តើ ណាតូ អាចប្រើមាត្រា៥បានទេ បើកងទ័ពខ្លួន ត្រូវរុស្ស៊ី បាញ់នៅអ៊ុយក្រែន?

ជុំវិញរឿងរ៉ាវកងទ័ពរបស់ប្រទេសជាសមាជិកអង្គការណាតូ ឈរជើងក្នុងប្រទេសអ៊ុយក្រែន បានចោទជាសំណួរថាតើ ប្រសិនបើភាគីរុស្ស៊ី បាញ់លើពួកគេមែន តើណាតូនឹងយកមាត្រារបស់ខ្លួនមកប្រើដែរឬអត់នោះ, ពេលនេះ ក្រុមអ្នកជំនាញសភាអាល្លឺម៉ង់ បានចេញមុខបញ្ជាក់ថា ពិតអាចមិនអាចប្រើបានឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរបាយការណ៍ដែលមើលឃើញដោយ សារព័ត៌មាន DPA កាលពីថ្ងៃសុក្រទី២៩ខែមីនា, មាត្រា៥នៃសន្ធិសញ្ញាណាតូ ដែលបញ្ជាក់ពីគោលនយោបាយឆ្លើយតបផ្នែកយោធារួមរបស់ប្លុកនេះ គឺមិនអាចប្រើបានឡើយ ប្រសិនបើកងទ័ពរបស់សមាជិកខ្លួនដែលដាក់ពង្រាយនៅអ៊ុយក្រែន ត្រូវបានរុស្ស៊ីវាយប្រហារមែន។

ក្រុមអ្នកជំនាញបានសរសេរថា, ដោយឆ្លុះបញ្ចាំងពីគោលការណ៍ការពារសមូហភាពរបស់សមាជិកណាតូទាំង៣១, មាត្រា៥ចែងថា ការវាយប្រហារដោយប្រដាប់អាវុធប្រឆាំងនឹងសមាជិកមួយឬច្រើន នឹងត្រូវចាត់ទុកថាជាការវាយប្រហារលើសមាជិកទាំងអស់។ ប៉ុន្តែប្រសិនបើកងទ័ពនៃរដ្ឋសមាជិកណាតូ ចូលរួមក្នុងការការពារ ដើម្បីគាំទ្រប្រទេសមួយនៅក្នុងជម្លោះកំពុងផ្ទុះ ហើយត្រូវបានវាយប្រហារដោយភាគីម្ខាងទៀត ក្នុងតំបន់ជម្លោះ បានន័យថា នេះមិនមែនជាករណីនៃសន្ធិសញ្ញា ណាតូ​ មាត្រា៥នោះទេ។

តើហេតុអ្វី? ចម្លើយគឺ មាត្រា៥នៃសន្ធិសញ្ញាណាតូ អាចកើតឡើងបានលុះត្រាតែប្រទេសជាសមាជិកនៃប្លុកយោធាដឹកនាំដោយអាមេរិកមួយនេះ ត្រូវរងការវាយប្រហារដោយផ្ទាល់លើទឹកដីរបស់ពួកគេ។

លើសពីនេះ ក្រុមអ្នកជំនាញបានកត់សម្គាល់ថា ការដាក់ពង្រាយកងទ័ពជើងគោកពីសមាជិកណាតូមួយ ទៅកាន់ប្រទេសអ៊ុយក្រែន នឹងមិនបណ្តាលឲ្យអង្គការទាំងមូល ចូលរួមក្នុងជម្លោះដោយស្វ័យប្រវត្តិឡើយ ពោលគឺពាក់ព័ន្ធតែប្រទេសដែលបញ្ជូនទ័ពទៅនោះប៉ុណ្ណោះ។

ការជជែកវែកញែកនេះ កើតឡើង បន្ទាប់ពីប្រធានាធិបតីបារាំងលោក Emmanuel Macron បាននិយាយកាលពីខែមុនថា លោកមិនបដិសេធលទ្ធភាព នៃការបញ្ជូនទ័ពពីប្រទេសណាតូទៅ អ៊ុយក្រែនឡើយ។

ទោះបីជាយ៉ាងណាក៏ដោយ ទីក្រុងមូស្គូ នឹងចាត់ទុកកងទ័ពលោកខាងលិចនៅអ៊ុយក្រែន ថាជា “អ្នកឈ្លានពាន” ហើយនឹងមានការឆ្លើយតបសមស្រប៕

អត្ថបទ៖ សុខ សុវណ្ណ

ចុចអាន៖ តាមពិត លោក ពូទីន ក៏ធ្លាប់ចង់នាំរុស្ស៊ី ចូល ណាតូ ដែរ