ស្ថានទូត រុស្ស៊ី ប្រចាំនៅ អាមេរិក ទទួលសារគំរាមទាក់ទងការបោះឆ្នោត

ស្ថានទូតរុស្ស៊ីប្រចាំនៅសហរដ្ឋអាមេរិកបានទទួលការគំរាមកំហែងជាច្រើនលើកច្រើនសារទាក់ទងទៅនឹងការបោះឆ្នោតជ្រើសរើសប្រធានាធិបតីរុស្ស៊ីនៅក្នុងសប្ដាហ៍នេះ ។ នេះបើយោងតាមការលើកឡើងរបស់លោកឯកអគ្គរដ្ឋទូត Anatoly Antonov និងចុះផ្សាយដោយទីភ្នាក់ងារព័ត៌មាន Reuters កាលពីថ្ងៃ១៤ ខែមីនាកន្លងទៅ ។

លោក Antonov បានប្រាប់អ្នកសារព័ត៌មានកាលពីថ្ងៃព្រហស្បតិ៍ថា “យើងទទួលការហៅទូរស័ព្ទមកគំរាម និងបង្កហេតុជាច្រើន ។ យើងដឹងថា មានផែនការ ក៏ដូចជាសកម្មភាពប្រឆាំងរុស្ស៊ី ទាំងនៅជុំវិញស្ថានទូត និងស្ថានកុងស៊ុលរបស់យើង ហើយអាចនឹងមានការប៉ុនប៉ងចូលស្ថានទូតរបស់យើងផងដែរ ប៉ុន្តែវាមិនរំខានជាដុំកំភួនអ្វីនោះទេ គ្រាន់តែធ្វើឲ្យយើងខូចអារម្មណ៍តែប៉ុណ្ណោះ” ។

ប្រទេសរុស្ស៊ីនឹងរៀបចំការបោះឆ្នោតជ្រើសរើសប្រធានាធិបតីលើកទី ៨ រយៈពេល ៣ ថ្ងៃ ពោលនៅថ្ងៃទី១៥ ដល់ថ្ងៃទី១៧ ខែមីនា ឆ្នាំ២០២៤ នេះ ស្របពេលដែលលោកប្រធានាធិបតី វ្ល៉ាឌីមៀរ ពូទីន ស្ទើរតែប្រាកដក្នុងចិត្ត ១០០ ភាគរយទៅហើយថានឹងឈ្នះការបោះឆ្នោតនេះ ខណៈលោកក៏កំពុងឈ្មុសឈ្មុលរកអាណត្តិទី ៥ របស់ខ្លួនផងដែរ ។

ពាក់ព័ន្ធនឹងបញ្ហានេះដែរ រដ្ឋមន្ត្រីក្រសួងអភិវឌ្ឍន៍ឌីជីថលរបស់រុស្ស៊ី លោក Maksut Shadayev បានប្រាប់ទីភ្នាក់ងារសារព័ត៌មាន Tass ថា ក្រៅពីការហៅទូរស័ព្ទមកសម្លុតគំរាមស្ថានទូតរបស់យើង យើងដឹងថា ពួក Hacker ក៏ត្រៀមចិត្តត្រៀមកាយវាយប្រហារខ្នាតធំមកលើហេដ្ឋារចនាសម្ព័ន្ធនៃប្រព័ន្ធបោះឆ្នោតតាមអនឡាញរបស់យើងផងដែរ ។

ទន្ទឹមនោះ ការគំរាមកំហែងនេះកើតមានឡើងត្រឹមតែប៉ុន្មានថ្ងៃប៉ុណ្ណោះ បន្ទាប់ពីលោក ពូទីន ចេញសារគំរាមដល់សហរដ្ឋអាមេរិកថាបាននិងកំពុងចិញ្ចឹមចិត្តជ្រៀតជ្រែកក្នុងការបោះឆ្នោតជ្រើសរើសប្រធានាធិបតីរុស្ស៊ី ហើយលោកថែមទាំងបានព្រមានទៀតថា រាល់ការប៉ុនប៉ងណាមួយរបស់មហាអំណាចបរទេសដើម្បីលូកលាន់ក្នុងការបោះឆ្នោតមួយនេះនឹងចាត់ទុកថាជា “ទង្វើរំលោភបំពាន” ។

គួរបញ្ជាក់ថា រុស្ស៊ីនឹងរៀបចំការបោះឆ្នោតជ្រើសរើសប្រធានាធិបតីនៅថ្ងៃទី១៥ ដល់ថ្ងៃទី១៧ ខែមីនានេះ ខណៈបេក្ខជនឈរឈ្មោះបោះឆ្នោតមានចំនួន ៤ រូបក្នុងនោះរួមមាន លោកប្រធានាធិបតី វ្ល៉ាឌីមៀរ ពូទីន មកពីគណបក្សរួបរួមរុស្ស៊ី, លោក Vladislav Davankov ជាអនុប្រធានសភារបស់រុស្ស៊ី និងជាសមាជិកនៃគណៈកម្មាធិការបក្សប្រជាជនថ្មី, លោក Leonid Slutsky មេដឹកនាំគណបក្សប្រជាធិបតេយ្យសេរីនិយម (LDPR) ជាបក្សនៅខាងវិមានក្រឹមឡាំង និងមួយរូបទៀតគឺលោក Nikolai Kharitonov បេក្ខភាពមកពីបក្សកុម្មុយនីស្ត ៕

ដោយ ៖ សុខ ជីវ័ន្ត

ចុចអាន ៖ ត្រួសៗពីដំណើរការបោះឆ្នោតជ្រើសរើសប្រធានាធិបតី រុស្ស៊ី ខណៈលោក ពូទីន សង្ឃឹមឈ្នះយ៉ាងផុយ