៦០ឆ្នាំខាងមុខ ថៃ ក្តៅរឹតខ្លាំង សីតុណ្ហភាព នឹង​ហក់ឡើងដល់ ៥០អង្សាសេ

ពីមួយឆ្នាំទៅមួយឆ្នាំ កម្តៅនៅប្រទេសថៃ មានការកើនឡើងជាលំដាប់ គ្មានថមថយសោះ​ហើយ៦០ឆ្នាំខាងមុខ ប្រទេសនេះនឹងជួបប្រទះសីតុណ្ហភាពឈានដល់៥០អង្សាសេឯណោះ។ នេះបើតាមការព្រមានរបស់អ្នកជំនាញ Seree Supratid នាយកមជ្ឈមណ្ឌលបម្រែបម្រួលអាកាសធាតុនិងគ្រោះមហន្តរាយនៃសាកលវិទ្យាល័យ Rangsit។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Bangkok Post កាលពីថ្ងៃពុធទី៣ខែមេសា លោក Seree បានបង្ហោះនៅលើទំព័រ Facebook របស់ខ្លួនដោយអះអាងថា កម្តៅនឹងឡើងដល់ចំណុចកំពូលនៅថ្ងៃចន្ទខាងមុខ ហើយនឹងធ្លាក់ចុះវិញបន្តិចក្រោយចប់ពិធីបុណ្យសង្ក្រាន្តឆ្នាំថ្មី បានមួយសប្តាហ៍។

ការព្យាកររបស់គាត់ គឺផ្អែកលើបញ្ហាដែលមេដឹកនាំពិភពលោក មិនអាចធ្វើតាមសន្យា ក្នុងកិច្ចព្រមព្រៀងទីក្រុងប៉ារីសឆ្នាំ២០១៦ ទោះកាលនោះ ពួកគេប្តេជ្ញារក្សាការកើនឡើងនៃសីតុណ្ហភាពជាមធ្យមរបស់ពិភពលោក ឲ្យស្ថិតនៅខាងក្រោម ២អង្សាសេ លើសកម្រិតមុនឧស្សាហកម្មក៏ដោយ។

កិច្ចព្រមព្រៀងនេះ មានគោលបំណងកំណត់ការបំភាយឧស្ម័នផ្ទះកញ្ចក់ ដែលបណ្តាលឲ្យមានការឡើងកម្តៅផែនដី ឈានដល់បង្កជាបាតុភូតអាកាសធាតុធ្ងន់ធ្ងរដូចជា El Nino និង La Nina ចន្លោះឆ្នាំ ២០៥០ ដល់ឆ្នាំ ២១០០។

តាមការបញ្ជាក់ពីលោក Seree, ខេត្តមួយរបស់ថៃ ដែលនឹងជួបប្រទះសីតុណ្ហភាពហក់ឡើងខ្ពស់ជាងគេបំផុតក្នុងរយៈពេលប៉ុន្មានឆ្នាំខាងមុខ គឺ Sukhothai ហើយខេត្តជាបន្តបន្ទាប់មានដូចជា Phichit, Chai Nat, Nakhon Sawan, Maha Sarakham និង Khon Kaen។

អ្វីដែលគេព្រួយបារម្ភរួចទៅហើយនោះគឺថា កាលពីខែមុន ប្រទេសថៃ ត្រូវរងគ្រោះដោយអាកាសធាតុក្តៅបំផុត មិនធ្លាប់ជួបប្រទះសោះ ក្នុងប្រវត្តិសាស្រ្តរយៈពេល៧៣ឆ្នាំ។

នាយកដ្ឋានឧតុនិយមថៃ (TMD) បានឲ្យដឹងថា ខេត្ត Mae Hong Son, Uttaradit, Sukhothai, Tak និង Udon Thani គឺជាខេត្តក្តៅបំផុតចំនួន៥ក្នុងឆ្នាំ២០២៤ ពោលគឺសីតុណ្ហភាពនឹងឡើងដល់ ៤៤អង្សាសេឬខ្ពស់ជាងនេះទៅទៀត។

គ្មានអ្វីត្រូវឆ្ងល់ឡើយ អាកាសធាតុដ៏ក្ដៅគគុកនៅឆ្នាំនេះ គឺបណ្តាលមកពីឥទ្ធិពល El Nino ដែលកំពុងវាយប្រហារពាសពេញពិភពលោក ដោយបង្កឲ្យមានគ្រោះរាំងស្ងួត ភ្លៀងធ្លាក់ខ្លាំង និងសីតុណ្ហភាពហក់ឡើងខ្ពស់ក្នុងកំណត់ត្រាថ្មីៗ៕

អត្ថបទ៖ សុខ សុវណ្ណ

ចុចអាន៖ ថៃ ក្តៅសឹងឆេះ ខណៈសីតុណ្ហភាព ហក់ឡើងខ្ពស់បំផុត ក្នុងប្រវត្តិសាស្រ្ត ៧៣ឆ្នាំ