អាមេរិក ជួបគ្រោះអកុសល កប៉ាល់បុកស្ពានដ៏រន្ធត់ ចំនួន៧លើក ក្នុងប្រវត្តិសាស្រ្ត

កប៉ាល់ដឹកកុងតឺន័រមួយគ្រឿង បានបុកស្ពានដ៏សំខាន់មួយក្នុងទីក្រុង Baltimore កាលពីថ្ងៃអង្គារទី២៦ខែមីនា ដោយបណ្តាលឲ្យបាក់ ធ្លាក់មនុស្សនិងរថយន្តចូលទន្លេ។

ត្បិតចាប់ពីឆ្នាំ១៩៦០ដល់ឆ្នាំ២០១៥ ពិភពលោក ជួបហេតុការណ៍បាក់ស្ពានធំចំនួន៣៥លើក បណ្តាលឲ្យមនុស្ស៣៤២នាក់ បាត់បង់ជីវិតក៏ពិតមែន ប៉ុន្តែគេដឹងថា អាមេរិក ជួបគ្រោះអកុសលចំនួន១៨លើក ហើយក្នុងនោះទៀតសោត អាមេរិកជួបគ្រោះថ្នាក់បាក់ស្ពានដែលបង្កឡើងដោយកប៉ាល់ដ៏រន្ធត់ ត្រឹមតែ៧លើកប៉ុណ្ណោះ។

ខាងក្រោមនេះ ជាហេតុការណ៍កប៉ាល់បុកស្ពានដ៏រន្ធត់ចំនួន៧លើក ក្នុងប្រវត្តិសាស្រ្តអាមេរិក៖

១. ស្ពាន POPP’S FERRY

នៅថ្ងៃទី២០ខែមីនាឆ្នាំ២០០៩ កប៉ាល់មួយគ្រឿង បានបើកបុកស្ពាន Popp’s Ferry ក្នុង​ទីក្រុង Biloxi នៃរដ្ឋ Mississippi ទាំងកំរោល ដែល​បណ្តាលឲ្យផ្នែកប្រវែង៤៥ម៉ែត្រ​នៃ​ស្ពាន ​​បាក់​ចូល​ឈូងសមុទ្រ។

២. ស្ពាន INTERSTATE 40៖ ស្លាប់មនុស្ស ១៤នាក់

នៅថ្ងៃទី២៦ខែឧសភា ឆ្នាំ២០០២ កប៉ាល់មួយគ្រឿងបានបុកស្ពាន Interstate 40 លើទន្លេ Arkansas ក្នុងរដ្ឋ Oklahoma ដោយបាក់ផ្នែកប្រវែង១៥២ម៉ែត្រ ហើយធ្លាក់រថយន្តចូលទៅក្នុងទឹក។ មនុស្ស​១៤​នាក់ ត្រូវបាត់បង់ជីវិតនិង​១១​នាក់​រង​របួស។

៣. ស្ពាន QUEEN ISABELLA៖ ស្លាប់មនុស្ស ៨នាក់

នៅថ្ងៃទី១៥ខែកញ្ញាឆ្នាំ២០០១ កប៉ាល់មួយគ្រឿង បានបុកស្ពាន Queen Isabella ក្នុងទីក្រុង Port Isabel នៃរដ្ឋតិចសាស់ ដោយបណ្តាលឲ្យផ្នែកកណ្តាលនៃស្ពានបាក់ចូលទៅក្នុងឈូងសមុទ្រ សម្លាប់មនុស្ស​ចំនួន៨​នាក់។

៤. ស្ពាន EADS៖ របួសមនុស្ស ៥០នាក់

នៅថ្ងៃទី១៤ខែមេសាឆ្នាំ១៩៩៧ កប៉ាល់ Anne Holly បានធ្វើដំណើរកាត់កំពង់ផែ St. Louis រួចក៏បុកចំសសរកណ្តាលស្ពាន Eads បណ្តាលឲ្យមនុស្ស​៥០​នាក់ ​រង​របួស​ស្រាល។

៥. ស្ពាន BIG BAYOU CANOT៖ ស្លាប់មនុស្ស ៤៧នាក់

នៅថ្ងៃទី២២ខែកញ្ញាឆ្នាំ១៩៩៣៖ ក្នុងអំឡុងពេលចុះអ័ព្ទខ្លាំង កប៉ាល់មួយគ្រឿងបានបើកបុកស្ពានផ្លូវដែក Big Bayou Canot បណ្តាលឲ្យបាក់ រួចមួយសម្ទុះក្រោយមក រថភ្លើងក៏បានមកដល់ បណ្តាលឲ្យធ្លាក់ស្ពានក្បែរទីក្រុង Mobile នៃរដ្ឋ Alabama សម្លាប់មនុស្ស៤៧នាក់ និងរបួស១០៣នាក់។

៦. ស្ពាន SEEBER៖ ស្លាប់មនុស្សម្នាក់

នៅថ្ងៃទី២៨ខែឧសភាឆ្នាំ១៩៩៣ កប៉ាល់ Chris បានបើកបុកស្ពាន Judge William Seeber ក្នុងទីក្រុង New Orleans បណ្តាលឲ្យបាក់ផ្នែកខ្លះ ធ្លាក់រថយន្ត​២​គ្រឿង​ដឹក​មនុស្ស​៣​នាក់​ធ្លាក់​ចូលទន្លេ​។ មនុស្ស​ម្នាក់​បាន​ស្លាប់ និង​២​នាក់​ទៀត​រង​របួសធ្ងន់។

៧. ស្ពាន SUNSHINE SKYWAY៖ ៣៥ស្លាប់

នៅថ្ងៃទី៩ខែឧសភាឆ្នាំ១៩៨០៖ កប៉ាល់ដឹកទំនិញ Summit Venture ប្រវែង១៨៥ម៉ែត្រ បានធ្វើដំណើរតាមច្រកដឹកជញ្ជូនដ៏តូចចង្អៀត នៃឈូងសមុទ្រ Tampa ក្នុងរដ្ឋ Florida ស្រាប់តែពេលនោះមានខ្យល់ព្យុះបណ្តាលឲ្យកប៉ាល់ ទៅបុកស្ពាន​ Sunshine Skyway បាក់​បេតុង​ប្រវែង ៤២៦ម៉ែត្រ ទាំងដែលកំពុងមានចរាចរណ៍ដ៏មមាញឹកពេលព្រឹកព្រលឹម។ រថយន្តចំនួន៧គ្រឿង រួមទាំងរថយន្តក្រុងដែលមានមនុស្សជិះ២៦នាក់ផងដែរ បានធ្លាក់ចូលទៅក្នុងទឹក បណ្តាលឲ្យមនុស្ស៣៥នាក់ បាត់បង់ជីវិត៕

អត្ថបទ៖ សុខ សុវណ្ណ

ចុចអាន៖ លម្អិតហេតុការណ៍រន្ធត់ កប៉ាល់ដឹកកុងតឺន័រ បុកបាក់ស្ពាននៅទីក្រុង Baltimore