ផ្ទុះការបាញ់ប្រហារក្នុងហាងលក់កាំភ្លើងនៅអាមេរិក ស្លាប់ ៣ នាក់

មនុស្ស ៣ នាក់ត្រូវបានសម្លាប់ និង ២ នាក់រងរបួសនៅក្នុងការបាញ់ប្រហារនៅហាងលក់កាំភ្លើងក្នុងរដ្ឋ Louisiana សហរដ្ឋអាមេរិក ។

ប៉ូលិសក្នុងតំបន់បាននិយាយថា “ដំបូងឡើយខ្មាន់កាំភ្លើងបានបើកការបាញ់ប្រហារលើមនុស្ស ២ នាក់ ខណៈដែលមនុស្សជាច្រើននាក់ផ្សេងទៀតនៅហាងនោះបានបាញ់តបតវិញផងដែរ ។ ក្រោយមកមនុស្សទាំង ២ នាក់ និងខ្មាន់កាំភ្លើងត្រូវបានសម្លាប់ ។ ពួកគេមិនត្រូវបានគេស្គាល់អត្តសញ្ញាណជាសាធារណៈនោះទេ” ។

ក្រុមមន្រ្តីបាននិយាយថា ការស៊ើបអង្កេតលើការបាញ់ប្រហារនៅឯហាង Jefferson Gun នៅជាយក្រុង New Orleans កំពុងបន្ត ។

មេប៉ូលិសក្រុងលោក Joseph Lopinto បានប្រាប់ក្រុមអ្នកយកព័ត៌មានថា “វាហាក់ដូចជាមានបុគ្គលមួយចំនួនបានចូលរួមបាញ់ប្រហារលើជនសង្ស័យនោះ ។ ខ្ញុំយល់ថា មានអ្នកបាញ់ជាច្រើននៅទីនេះដែលជាអតិថិជន បុគ្គលិក ឬបុគ្គលដែលចូលទិញកាំភ្លើងនៅទីតាំងនោះ ។ យើងកំពុងព្យាយាមបញ្ចូលវាជាមួយគ្នាដើម្បីធ្វើការស៊ើបអង្កេត” ។

ចំណែកបុរសម្នាក់ឈ្មោះ Tyrone Russell ដែលស្ថិតនៅក្នុងហាងលក់កាំភ្លើងនៅពេលការបាញ់ប្រហារបានកើតឡើងនៅរសៀលថ្ងៃសៅរ៍ប្រាប់ទីភ្នាក់ងារសារព័ត៌មាន AP ថា “យើងបានឮសម្លេងកាំភ្លើង និងសម្លេងស្រែក ។ នៅពេលប៉ូលិសមកដល់ពួកគេបាននាំយើងចេញទៅក្រៅ ។ វាជាហេតុការណ៍ដែលគួរឲ្យខ្លាចណាស់” ។

ការិយាល័យប៉ូលិសបាននិយាយថា មនុស្សទាំង ២ នាក់ដែលរងរបួសក្នុងការបាញ់ប្រហារនោះស្ថិតក្នុងស្ថានភាពធូរស្រាលនៅក្នុងមន្ទីរពេទ្យ ៕

ប្រែសម្រួលដោយ ៖ ជីវ័ន្ត

ប្រភព ៖ BBC

ចុចអាន ៖ អ៊ីរ៉ង់ឲ្យសហរដ្ឋអាមេរិកដកទណ្ឌកម្មទាំងអស់ មុនពេលចរចា

ចុចអាន ៖ អាមេរិកបន្ថែមការជំរុញរបបយោធាមីយ៉ាន់ម៉ា បោះបង់អំណាច ក្រោយបាតុករស្លាប់លើកដំបូង