ព័ត៌មានអន្ដរជាតិ

វៀតណាម កើតការវាយប្រហារតាមអនឡាញជាង ១,៨០០ ករណី

បានផុស

១ year មុន

នៅ

ថ្ងៃសុក្រ ១៥ មីនា ២០២៤

ដោយ

គិតមកទល់នឹងឆ្នាំ ២០២៤ នេះ ករណីវាយប្រហារតាមបច្ចេកវិទ្យាបានកើតឡើងប្រមាណ ១,៨១២ ករណីនៅប្រទេសវៀតណាម ។ យ៉ាងណាមិញ ចំនួននេះគឺធ្លាក់ចុះប្រមាណ ៣៨ ភាគរយ បើធៀបនឹងទិន្នន័យចាប់ពីខែមករាដល់ខែមីនា ក្នុងឆ្នាំ ២០២៣ កន្លងទៅ ។ នេះបើតាមការចុះផ្សាយរបស់សារព័ត៌មាន VietNam News នាថ្ងៃទី១៥ ខែមីនា ឆ្នាំ២០២៤នេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យពីក្រសួងព័ត៌មាន និងគមនាគមន៍វៀតណាមបានបង្ហាញថា វិស័យឧស្សាហកម្មសន្តិសុខបច្ចេកវិទ្យា និងព័ត៌មានវិទ្យា ទទួលបានប្រាក់ចំណូលប្រមាណ ៨០៤ ពាន់លានដុង ស្មើនឹង ៣២,៥០០ ដុល្លារដែលក្នុងមួយឆ្នាំទៅមួយឆ្នាំកើនឡើងប្រមាណ ៤៦.៨ ភាគរយ ។

ប្រភពដដែលបានឲ្យដឹងថា នាពាក់កណ្តាលឆមាសឆ្នាំ ២០២៤ នេះ ក្រសួងខាងលើនឹងអភិវឌ្ឍចេញផ្សាយសៀវភៅណែនាំស្តីពីប្រព័ន្ធសន្តិសុខសុវត្ថិភាពបច្ចេកវិទ្យាតាមកម្រិត ក្នុងទិសដៅបញ្ជ្រាបចំណេះដឹងព័ត៌មានសន្តិសុខបច្ចេកវិទ្យាទៅដល់គ្រប់ស្ថាប័នរដ្ឋ និងថ្នាក់មូលដ្ឋាន ។

ឯកសារនេះក៏ស្របនឹងទិសដៅអភិវឌ្ឍមន្រ្តីក្នុងវិស័យបច្ចេកវិទ្យាសម្រាប់អនុវត្តគម្រោងទិន្នន័យផែនការប្រជាជន ដោយមានកំណែទម្រង់លើផ្នែកអត្តសញ្ញាណកម្មអេឡិចត្រូនិក ប្រព័ន្ធផ្ទៀងផ្ទាត់បញ្ជាក់ទម្រង់អេឡិចត្រូនិកសម្រាប់ឆ្នាំ២០២២-២០២៥ និងទិសដៅឆ្នាំ ២០៣០ ក្រោមឈ្មោះកម្មវិធី Project 06 ។

ឯកសារនេះក៏នឹងក្លាយជារបាយការណ៍សម្រាប់ដាក់ជូននាយករដ្ឋមន្រ្តីវៀតណាមក្នុងការអនុវត្តយុទ្ធសាស្រ្តសន្តិសុខសុវត្ថិភាពបច្ចេកវិទ្យាជាតិនាចុងឆ្នាំ ២០២៤ ក៏ដូចជាទិសដៅអភិវឌ្ឍធនធានមនុស្សផ្នែកវិស័យបច្ចេកវិទ្យាពីឆ្នាំ ២០២២ ដល់ឆ្នាំ ២០២៥ ហើយក្រសួងគមនាគមន៍ខាងលើគ្រោងនឹងបញ្ចប់ និងដាក់ជូនរដ្ឋាភិបាលរបស់ខ្លួននូវកម្មវិធីព្រាងនៃការចុះហត្ថលេខាអេឡិចត្រូនិក ក៏ដូចនិតិវិធីបញ្ជាក់ផ្តល់សិទ្ធិផ្លូវការតាមអេឡិចត្រូនិកផងដែរ ៕