គណៈប្រតិភូ រុស្ស៊ី ធ្វើទស្សនកិច្ចនៅ កូរ៉េខាងជើង ពិភាក្សារឿងប្រឆាំងចារកម្ម

យោងតាមសារពត៌មាន KCNA បានឲ្យដឹងថា គណៈប្រតិភូនៃការិយាល័យចារកម្មរបស់រុស្ស៊ីបានធ្វើដំណើរទស្សនកិច្ចនៅរដ្ឋធានីព្យុងយ៉ាងរបស់កូរ៉េខាងជើង និងបានពិភាក្សាអំពីការជំរុញកិច្ចសហប្រតិបត្តិការប្រឆាំងនឹងការធ្វើចារកម្មពីប្រទេសជាសត្រូវ ។

​​KCNA បានឲ្យដឹងថា ក្នុងកិច្ចពីភាក្សានោះ នាយកការិយាល័យចារកម្មរុស្ស៊ីលោក Sergei E Naryshkin និងរដ្ឋមន្ត្រីសន្តិសុខរដ្ឋកូរ៉េខាងជើងលោក Ri Chang Dae បានពន្យល់គ្នាទៅវិញទៅមកអំពីស្ថានភាពអន្តរជាតិ និងតំបន់ទាក់ទងនឹងឧបទ្វីបកូរ៉េ និងរុស្ស៊ី ។

ទន្ទឹមនោះ ភាគីទាំងពីរក៏បានពិភាក្សាផងដែរអំពីការជំរុញកិច្ចសហប្រតិបត្តិការបន្ថែមទៀតដើម្បីដោះស្រាយជាមួយនឹង ការធ្វើចារកម្ម និងផែនការដែលកំពុងកើនឡើងដោយកងកម្លាំងអរិភាព ។

ស្របពេលជាមួយគ្នានេះ គណៈប្រតិភូកូរ៉េខាងជើងដឹកនាំដោយលោក Kim Song Nam ប្រធាននាយកដ្ឋានអន្តរជាតិនៃគណបក្សពលករកូរ៉េខាងជើងក៏កំពុងបំពេញទស្សនកិច្ចនៅវៀតណាមផងដែរ ដោយក្នុងនោះបានជួបប្រជុំគ្នាជាមួយលោកស្រី Truong Thi Mai សមាជិកអចិន្ត្រៃយ៍នៃលេខាធិការដ្ឋានបក្សកុម្មុយនីស្តនៅទីក្រុងហាណូយ ។

គួរបញ្ជាក់ថា កិច្ចពិភាក្សាទាំងនេះធ្វើឡើង នៅពេលដែលក្រុងព្យុងយ៉ាងស្វែងរកការពង្រីកទំនាក់ទំនងការទូតរបស់ខ្លួនឡើងវិញ បន្ទាប់ពីបិទប្រទេស ដោយសារវិបត្តិកូវីដ ១៩ ៕

អត្ថបទ ៖ ប៊ុន សុភាព