មូលហេតុ ប្រធានាធិបតីវៀតណាម ចុះចេញពីតំណែង

តាមការចុះផ្សាយរបស់ VN Express កាលពីថ្ងៃពុធទី២០ខែមីនា, គណៈកម្មាធិការមជ្ឈិមបក្សកុម្មុយនិស្តវៀតណាម បានឯកភាពអនុញ្ញាតឲ្យលោកប្រធានាធិបតី Vo Van Thuong លាលែងពីមុខតំណែងទាំងអស់ព្រោះមូលហេតុ លោកបំពានបទប្បញ្ញត្តិគណបក្ស ធ្វើរឿងដែលសមាជិកបក្សមិនត្រូវបានអនុញ្ញាតឲ្យធ្វើ ហើយមិនអាចធ្វើជាគំរូដល់គេឯង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីប្រកាស “ការបំពាន និងភាពខ្វះចន្លោះរបស់លោក Vo Van Thuong បានបង្កឲ្យមានមតិរិះគន់ជាសាធារណៈ ធ្វើឲ្យប៉ះពាល់ដល់កេរ្តិ៍ឈ្មោះរបស់បក្ស រដ្ឋ និងបុគ្គល”។

លោក Thuong នឹងលាលែងពីមុខតំណែងជាប្រធានាធិបតី, សមាជិកការិយាល័យនយោបាយ, សមាជិកគណៈកម្មាធិការមជ្ឈិមបក្សទី១៣, ប្រធានក្រុមប្រឹក្សាការពារជាតិ និងសន្តិសុខសម្រាប់អាណត្តិឆ្នាំ ២០២១-២០២៦ តាមសេចក្តីសម្រេចដែលបានប្រកាសនៅក្នុងសម័យប្រជុំវិសាមញ្ញរបស់គណៈកម្មាធិការបក្ស។

សូមបញ្ជាក់ លោក Thuong អាយុ ៥៤ ឆ្នាំមកពីខេត្ត Vinh Long ភាគខាងត្បូងប្រទេសវៀតណាម ត្រូវបានជ្រើសរើសជាប្រធានាធិបតីកាលពីថ្ងៃទី២ ខែមីនា ឆ្នាំ២០២៣ សម្រាប់អាណត្តិ៥ឆ្នាំ (២០២១-២០២៦) ជំនួសតំណែងលោក Nguyen Xuan Phuc ដែលក៏បានលាលែងតំណែងដូចគ្នា។

ដោយរៀនចប់ថ្នាក់អនុបណ្ឌិតផ្នែកទស្សនវិជ្ជា លោក Thuong បានចាប់ផ្តើមអាជីពនយោបាយរបស់គាត់ក្នុងតួនាទីជាអ្នកដឹកនាំនៅគណៈកម្មាធិការមជ្ឈិមសហភាពយុវជនទីក្រុងហូជីមិញ រហូតដល់ក្លាយជាលេខាបក្សនៃខេត្ត Quang Ngai ភាគកណ្តាលកាលពីខែសីហា ឆ្នាំ ២០១១។

បន្ទាប់មកលោកក្លាយជាអនុលេខាបក្សអចិន្ត្រៃយ៍នៃទីក្រុងហូជីមិញក្នុងឆ្នាំ ២០១៤ ហើយនៅខែកុម្ភៈឆ្នាំ២០១៦ លោកបានក្លាយជាប្រធានគណៈកម្មការព័ត៌មាននិងអប់រំ រួចក្លាយជាសមាជិកអចិន្ត្រៃយ៍នៃលេខាធិការដ្ឋាន ចាប់ពីខែកុម្ភៈឆ្នាំ២០២១ ដល់ខែមីនាឆ្នាំ ២០២៣ ។

ក្នុង​អំឡុងពេលកាន់​តំណែង​ជា​ប្រធានាធិបតី លោក Thuong បាន​ធ្វើ​ដំណើរ និង​ទស្សនកិច្ច​ជាង ១០ ដង​ជាមួយ​ថ្នាក់​ដឹកនាំ​អន្តរជាតិ៕

អត្ថបទ៖ សុខ សុវណ្ណ

ចុចអាន៖ ប្រធានាធិបតី វៀតណាម ប្រកាសលាលែងពីតំណែង