អ៊ីស្លង់ ប្រកាសអាសន្ន និងជម្លៀសមនុស្សរាប់ពាន់នាក់ ដោយសារផ្ទុះភ្នំភ្លើង ធ្ងន់ធ្ងរបំផុត

តាមសេចក្តីរាយការណ៍របស់ Reuters កាលពីថ្ងៃសៅរ៍ទី១៦ខែមីនា, ភាគខាងត្បូងប្រទេសអ៊ីស្លង់ បានប្រកាសអាសន្ននិងជម្លៀសប្រជាជនរាប់ពាន់នាក់ ដោយសារតែការផ្ទុះភ្នំភ្លើងនៅលើឧបទ្វីប Reykjanes ដែលនេះជាការផ្ទុះលើកទីបួនហើយ ចាប់តាំងពីខែធ្នូឆ្នាំ២០២៣មក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកត្រូវជម្លៀសភាគច្រើន គឺជាពលរដ្ឋរស់​នៅ​ក្នុង​ទីក្រុង​ Grindavik ដែល​​រង​ផល​ប៉ះ​ពាល់​ខ្លាំងបំផុត ​ដោយ​ការ​ផ្ទុះ​​ជា​បន្ត​បន្ទាប់ ខណៈតំបន់ Blue Lagoon នៅក្បែរនោះ ដែលជាកន្លែងទាក់ទាញទេសចរណ៍ដ៏ពេញនិយមបំផុតមួយរបស់អ៊ីស្លង់ ក៏ត្រូវបានជម្លៀសចេញផងដែរ។

ទោះបីជាយ៉ាងណាក៏ដោយ ដែនអាកាសរបស់អ៊ីស្លង់នៅតែបើកចំហ។

យោងតាមសេវាការពារស៊ីវិលរបស់ប្រទេសនេះ, ការផ្ទុះបានចាប់ផ្តើមក្រោយម៉ោង ២០:០០ (ម៉ោងក្នុងស្រុក) ថ្ងៃសៅរ៍នៅចន្លោះភ្នំ Hagafell និង Stora-Scogfell ភាគខាងជើងទីក្រុង Grindavik ។

វីដេអូ​នៃ​ការ​ផ្ទុះ​ ​បាន​បង្ហាញឲ្យឃើញ​ផ្សែង​ខ្មួលខ្មាញ់និង​ពន្លឺម៉ាក់ម៉ា ហូរ​ចេញ​ពីមាត់ភ្នំភ្លើង ហើយភូគព្ភវិទូ Magnus Tumi Gudmundsson បានប្រាប់ប្រព័ន្ធផ្សព្វផ្សាយក្នុងស្រុកថា ការផ្ទុះកាលពីថ្ងៃសៅរ៍គឺជាការផ្ទុះមានកម្លាំងខ្លាំងបំផុត មិនធ្លាប់ជួបសោះតាំងពីមុនមក។

ទន្ទឹមនោះ លោក Gudmundsson និយាយថា មានលទ្ធភាពដែលកម្អែភ្នំភ្លើង អាចហូរចូលទៅក្នុងសមុទ្រ ប៉ុន្តែរឿងនេះអាចនឹងមិនកើតឡើងទេ ប្រសិនបើសកម្មភាពភ្នំភ្លើងធូរស្រាល។

អាកាសយានដ្ឋានអន្តរជាតិ Keflavik និងព្រលានយន្តហោះក្នុងតំបន់ផ្សេងទៀត គឺមិនរងផលប៉ះពាល់ដោយការផ្ទុះឡើយ ប៉ុន្តែអាកាសយានដ្ឋាន Blue Lagoon ត្រូវបានបិទរហូតដល់មានការជូនដំណឹងបន្ថែម ដើម្បីជាការប្រុងប្រយ័ត្នជាមុន។

សូមបញ្ជាក់ អ៊ីស្លង់មានប្រព័ន្ធភ្នំភ្លើងសកម្មចំនួន៣៣ ហើយស្ថិតនៅលើអ្វីដែលត្រូវបានគេស្គាល់ថា Mid-Atlantic Ridge ដែលជាព្រំប្រទល់រវាងផ្ទាំងតិចតូនិក ធំបំផុតទាំងពីរនៅលើភពផែនដី។

លើកចុងក្រោយដែលឧបទ្វីប Reykjanes ចេញសកម្មភាពភ្នំភ្លើងមិនស្រាកស្រាន្តគឺកាលពី៨០០ឆ្នាំមុន ហើយការផ្ទុះបានបន្តអស់រយៈពេលជាច្រើនទសវត្សរ៍៕

អត្ថបទ៖ សុខ សុវណ្ណ

ចុចអាន៖ ភ្នំភ្លើង Semeru ផ្ទុះឡើង ខណៈអាជ្ញាធរ ព្រមានប្រជាជន ឲ្យប្រយ័ត្ន