យោធា មីយ៉ាន់ម៉ា បាញ់ទម្លាក់ដ្រូន ៧ គ្រឿងរបស់ក្រុមប្រឆាំង

យោធាមីយ៉ាន់ម៉ាបានបាញ់ទម្លាក់យន្តហោះដ្រូនចំនួន ៧ គ្រឿងពីលើរដ្ឋធានីណៃពិដោ បន្ទាប់ពីក្រុមប្រឆាំងបើកការវាយដ៏កម្រមួយទៅលើរដ្ឋាភិបាលយោធា ។ នេះបើយោងតាមការចេញផ្សាយរបស់សារព័ត៌មាន CNA កាលពីថ្ងៃទី០៤ ខែ មេសាកន្លងទៅ ។ ​

បណ្ដាញព័ត៌មានរបស់ក្រុមយោធាបាននិយាយនៅក្នុងសេចក្ដីថ្លែងការណ៍មួយថា យន្តហោះដ្រូនចំនួន ៤ គ្រឿងដែលហោះតម្រង់ទៅអាកាសយានដ្ឋានណៃពិដោ និង ៣ គ្រឿងទៀតហោះចូលទៅជិតតំបន់ Zayarthiri ត្រូវបានបាញ់ទម្លាក់ និងកម្ទេចដោយជោគជ័យទាំងមិនមានការខូចខាត ឬអ្នករងរបួសនោះឡើយ ។

ចំណែកយោងតាមប្រភពពីអាកាសយានដ្ឋានបានឲ្យដឹងថា បន្ទាប់ពីឧបទ្ទវហេតុនេះកើតឡើងហើយ ខាងអាកាសយានដ្ឋានណៃពិដោក៏ត្រូវបង្ខំចិត្តបិទជាបណ្តោះអាសន្នផងដែរ ខណៈ​យន្តហោះដ្រូន​មួយ​គ្រឿងក្នុង​ចំណោម​យន្តហោះ​ដ្រូន​ដែល​ត្រូវ​​បាញ់​ទម្លាក់​ទាំងនោះ​ គឺមានផ្ទុកគ្រាប់​បែក​ ។

គួរបញ្ជាក់ថា ការធ្វើរដ្ឋប្រហារយោធាទម្លាក់រដ្ឋាភិបាលស៊ីវិលរបស់លោកស្រី អ៊ុងសាន ស៊ូជី កាលពីឆ្នាំ ២០២១ កន្លងទៅពីសំណាក់យោធាបានបង្កឲ្យមានការប្រយុទ្ធគ្នាជាថ្មីនឹងក្រុមប្រដាប់អាវុធជនជាតិភាគតិចដែលបានព្រួតដៃគ្នាជាមួយកងកម្លាំងការពារប្រជាជន (PDF) ដែលក្រុមគាំទ្រលទ្ធិប្រជាធិបតេយ្យ ​ខណៈការបាញ់បង្ហោះដ្រូនទាំងប៉ុន្មាននេះគឺជាស្នាដៃរបស់ក្រុម PDF នេះឯង ។

ទន្ទឹមនោះ ចាប់តាំងពីអស់គ្រាប់កាំភ្លើងមក ក្រុមប្រឆាំងនឹងរដ្ឋាភិបាលយោធាបានងាកទៅប្រើប្រាស់យន្តហោះដ្រូនដើម្បីទម្លាក់គ្រាប់បែកទៅលើទីតាំងនានារបស់យោធា ជាមួយនឹងប្រសិទ្ធភាពនៃការបំផ្លិចបំផ្លាញកម្រិតខ្ពស់ ។ ជាក់ស្ដែងក្នុងរយៈពេលប៉ុន្មានខែថ្មីៗនេះ រលកនៃការវាយប្រហារដោយការទម្លាក់គ្រាប់បែកនៅទូទាំងប្រទេសមីយ៉ាន់ម៉ា ដែលរួមមានទាំងការវាយប្រហារលើអាកាសយានដ្ឋានផងនោះ បានសម្លាប់ឧត្តមសេនីយទោម្នាក់នៅជិតព្រំដែនប្រទេសចិន ដែលបង្កឲ្យមានការជម្លៀសកងទ័ពយោធាជាច្រើនចេញពីទីតាំងទាំងនោះផងដែរ ៕

អត្ថបទ ៖ ប៊ុន សុភាព