ក្រុមតាលីបង់ ប្រកាសដាក់ទោស គប់ដុំថ្មទាល់ស្លាប់ ចំពោះស្រីផិតប្តី

ជាការផ្ញើសារដោយផ្ទាល់ទៅកាន់ប្រទេសប្រជាធិបតេយ្យលោកខាងលិច មេដឹកនាំកំពូលក្រុមតាលីបង់ Mullah Hibatullah Akhundzada កាលពីចុងសប្តាហ៍កន្លងទៅ បានប្រកាសថា រដ្ឋាភិបាលរបស់ខ្លួន នឹងអនុវត្តឡើងវិញនូវការដាក់ទោសប្រហារជីវិត ដោយគប់ដុំថ្មចំពោះស្ត្រីរូបណាដែលផិតក្បត់ប្តី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ The Telegraph នៅថ្ងៃពុធទី២៧ខែមីនា, លោក Akhundzada បាននិយាយក្នុងសារជាសំឡេងមួយ ដែលចាក់ផ្សាយលើប្រព័ន្ធផ្សព្វផ្សាយរដ្ឋគ្រប់គ្រងដោយក្រុមតាលីបង់ ថា “អ្នកនិយាយថា វាជាការរំលោភសិទ្ធិនារី នៅពេលយើងយកដុំថ្មគប់សម្លាប់ពួកគេ ​ប៉ុន្តែ​យើង​នឹង​អនុវត្ត​ទោស​នេះ ចំពោះ​អំពើ​ផិត​ក្បត់​ក្នុង​ពេល​ឆាប់ៗ​​ ហើយយើងក៏​វាយ​ស្ត្រីនឹងរំពាត់ និង​យក​ដុំ​ថ្ម​គប់​សម្លាប់​នៅ​ទីសាធារណៈផងដែរ”។

ការអត្ថាធិប្បាយនេះ សបញ្ជាក់ពីចេតនារបស់ក្រុមតាលីបង់ ក្នុងការអនុវត្តឡើងវិញនូវគោលនយោបាយដ៏ឃោរឃៅដែលដាក់ចេញក្នុងទសវត្សរ៍ឆ្នាំ១៩៩០ បើទោះបីជារបាយការណ៍បង្ហាញថា ក្រុមនេះមិនដែលបញ្ឈប់ការរំលោភបំពានធ្ងន់ធ្ងរលើស្ត្រីទាំងស្រុងក៏ដោយ ហើយអ្វីដែលគេស្តីបន្ទោសខ្លាំងបំផុតគឺចំពោះវីដេអូដ៏សាហាវក្នុងឆ្នាំ២០១៥ ដែលបង្ហាញពីនារីអាយុ១៩ឆ្នាំម្នាក់ ត្រូវ​ក្រុមបុរសឡោមព័ទ្ធ ព្រួតគ្នាគប់ដុំថ្មចំក្បាលពេញៗទំហឹង។

ការប្រហារជីវិតគឺធ្វើឡើង បន្ទាប់ពីស្ត្រីរូបនេះ ត្រូវគេចោទថា បានរួមភេទមុនរៀបការជាមួយគូដណ្តឹងរបស់នាង។

ទោះបីជាយ៉ាងណាក៏ដោយ អង្គការសហប្រជាជាតិ និងសហគមន៍អន្តរជាតិ បានអំពាវនាវម្តងហើយម្តងទៀត ឲ្យក្រុមតាលីបង់ គោរពសិទ្ធិមនុស្ស ជាពិសេសសិទ្ធិនារី ដែលត្រូវបានរឹតត្បិត ចាប់តាំងពីខ្លួនឡើងកាន់អំណាចសាជាថ្មីនៅប្រទេសអាហ្វហ្គានីស្ថាន ក្នុងឆ្នាំ២០២១ ក្រោយការដកទ័ពអាមេរិកដ៏វឹកវរ។

យោងតាមរបាយការណ៍ខែឧសភាឆ្នាំ២០២៣របស់អង្គការសហប្រជាជាតិ, មនុស្សចំនួន១៧៥នាក់ ត្រូវបានកាត់ទោសឲ្យដាក់ទណ្ឌកម្មផ្សេងៗ ហើយមាន៣៧នាក់ ត្រូវបានកាត់ទោសប្រហារជីវិតដោយគប់ដុំថ្ម។

លើសពីនេះ មនុស្សជាង១០០នាក់ត្រូវបានកាត់ទោសដោយវាយនឹងរំពាត់នៅទីសាធារណៈ ពីបទឧក្រិដ្ឋកម្មប្រឆាំងនឹងព្រះ ខណៈ៤នាក់ផ្សេងទៀត ត្រូវដាក់ទណ្ឌកម្មឲ្យជញ្ជាំងបាក់សង្កត់លើ៕

អត្ថបទ៖ សុខ សុវណ្ណ

ចុចអាន៖ ក្រុមតាលីបង់ ហាមមិនឲ្យស្រ្តី បើកហាងសាឡន