ព័ត៌មានអន្ដរជាតិ

ទេសចរចិនជាង ៤០០ នាក់ជិះរថភ្លើងពីប៉េកាំងមកលេងឡាវ ចាយពេល ១៥ ថ្ងៃ

បានផុស

១ year មុន

នៅ

ថ្ងៃពុធ ២០ មីនា ២០២៤

ដោយ

រថភ្លើងដឹកអ្នកទេសចរជើងដំបូងដែលមានកូដឈ្មោះ Y445 ចេញពីរដ្ឋធានីប៉េកាំងប្រទេសចិន ឆ្លងព្រំដែនមកប្រទេសឡាវក្នុងឆ្នាំ ២០២៤ នេះ បានចាប់ផ្ដើមចេញដំណើរកាលពីព្រឹកព្រលឹមថ្ងៃទី១៨ ខែមីនា ឆ្នាំ២០២៤ ជាមួយនឹងអ្នកដំណើរជាង ៤០០ នាក់ ។ នេះបើតាមការចុះផ្សាយរបស់សារព័ត៌មានឡាវ Laotian Times ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកដំណើរឈ្មោះ Dai Kaiyi មកពីរដ្ឋធានីប៉េកាំងប្រទេសចិនបាននិយាយពីអារម្មណ៍ ក្នុងទស្សនាចរណ៍តាមជើងរថភ្លើងដ៏វែងឆ្ងាយនេះថា “ជើងរថភ្លើងនេះ យើងបានមើលទេសភាពជាច្រើនទាំងប្រទេសចិន និងប្រទេសឡាវ ។ វាគឺការធ្វើដំណើរមានរយៈពេល ១៥ ថ្ងៃ ដែលនេះអនុញ្ញាតឲ្យអ្នកទេសចរជួបបទពិសោធនិងទិដ្ឋភាពស្អាតនៃប្រទេសទាំងពីរ” ។

ដោយឡែកអ្នកបើករថភ្លើង GE Rongyan បានឲ្យដឹងថា “ជាមួយអ្នកដំណើរវ័យចំណាស់ជាច្រើនក្នុងដំណើរទេសចរនេះ កិច្ចការចម្បងរបស់ពួកយើងនោះ គឺធានាផ្តល់ឲ្យពួកគេនូវសុវត្ថិភាព សេវាឆ្លើយតបឆាប់រហ័សលើ ចំណីអាហារ និងភេសជ្ជៈក្នុងរថភ្លើង ក៏ដូចជាសេវាកម្មល្អៗជាច្រើនទៀតសម្រាប់អតិថិជនពួកយើង” ។

ជាក់ស្ដែង គេឃើញមានការរៀបចំយ៉ាងល្អពីមន្រ្តីស្ថានីយ៍រថភ្លើងមានទាំងម្ហូបចំណីសម្រាប់ផ្គត់ផ្គង់ដល់អតិថិជនជាច្រើនមុខ កម្មវិធីកម្សាន្ត សម្ភារៈបរិក្ខារសុខាភិបាល ក៏ដូចជាមន្រ្តីជំនាញទាំងសុខាភិបាល និងសង្រ្គោះផ្សេងៗដើម្បីធានាសុខសុវត្ថិភាពរបស់អ្នកដំណើរ ។

លោក Wang Xu អ្នកគ្រប់គ្រងធុរកិច្ចនៃសេវាកម្មរបស់ក្រុមហ៊ុនធ្វើដំណើរផ្លូវដែក China Railway Travel Service Group បានលើកឡើងថា “ឆ្នាំនេះ ពួកយើងផ្តល់សេវាទេសចរណ៍ពិសេស ដែលរួមបញ្ចូលទាំងជើងរថភ្លើងក្នុងស្រុកពិសេស និងឆ្លងដែនសម្រាប់ធ្វើដំណើរ ដែលជាបទពិសោធមិនបានបំភ្លេចបាន” ។

គួររំឭកដែរថា ចាប់តាំងពីដំណើរការនាថ្ងៃទី១៣ ខែមេសា ឆ្នាំ២០២៣មក ជើងរថភ្លើងឆ្លងព្រំដែននេះ បានដឹកអ្នកដំណើរប្រមាណជាង ៣០ លាននាក់រួចមកហើយ រីឯការដឹកទំនិញបាន ៣៤ លានតោន ខណៈជើងរថភ្លើងទាំងដឹកអ្នកដំណើរ និងទំនិញ គឺមានកំណើនទៅមុខយ៉ាងរលូនគួរកត់សម្គាល់ ។

តំណាងខាងក្រុមហ៊ុនរថភ្លើងខាងលើក៏បានបញ្ជាក់ពីជំហរខ្លួនដែរថា នឹងបន្តពង្រឹងកិច្ចសហការ ក៏ដូចជាផ្តល់នូវសេវាគុណភាព ព្រមទាំងការអភិវឌ្ឍស្របទៅនឹងគោលនយោបាយយុទ្ធសាស្រ្តចិន ខ្សែក្រវ៉ាត់មួយផ្លូវមួយដែលនឹងផ្តល់ប្រយោជន៍ដល់ប្រជាពលរដ្ឋទាំងពីរប្រទេស ៕

ដោយ ៖ មាន រតនា