយ​របស់ Reuters នោះទេ ។

កាលពីដើមខែនេះ អ្នកឃ្លាំមើលការការពារទិន្នន័យផ្ទាល់ខ្លួនរបស់កូរ៉េខាងត្បូងបាននិងកំពុងពិនិត្យមើលការអនុវត្តទិន្នន័យអ្នកប្រើប្រាស់នៃវេទិកាទិញទំនិញក្រៅប្រទេសសំខាន់ៗ រួមទាំង Aliexpress របស់ Alibaba ផងដែរ ។

គួរបញ្ជាក់ថា AliExpress ដែលជាវេទិកាពាណិជ្ជកម្មអេឡិចត្រូនិករបស់ Alibaba បានស្ថិតនៅក្រោមការត្រួតពិនិត្យនៅក្នុងប្រទេសកូរ៉េខាងត្បូងជុំវិញការតវ៉ារបស់អ្នកប្រើប្រាស់ ។ បើយោងតាមទិន្នន័យរបស់រដ្ឋាភិបាលបានឲ្យដឹងថា ចំនួនអ្នកប្រើប្រាស់ AliExpress នៅក្នុងប្រទេសកូរ៉េខាងត្បូងបានកើនឡើងទ្វេដងដល់ ៧.១៨ លាននាក់នៅក្នុងខែកុម្ភៈពី ៣.៣៦ លាននាក់ក្នុងឆ្នាំ ២០២២ ៕

អត្ថបទ ៖ ប៊ុន សុភាព