ព័ត៌មានអន្ដរជាតិ

ឡាវ ត្រៀមដំឡើងអាករលើតម្លៃបន្ថែមដល់ ១០ ភាគរយ

បានផុស

១ year មុន

នៅ

ថ្ងៃសុក្រ ២២ មីនា ២០២៤

ដោយ

រដ្ឋាភិបាលឡាវបានប្រកាសផែនការរបស់ខ្លួននឹងដំឡើងអាករលើតម្លៃបន្ថែម (VAT) ពីអត្រា ៧ ភាគរយដល់ ១០ ភាគរយវិញក្នុងទិសដៅបង្កើនចំណូលថវិការដ្ឋ និងជំរុញដល់សេដ្ឋកិច្ច ក៏ដូចជាការអភិវឌ្ឍសង្គម ។ នេះបើតាមការចុះផ្សាយរបស់សារព័ត៌មានឡាវ Laotian Times ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមការបង្ហើបប្រភពពីមន្ត្រីរដ្ឋាភិបាលឡាវបានឲ្យដឹងថា “សម្រាប់បទបញ្ញត្តិថ្មីនេះកំពុងរង់ចាំចំណារលិខិតឆ្លើយតបពីសភាជាតិឡាវក្នុងការអនុវត្តតាមនីតិវិធីនេះ ខណៈនាយកដ្ឋានពន្ធដារក៏ត្រៀមនឹងសុំឯកសារពាក់ព័ន្ធពីក្រសួងយុត្តិធម៌ផងដែរ ហើយប្រសិនបើបទបញ្ញត្តិនេះអនុម័តរួចរាល់ នឹងចូលជាធរមានក្នុងរយៈពេល ១៥ ថ្ងៃ” ។

ស្ថិតក្រោមការកែតម្រូវ អត្រាអាការលើតម្លៃបន្ថែម (VAT) ១០ ភាគរយនេះ នឹងអនុវត្តទៅលើប្រតិបត្តិការសេដ្ឋកិច្ច រួមមានការនាំចូលទំនិញ សេវាទូទៅ ការនាំរ៉ែចូល ការផ្គត់ផ្គង់ផ្សេងៗ ក៏ដូចជាការប្រើប្រាស់ថាមពលអគ្គិសនីជាដើម ។

សម្រាប់ការកែតម្រូវអត្រាអាករលើតម្លៃបន្ថែមនេះ គឺនឹងស្តារត្រឡប់ទៅកម្រិតដើមពីមុនវិញ ដោយហេតុថាការបន្ថយអត្រានេះ បានធ្វើឡើងកាលពីឆ្នាំ ២០២២ ជាផ្នែកមួយក្នុងយុទ្ធសាស្រ្តរដ្ឋាភិបាលឡាវក្នុងការស្តារសេដ្ឋកិច្ចឲ្យងើបឡើងវិញក្រោយវិបត្តិកូវីដ ១៩ ។ ប៉ុន្តែយ៉ាងណាក៏ដោយ ផែនការដំឡើងអាករបន្ថែមនេះ ក៏មានក្តីបារម្ភពីប្រជាពលរដ្ឋឡាវផងដែរ ពោលការបង្កើនអាករលើតម្លៃបន្ថែម នឹងជំរុញឲ្យថ្លៃទំនិញ និងសេវាកើនឡើង ។

គួរបញ្ជាក់ថា អាករលើតម្លៃបន្ថែម (VAT) គឺជាពន្ធលើការចំណាយរបស់អ្នកប្រើប្រាស់ចុងក្រោយ (Final Cosumers) ហើយការបង់ VAT គឺដោយសារតែយើងបានទិញទំនិញ ឬប្រើប្រាស់សេវាកម្ម ដែលផ្គត់ផ្គង់ដោយបុគ្គលជាប់អាករ (Taxable Person) ខណៈជាទូទៅ ទំនិញ និងសេវាជាប់អាករមានច្រើនប្រភេទលើទំនិញតាមផ្សារទំនើប ផលិតផលម្ហូបអាហារ ភេសជ្ជៈតាមភោជនីយដ្ឋានធំៗ គ្រឿងបរិក្ខារផ្សេងៗជាដើម ៕

ដោយ៖ មាន រតនា