ន័រវែស ដើមតាម ដាណឺម៉ាក ត្រៀមបង្កើនចំនួនទាហានដល់ ១៣,៥០០ នាក់នៅឆ្នាំ ២០៣៦

រដ្ឋាភិបាលន័រវេសប្រកាសនឹងបង្កើនចំនួនទាហានដែលបច្ចុប្បន្នមាន ៩,០០០ ឡើងទៅដល់ ១៣,៥០០ នាក់នៅត្រឹមឆ្នាំ ២០៣៦ ។ នេះបើយោងតាមការចេញផ្សាយដោយទីភ្នាក់ងារព័ត៌មាន AP នៅថ្ងៃទី​​៣ ខែមេសានេះ ។

យោងតាមរដ្ឋមន្ត្រីការពារជាតិន័រវេសបានឲ្យដឹងថា កងកម្លាំងប្រដាប់អាវុធរបស់ប្រទេសនេះនឹងកើនឡើងចំនួនបន្តិចម្តងៗជារៀងរាល់ឆ្នាំ ជាពិសេសប្រាក់ជាច្រើនរយលានដុល្លារក៏នឹងត្រូវវិនិយោគចូលទៅក្នុងរោងចក្ររបស់កងកម្លាំងប្រដាប់អាវុធន័រវេសនៅតំបន់ Terningmoen ភាគខាងជើងនៃទីក្រុង Oslo ជាកន្លែងដែលសមាជិកណាតូនឹងកែនទាហានថ្មីចូលក្នុងអង្គភាព ។

ចំណែកទីភ្នាក់ងារព័ត៌មានន័រវេស NTB បាននិយាយថា គោលបំណងរបស់ប្រទេសន័រវែសគឺដើម្បីឲ្យកងកម្លាំងរបស់ប្រទេសនេះឈានដល់ ១៣,៥០០ នាក់នៅឆ្នាំ ២០៣៦ ។

គួរបញ្ជាក់ថា ការបង្កើនចំនួនកងទ័ពរបស់ប្រទេសជាសមាជិកអង្គការណាតូមួយនេះកើតមានឡើង បន្ទាប់ពីប្រទេសជិតខាងដាណឺម៉ាកកាលពីខែមុនបានបង្កើនចំនួនយុវជន ក៏ដូចជាស្ត្រីឲ្យចូលបម្រើកងយោធា និងបង្កើនពេលវេលាពី ៤ ខែដល់ ១ ខែ ដោយសារតែប្រទេសទាំងពីរនេះ សុទ្ធសឹងតែជាអ្នកគាំទ្រអ៊ុយក្រែនក្នុងភ្លើងសង្គ្រាមប្រឆាំងនឹងរុស្ស៊ី ៕

អត្ថបទ ៖ ប៊ុន សុភាព