ចិន ឈ្នះជម្លោះជិត ៣ ឆ្នាំលើ អូស្ត្រាលី នៅ WTO ជុំវិញពន្ធផលិតផលដែក

ប្រទេសចិនបានឈ្នះជម្លោះរយៈពេលជិត ៣ ឆ្នាំជាមួយអូស្ត្រាលីនៅឯអង្គការពាណិជ្ជកម្មពិភពលោក (WTO) ជុំវិញពន្ធលើផលិតផលដែក ។ នេះបើយោងតាមការចេញផ្សាយរបស់សារព័ត៌មាន AP​ កាលពីថ្ងៃទី​២៧ ខែមីនាកន្លងទៅ ។

ប្រទេសចិនបានឈ្នះជម្លោះរយៈពេលជិត ៣ ឆ្នាំដែលទីក្រុងប៉េកាំងបានប្តឹងទៅ WTO ក្នុងខែមិថុនា ឆ្នាំ២០២១ ជុំវិញការយកពន្ធបន្ថែមរបស់អូស្ត្រាលីលើការនាំចូលដែកពីប្រទេសចិន ស្របពេលដែលទំនាក់ទំនងទ្វេភាគីរវាងប្រទេសទាំងពីរកំពុងធ្លាក់ចុះ ។

ពាក់ព័ន្ធនឹងបញ្ហានេះដែរ រដ្ឋមន្ត្រីពាណិជ្ជកម្មអូស្ត្រាលីបាននិយាយកាលពីថ្ងៃពុធថា រដ្ឋាភិបាលអូស្ត្រាលីបានទទួលយកសេចក្តីសម្រេចនេះ ខណៈពាណិជ្ជកម្មលើផលិតផលទាំងនេះមានតម្លៃ ៦២ លានដុល្លារអូស្ត្រាលី ស្មើរនឹង ៤០.៤ លានដុល្លារ ក្នុងឆ្នាំ ២០២២ ។

យោងតាមគណៈកម្មាការ WTO ដែលវិនិច្ឆ័យលើករណីនេះនៅទីក្រុងហ្សឺណែវប្រទេសស្វីសបានរកឃើញថា អាជ្ញាធរស៊ើបអង្កេតរបស់អូស្ត្រាលីបានធ្វើសកម្មភាពមិនស្របនឹងមាត្រាមួយចំនួននៃកិច្ចព្រមព្រៀង ទើបសម្រេចឲ្យចិនឈ្នះបណ្ដឹងនេះ ។

ចំណែកអូស្ត្រាលីវិញក៏បានលើកឡើងដែរថា រដ្ឋាភិបាលទីក្រុងកង់បេរ៉ាបានទទួលយកសេចក្តីសម្រេចរបស់ WTO និងគាំទ្រប្រព័ន្ធពាណិជ្ជកម្មផ្អែកលើច្បាប់ ហើយអូស្ត្រាលីនឹងចូលរួមជាមួយប្រទេសចិន ក៏ដូចជាចាត់វិធានការដើម្បីអនុវត្តតាមការរកឃើញរបស់ក្រុមប្រឹក្សា ។

គួរបញ្ជាក់ថា ពន្ធគយគឺជាប្រធានបទដ៏ក្តៅគគុករវាងទីក្រុងប៉េកាំង និងទីក្រុងកង់បេរ៉ាក្នុងរយៈពេលប៉ុន្មានឆ្នាំចុងក្រោយនេះ បន្ទាប់ពីប្រទេសចិនបានដាក់ទណ្ឌកម្មលើទំនិញអូស្ត្រាលីក្នុងឆ្នាំ ២០២០ ហើយតាម​ការ​ប៉ាន់​ស្មាន​ ពន្ធ​នេះ​បាន​ធ្វើ​ឲ្យសេដ្ឋកិច្ច​អូស្ត្រាលី​ខាតបង់​ដល់​ទៅ ១៣ ពាន់​លាន​ដុល្លារ ខណៈចាប់តាំងពីពេលនោះមក ពន្ធគយភាគច្រើនត្រូវបានដកចេញ ខណៈដែលទំនាក់ទំនងចិន និងអូស្ត្រាលីត្រូវកាត់ផ្ដាច់ ប៉ុន្តែពន្ធលើស្រា និងផលិតផលមួយចំនួននៅតែមានដដែល ៕

អត្ថបទ៖ ប៊ុន សុភាព