ព័ត៌មានអន្ដរជាតិ

Apple បើកហាងធំជាងគេកម្រិតពិភពលោកនៅក្រុងសៀងហៃ ស្វាគមន៍អតិថិជនគ្រប់ជាតិសាសន៍

បានផុស

១០ ខែ មុន

នៅ

ថ្ងៃសុក្រ ២២ មីនា ២០២៤

ដោយ

ក្រុមហ៊ុនបច្ចេកវិទ្យា Apple កាលពីថ្ងៃព្រហស្បតិ៍ ទី២១ ខែមីនា ឆ្នាំ២០២៤ កន្លងទៅបានបើកសម្ពោធហាងលក់ផលិតផលរាយធំជាងគេរបស់ខ្លួននៅទីក្រុងសៀងហៃនៃទឹកដីចិនដីគោក ដោយក្នុងនោះប្រធានប្រតិបត្តិ Apple លោក Tim Cook ជាអ្នកបើកទ្វារសម្ពោធដោយផ្ទាល់ស្វាគមន៍អតិថិជនជនជាតិចិនជាច្រើននាក់ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់សារព័ត៌មានចិន ស៊ីនហួរ បានឲ្យដឹងថា ហាងធំជាងគេ និងជាហាងទី៨ របស់ Apple មានទីតាំងនៅចំណុច Jing’ansi Square ក្នុងសង្កាត់ពាណិជ្ជកម្មមួយនៃទីក្រុងសៀងហៃ ។ បើគិតជាលំដាប់ក្នុងពិភពលោក ហាងថ្មីនេះជាហាងធំជាងគេទីពីរទូទាំងពិភពលោក ។

សម្រាប់ហាងប្រេនអាមេរិកមួយនេះផងដែរមានបុគ្គលបម្រើការជាង ១៥០ នាក់ ដែលអាចនិយាយប្រាស្រ័យទាក់ទងបានជាភាសាអង់គ្លេស ជប៉ុន កូរ៉េ អាល្លឺម៉ង់ អេស្ប៉ាញ ម៉ាឡេ និងភាសាចិនគ្រប់ភាសាតាមតំបន់ ដែលស្វាគមន៍យ៉ាងកក់ក្តៅសម្រាប់អតិថិជនគ្រប់ជាតិសាសន៍ ។

លោកស្រី Diana Chou ជាប្រធានទីផ្សារតំបន់ភាគខាងកើតប្រទេសចិនបានឲ្យដឹងថា “អតិថិជនជនជាតិចិន ក៏ដូចជាហាងលក់ផលិតផល Apple នៅប្រទេសចិនគឺសកម្មបំផុត ក្នុងចំណោមបណ្តាហាងនៅលើពិភពលោក ហើយហាងថ្មីនេះ និងបន្ថែមភាពងាយស្រួលដល់ការទិញលក់ក្នុងប្រទេសចិនផងដែរ” ។

ដោយឡែកកាលពីថ្ងៃពុធកន្លងទៅ ក្រុមហ៊ុន Apple ក៏បានរៀបចំចែករំលែកកម្មវិធីពិភាក្សាជាមួយអ្នកផ្គត់ផ្គង់ធំៗប្រចាំនៅចិន រួមមានក្រុមហ៊ុន BYD, ក្រុមហ៊ុន Lens Technology, ក្រុមហ៊ុន Shenzhen Everwin Precision Technology Co., Ltd,. ជាដើម ដោយមានការបង្ហាញសមិទ្ធិផលថ្មីៗចុងក្រោយ និងបណ្តុះបណ្តាលចំណេះដឹងបច្ចេកវិទ្យាបន្ថែមផងដែរ ៕