អាមេរិកបន្ថែមការជំរុញរបបយោធាមីយ៉ាន់ម៉ា បោះបង់អំណាច ក្រោយបាតុករស្លាប់លើកដំបូង

ទីក្រុងវ៉ាស៊ីនតោនបានជំរុញមេដឹកនាំនៃរបបយោធាថ្មីរបស់មីយ៉ាន់ម៉ាឲ្យជៀសវាងអំពើហិង្សា និងបោះបង់អំណាច បន្ទាប់ពីមរណភាពរបស់បាតុករវ័យក្មេងប្រឆាំងនឹងរដ្ឋប្រហារបានបង្កឲ្យមានកំហឹងថ្មីប្រឆាំងនឹងរបបយោធា ។

គ្រូពេទ្យនៅទីក្រុងណៃពីដោបានប្រកាសពីការស្លាប់នៃនាង Mya Thwe Thwe Khaing ដែលមានអាយុ ២០ ឆ្នាំកាលពីថ្ងៃសុក្រ ខណៈដែលនាងត្រូវបានប៉ូលិសបាញ់គ្រាប់ពិតចំក្បាល អំឡុងពេលធ្វើបាតុកម្មកាលពីសប្តាហ៍មុន ។

ចាប់តាំងពីពេលនោះមកនាងបានក្លាយជានិមិត្តរូបនៃការតស៊ូសម្រាប់ក្រុមអ្នកតវ៉ាដែលបានលើករូបថតរបស់នាងខ្ពស់ៗក្នុងការធ្វើបាតុកម្ម ហើយថែមទាំងបានដាក់ផ្ទាំងបដាដ៏ធំមួយនៅលើស្ពានបង្ហាញពីពេលដែលនាងត្រូវបានគេបាញ់ប្រហារ ។

ទន្ទឹមនោះក្រុមគ្រួសារនៃបាតុករដំបូងគេដែលត្រូវបានសម្លាប់នៅក្នុងប្រទេសមីយ៉ាន់ម៉ា បន្ទាប់ពីរដ្ឋប្រហារយោធាកំពុងអំពាវនាវឲ្យមនុស្សជាច្រើនបន្ថែមទៀតចូលរួមបាតុកម្ម ។

ប្រទេសមីយ៉ាន់ម៉ាកំពុងមានភាពច្របូកច្របល់ចាប់តាំងពីកងទ័ពបានទម្លាក់មេដឹកនាំស៊ីវិលលោកស្រី អ៊ុងសាន ស៊ូជី កាលពីថ្ងៃទី ១ ខែកុម្ភៈ ដោយមានបាតុកម្មតាមដងផ្លូវធំៗទាំងនៅតាមទីប្រជុំជន និងភូមិដាច់ស្រយាល ។

កងកម្លាំងសន្តិសុខបានឆ្លើយតបជាមួយនឹងហ្វូងបាតុករដែលកំពុងកើនឡើងដោយដាក់ពង្រាយកងទ័ពប្រឆាំងនឹងការប្រមូលផ្តុំដោយសន្តិវិធី និងបាញ់ឧស្ម័នបង្ហូរទឹកភ្នែក កាណុងបាញ់ទឹក និងគ្រាប់កាំភ្លើងជ័រ ។

ការថ្កោលទោសចំពោះអំពើហិង្សានេះបានកើតឡើងយ៉ាងខ្លាំង ហើយរដ្ឋមន្រ្តីក្រសួងការបរទេសអាមេរិកលោក Antony Blinken បានបើកកិច្ចពិភាក្សាជាមួយបណ្តាប្រទេសសម្ព័ន្ធមិត្តនៅក្នុងប៉ុន្មានថ្ងៃថ្មីៗនេះដើម្បីធ្វើការឆ្លើយតបជាអន្តរជាតិ ។

ចំណែកអ្នកនាំពាក្យលោក Ned Price បានប្រាប់អ្នកយកព័ត៌មានកាលពីថ្ងៃសុក្រថា “យើងសូមអំពាវនាវម្តងទៀតដល់យោធាភូមាឲ្យបញ្ឈប់អំពើហិង្សាប្រឆាំងនឹងក្រុមអ្នកតវ៉ាដោយសន្តិវិធី ។ យើងនឹងធ្វើការជាមួយដៃគូ និងសម្ព័ន្ធមិត្តដើម្បីជំរុញយោធាភូមាឲ្យផ្លាស់ប្ដូរសកម្មភាពរបស់ខ្លួនវិញ” ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ការតវ៉ានៅមីយ៉ាន់ម៉ាកាន់តែផ្ទុះខ្លាំង ក្រោយបាតុករស្លាប់លើកដំបូង

ចុចអាន ៖ ស្រ្តីដែលត្រូវគេបាញ់ក្នុងបាតុកម្មមីយ៉ាន់ម៉ា ទទួលមរណភាពហើយ