អន្ទង់រាប់ពាន់ក្បាល ងាប់យ៉ាងអាថ៌កំបាំងនៅ នូវែលសេឡង់

ប្រទេសនូវែលសេឡង់ កើតចម្ងល់យ៉ាងខ្លាំង ហើយពេលនេះកំពុងស៊ើបអង្កេត ករណីដែលសត្វអន្ទង់៣៥០០ក្បាល ងាប់យ៉ាងអាថ៌កំបាំងបំផុត ក្នុងប្រឡាយទឹក Kauritutahi នៅកោះភាគខាងជើងប្រទេស។ នេះបើតាមការចុះផ្សាយរបស់សារព័ត៌មាន Yahoo កាលពីថ្ងៃចន្ទទី១ខែមេសា។

នេះ​ជា​ការ​ងាប់​សត្វ​អន្ទង់​ទ្រង់ទ្រាយធំលើក​ទី​ពីរ​នៅ​​ប្រទេសនូវែលសេឡង់ ​ក្នុង​ឆ្នាំ​២០២៤ ខណៈលើកមុន ករណីបែបនេះកើតឡើងក្នុងទីក្រុង Mataura នៃតំបន់ Southland កាលពីខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ត្បិតអីករណីនៅ Mataura ពេលនោះ ត្រូវបានគេសន្មត់ថា បណ្តាលមកពីសារធាតុពុលក្នុងទឹកក៏ដោយ ប៉ុន្តែករណីកើតឡើងនៅ Kauritutahi ពេលនេះ មិនត្រូវបានគេដឹងច្បាស់ឡើយ។ ទោះបីជាយ៉ាងណាក៏ដោយ អាជ្ញាធរ បានដាក់ការសង្ស័យថា វាអាចបណ្តាមកពីព្រឹត្តិការណ៍ ទាក់ទងនឹងបម្រែបម្រួលអាកាសធាតុ។

យោងតាមវិទ្យាស្ថានជាតិនៃការស្រាវជ្រាវទឹកនិងបរិយាកាសរបស់ប្រទេសនូវែលសេឡង់, តាមធម្មតា អន្ទង់តែងបម្លាស់ទីចាប់ពីចន្លោះចុងខែវិច្ឆិកាដល់ដើមខែមីនា នៅពេលសីតុណ្ហភាពឡើងកើនដល់ប្រហែល១៦អង្សាសេ។

ពេលនោះហើយ សត្វអន្ទង់ ចាប់ផ្តើមលូតលាស់កាន់តែធំ ប៉ុន្តែដោយសារបច្ចុប្បន្ន ក្រុមអ្នកវិទ្យាសាស្រ្តបានរកឃើញថា នៅកន្លែងផ្សេងក៏មានសត្វអន្ទង់រាប់ពាន់ក្បាលងាប់ក្នុងប្រឡាយទឹក សម្បូរដោយសារ៉ាយ ដែលឡើងក្តៅដោយសារបម្រែបម្រួលអាកាសធាតុផងដែរនោះ ទើបពួកគេទាញការសន្និដ្ឋានថា ករណីនៅនូវែលសេឡង់នេះ ក៏មិនខុសគ្នាដែរ៕

អត្ថបទ៖ សុខ សុវណ្ណ

ចុចអាន៖ អ្នកនាំពាក្យ៖ កម្ពុជា នឹងនាំចេញបង្កងប៉ាក អន្ទង់ ត្រីដំរី និងខ្យង ទៅទីផ្សារចិនឆាប់ៗនេះ