ជនចំណាកស្រុក ៦០ នាក់ស្លាប់បាត់បង់ជីវិតនៅសមុទ្រមេឌីទែរ៉ាណេ

អ្នកនៅរស់រានមានជីវិតពីការជួយសង្គ្រោះបានឲ្យដឹងថា យ៉ាងហោចណាស់មានជនចំណាកស្រុកចំនួន ៦០ នាក់បានស្លាប់បាត់បង់ជីវិតក្នុងសមុទ្រមេឌីទែរ៉ាណេ ។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី​១៥​ ខែ​ មីនា​នេះ ។

អ្នកនៅរស់រានមានជីវិតទាំងនោះមានចំនួន ២៥ នាក់ ហើយត្រូវបានស្រង់ឡើងដោយនាវា Ocean Viking ដែលជានាវាដំណើរការដោយក្រុមមនុស្សធម៌ SOS Mediterranee ​រួមជាមួយនឹងជនចំណាកស្រុកជាង ២០០ នាក់ផ្សេងទៀតដែលត្រូវបានជួយសង្គ្រោះពីទូក ២ ផ្សេងទៀត ។

នាវានេះកំពុងធ្វើដំណើរទៅកាន់កំពង់ផែ Ancona ប្រហែល ៤ ថ្ងៃទៀតទើបដល់ ប៉ុន្តែក្រុមការងារបានស្នើសុំឲ្យចតនៅកំពង់ផែណាដែលកាន់តែជិត ព្រោះជនចំណាលស្រុកដែលនៅលើទូកកំពុងត្រូវការជំនួយជាអាហារ និងទឹកជាបន្ទាន់ ។

យោងតាមជនចំណាកស្រុកដែលត្រូវបានជួយសង្គ្រោះបាននិយាយទៀតថា ពួកគេបានចេញដំណើរពីទីក្រុង Zawiya នៅលើឆ្នេរសមុទ្រលីប៊ី បន្ទាប់ពីចេញដំណើរបាន ៣ ថ្ងៃម៉ាស៊ីន​ទូកបានខូច ធ្វើ​ឲ្យទូក​អណ្តែត​ទាំងដែល​គ្មាន​អាហារ និង ​ទឹក ហើយជន​រង​គ្រោះភាគច្រើនជាស្ត្រី និង​កុមារ​ស្លាប់ ​ដោយ​សារ​ការ​ខ្សោះ​ជាតិ​ទឹក និង​ស្រេក​ឃ្លាន ខណៈអ្នកនៅរស់រានមានជីវិត ស្ថិតក្នុងស្ថានភាពសុខភាពខ្សោយ ហើយកំពុងស្ថិតនៅក្រោមការថែទាំសុខភាព ។

អង្គការអន្តរជាតិសម្រាប់ការធ្វើចំណាកស្រុក (IOM) បានឲ្យដឹងថា ឆ្នាំ ២០២៣ គឺជាឆ្នាំដែលជនចំណាកស្រុកស្លាប់ច្រើនបំផុតក្នុងកំណត់ត្រា ពោលមានមនុស្សយ៉ាងហោចណាស់ ៨,៥៦៥ នាក់បានស្លាប់នៅលើផ្លូវធ្វើចំណាកស្រុកនៅទូទាំងពិភពលោក ខណៈមកដល់ពេលនេះជនចំណាកស្រុក ៣០០ នាក់ហើយដែលបានស្លាប់នៅឆ្នាំនេះ គឺស្ទើរតែដូចគ្នាទៅនឹងឆ្នាំមុន ៕

អត្ថបទ ៖ ប៊ុន សុភាព