តៃវ៉ាន់ ធ្វើសមយុទ្ធយោធាបាញ់មីស៊ីលពីដីទៅអាកាស

កោះតៃវ៉ាន់នៅថ្ងៃអង្គារនេះបានធ្វើតេស្តសមត្ថភាពប្រព័ន្ធខែលការពារដែនអាកាសរបស់ខ្លួនក្នុងសមយុទ្ធបាញ់មីស៊ីលពីដីទៅអាកាស ដោយមានការចូលរួមពីកងកម្លាំងទ័ពអាកាស ជើងគោក និងជើងទឹក ដើម្បីបន្តពង្រឹងការហ្វឹកហ្វឺនត្រៀមប្រឈមមុខនឹងសកម្មភាពពីយោធារបស់ចិន ។ នេះបើយោងតាមការចេញផ្សាយរបស់សារពត៌មាន CNA នៅថ្ងៃទី​២៦ ខែមីនានេះ ។

បញ្ជាការកងទ័ពអាកាសរបស់តៃវ៉ាន់បាននិយាយនៅក្នុងសេចក្តីថ្លែងការណ៍ខ្លីមួយថា តៃវ៉ាន់បានធ្វើសមយុទ្ធការពារដែនអាកាសទាំងមូលដោយប្រើប្រព័ន្ធ Sky Bow ដែលផលិតក្នុងស្រុក និងមីស៊ីលបាញ់ពីដីទៅអាកាសប្រភេទ Patriot ដែលផលិតដោយសហរដ្ឋអាមេរិក រួមជាមួយនឹងយន្តហោះ និងនាវាកងទ័ពជើងទឹក ។

ទន្ទឹមនោះ សមយុទ្ធរបស់តៃវ៉ាន់នាពេលថ្មីៗនេះក៏កើតមានឡើង បន្ទាប់ពីក្នុងរយៈពេល ៤ ឆ្នាំចុងក្រោយនេះដែនកោះតៃវ៉ាន់បានត្អូញត្អែរពីករណីយន្តហោះកងទ័ពអាកាស និងនាវាកងទ័ពជើងទឹករបស់ចិនប្រតិបត្តិការម្ដងជាពីរដងទាំងនៅជិត និងជុំវិញកោះនេះ ។

កងទ័ពអាកាសបាននិយាយថា បើសិនយន្តហោះ និងកប៉ាល់របស់ចិន នៅតែបន្តទន្ទ្រានចូលទៅក្នុងដែនសមុទ្រ និងដែនអាកាសរបស់តៃវ៉ាន់ កងទ័ពអាកាសតៃវ៉ាន់នឹងបន្តបង្កើនការហ្វឹកហាត់ ដើម្បីដោះស្រាយការគំរាមកំហែងដែលអាចកើតមាន ខណៈលទ្ធផលរបស់សមយុទ្ធនៅថ្ងៃនេះទទួលបានលទ្ធផលល្អ ។

គួរបញ្ជាក់ថា មួយរយៈចុងក្រោយនេះប្រធានាធិបតីផុតអាណត្តិតៃវ៉ាន់លោកស្រី Tsai Ing-wen បានត្រួតពិនិត្យកម្មវិធីទំនើបកម្មយោធា រួមទាំងការអភិវឌ្ឍន៍ឧបករណ៍ថ្មីផលិតដោយតៃវ៉ាន់ ដែលភាគច្រើនបំពាក់ទៅលើកងទ័ពជើងទឹក ជាកម្លាំងទ័ពប្រើប្រាស់អាវុធច្រើនជាងគេ និងលើសពីចំនួនកងនាវារបស់ប្រទេសចិនទៅទៀត ៕

អត្ថបទ ៖ ប៊ុន សុភាព