ព័ត៌មានអន្ដរជាតិ

មនុស្សរាប់ម៉ឺននាក់ធ្វើបាតុកម្មប្រឆាំងរដ្ឋាភិបាលលោក Netanyahu

បានផុស

១០ ខែ មុន

នៅ

ថ្ងៃចន្ទ ១ មេសា ២០២៤

ដោយ

មនុស្សរាប់ម៉ឺននាក់បានធ្វើបាតុកម្មនៅទីក្រុងហ្សេរុយសាឡឹមអំពាវនាវឲ្យបង្កើនកិច្ចខិតខំប្រឹងប្រែងដើម្បីដោះលែងអ្នកដែលត្រូវបានចាប់ឃុំខ្លួននៅហ្គាហ្សា និងដកលោកនាយករដ្ឋមន្ត្រី Benjamin Netanyahu ចេញពីតំណែង ។ នេះបើយោងតាមការចេញផ្សាយរបស់សារព័ត៌មាន Reuters កាលពីថ្ងៃទី៣១ ខែមីនា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមបាតុកររាប់ម៉ឺននាក់កាលពីល្ងាចថ្ងៃអាទិត្យបានបិទផ្លូវហាយវេក្នុងទីក្រុងសំខាន់ៗ បន្ទាប់ពីបានប្រមូលផ្តុំគ្នានៅមុខសភាអ៊ីស្រាអែល រួមទាំងដុតភ្លើង គ្រវីទង់ជាតិ និងស្រែកឲ្យមានការបោះឆ្នោតថ្មី ។ ក្រុមបាតុករជាច្រើនបានកាន់បដាមុខលោក Netanyahu ប្រឡាក់ដោយឈាម ដោយចោទប្រកាន់ថា នាយករដ្ឋមន្ត្រីអ៊ីស្រាអែលរូបនេះ មិនបានការពារប្រទេសពីក្រុមហាម៉ាសឡើយ ខណៈការតវ៉ានេះគឺជាការប្រមូលផ្ដុំគ្នាដ៏ធំបំផុត ចាប់តាំងពីសង្គ្រាមនៅហ្គាហ្សាបានផ្ទុះឡើងក្នុងខែតុលា ។

ឆ្លើយតបនឹងការតវ៉ានេះ ប៉ូលិសបានប្រើកាណុងបាញ់ទឹកប្រឆាំងនឹងហ្វូងមនុស្ស ហើយបានឡោមព័ទ្ធ និងរុញបាតុករឲ្យត្រឡប់មកវិញ ខណៈពួកគេបានស្រែកថា លោក Netanyahu ត្រូវតែចាកចេញពីតំណែង ។

ទាក់ទងនឹងបញ្ហានេះ ខុទ្ទកាល័យនាយករដ្ឋមន្ត្រីរបស់លោក Netanyahu បានប្រឈមមុខនឹងការរិះគន់យ៉ាងចាស់ដៃជុំវិញការបរាជ័យផ្នែកសន្តិសុខក្នុងការវាយប្រហាររបស់ក្រុមហាម៉ាសលើភាគខាងត្បូងប្រទេសអ៊ីស្រាអែល ដែលបណ្ដាលឲ្យមនុស្សចំនួន ១,២០០ នាក់ត្រូវបានសម្លាប់ និងជាង ២៥០ នាក់ត្រូវបានចាប់ធ្វើជាចំណាប់ខ្មាំងទៅកាន់តំបន់ហ្គាហ្សា ។

ទន្ទឹមនោះ បញ្ហានេះកាន់តែដាក់សម្ពាធខ្លាំងឡើងលើលោកនាយករដ្ឋមន្ត្រី ស្របពេលក្រុមគ្រួសារនៃអ្នកដែលត្រូវបានចាប់ឃុំខ្លួនដោយក្រុមហាម៉ាសនៅតែបន្តធ្វើការតវ៉ា និងទាមទារឥតឈប់ឈរ ។ គ្រួសារទាំងនោះបានសន្យាថា នឹងដើរតាមដងផ្លូវជារៀងរាល់យប់ក្នុងសប្តាហ៍នេះ ខណៈពួកគេអំពាវនាវឲ្យរដ្ឋាភិបាលនាំអ្នកដែលជាប់ឃុំទាំងនោះមកវិញ ។

គួរបញ្ជាក់ថា សូម្បីតែមុនពេលសង្រ្គាមរបស់អ៊ីស្រាអែលលើតំបន់ហ្គាហ្សាក៏លោក Netanyahu ប្រឈមមុខនឹងការតវ៉ាតាមដងផ្លូវជាច្រើនខែផងដែរជុំវិញកំណែទម្រង់ប្រព័ន្ធតុលាការដ៏ចម្រូងចម្រាស ៕