តៃវ៉ាន់ កំពុងតាមរកមនុស្ស១៨នាក់ទៀត ដែលបាត់ខ្លួនក្នុងគ្រោះរញ្ជួយដី

ប៉ុន្មានថ្ងៃបន្ទាប់ពីគ្រោះរញ្ជួយដីដ៏ខ្លាំងក្លាវាយប្រហារកោះតៃវ៉ាន់, ក្រុមអ្នកជួយសង្គ្រោះនៅតែកំពុងស្វែងរកមនុស្សចំនួន១៨នាក់ទៀត ដែលកំពុងបាត់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមតួលេខគិតត្រឹមថ្ងៃសុក្រទី៥ខែមេសាដែលផ្សាយដោយ Reuters, មនុស្សចំនួន១០នាក់ ត្រូវបានបញ្ជាក់ថា ស្លាប់ខណៈរាប់រយនាក់រងរបួស។ មិនត្រឹមប៉ុណ្ណឹង គ្រោះរញ្ជួយដីកម្រិត៧.២រ៉ិចទ័រមួយនេះ ក៏បណ្តាលឲ្យអគារជាច្រើនខូចខាតនិងបាក់រលំផងដែរ។ 

តាមការបញ្ជាក់ពីនាយកដ្ឋានពន្លត់អគ្គិភ័យកោះតៃវ៉ាន់, ក្នុងចំណោមមនុស្សទាំង១៨នាក់ដែលរកមិនទាន់ឃើញ ក៏រួមមានជនបរទេសចំនួន៤នាក់ផងដែរ ដោយពួកគេមានសញ្ជាតិឥណ្ឌា កាណាដា និងអូស្រ្តាលី។

ស្របពេលជាមួយគ្នានោះដែរ ក្រុមអ្នកជួយសង្គ្រោះអះអាងថា មនុស្សប្រហែល៤០០នាក់ដែលជាប់នៅសណ្ឋាគារប្រណីតក្នុងឧទ្យានជាតិ Taroko Gorge ពេលនេះមានសុវត្ថិភាពហើយ។

លោក Su Yu-ming ប្រធានក្រុមស្វែងរកនិងជួយសង្គ្រោះទីក្រុង Kaohsiung និយាយថា “យើងកំពុងមើលការព្យាករអំពីអាកាសធាតុក្រែងលោមេឃភ្លៀង ហើយបើភ្លៀងមែន ក្រុមរបស់យើងនឹងបំពាក់ឧបករណ៍ការពារខ្លួន ព្រោះថា ភ្លៀងអាចបង្កហានិភ័យបាក់ផ្ទាំងថ្ម និងបំណាក់ដី ដែលបច្ចុប្បន្ននេះជាបញ្ហាធំបំផុតដែលយើងត្រូវប្រឈមមុខ។ កត្តាទាំងនេះមិនអាចទាយទុកជាមុនបានទេ ដូច្នេះមានន័យថា យើងមិនអាចបញ្ជាក់បានឡើយថាតើ ប្រតិបត្តិការស្វែងរក និងជួយសង្គ្រោះរបស់យើងត្រូវចំណាយពេលប៉ុន្មានថ្ងៃ”។

សូមបញ្ជាក់ជាថ្មី គ្រោះរញ្ជួយដីក្បែរកោះ Hualien លើកនេះគឺជាគ្រោះរញ្ជួយដី ដែលមានកម្លាំងខ្លាំងបំផុតវាយប្រហារតៃវ៉ាន់ ក្នុងរយៈពេល២៥ឆ្នាំចុងក្រោយ។

ទោះបីជាយ៉ាងណាក៏ដោយ ការរញ្ជួយដីកម្រិតធ្ងន់នៅភាគខាងត្បូងកោះតៃវ៉ាន់ ក្នុងឆ្នាំ២០១៦ បានសម្លាប់មនុស្សជាង១០០នាក់ ខណៈក្នុងឆ្នាំ១៩៩៩ គ្រោះធម្មជាតិនេះ ផ្តាច់ជីវិតមនុស្សជាង ២ ០០០នាក់៕

អត្ថបទ៖ សុខ សុវណ្ណ

ចុចអាន៖ តៃវ៉ាន់ បញ្ចេញកញ្ចប់ទឹកប្រាក់ជាង ៩ លានដុល្លារ ស្ដារថ្លៃខូចខាតពីគ្រោះ រញ្ជួយដី