ព័ត៌មានអន្ដរជាតិ

អ៊ីស្រាអែល បិទស្ថានទូតនៅ ២៨ប្រទេស ខ្លាចអ៊ីរ៉ង់ សងសឹក ខណៈអាមេរិក បារម្ភផ្ទុះសង្គ្រាមធំ

បានផុស

៦ ខែ មុន

នៅ

ថ្ងៃសៅរ៍ ៦ មេសា ២០២៤

ដោយ

តាមការចុះផ្សាយរបស់សារព័ត៌មាន Sky News Arabia កាលពីថ្ងៃសុក្រទី៥ខែមេសា, រដ្ឋាភិបាលអ៊ីស្រាអែល បានបិទស្ថានទូតនៅ២៨ប្រទេសជុំវិញពិភពលោក ដោយសារខ្លាចអ៊ីរ៉ង់សងសឹក ចំពោះការវាយប្រហារលើស្ថានកុងស៊ុលរបស់ខ្លួននៅទីក្រុងដាម៉ាស ក្នុងប្រទេសស៊ីរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយឡែក ស្ថានីយ៍វិទ្យុ Kan រាយការណ៍ថា ក្រសួងការបរទេសអ៊ីស្រាអែល បានសម្រេចចិត្តបែបនេះ បន្ទាប់ពីពិគ្រោះយោបល់ជាមួយភ្នាក់ងារអនុវត្តច្បាប់នានា។ បើតាមគេដឹង ក្នុងការពិគ្រោះយោបល់នោះ បានលើកឡើងពីក្តីកង្វល់ថា ស្ថានទូតមួយចំនួន គួរតែផ្អាកប្រតិបត្តិការសិន ដើម្បីត្រៀមខ្លួន ខ្លាចអ៊ីរ៉ង់សងសឹក ចំពោះការវាយប្រហារនៅទីក្រុង ដាម៉ាស។

យ៉ាងណាក៏ដោយ អ្នកនាំពាក្យក្រសួងការបរទេសអ៊ីស្រាអែល លោក Lior Haiat បានបដិសេធសំណើរបស់សារព័ត៌មាន TASS រុស្ស៊ី ដែលសុំឲ្យធ្វើអត្ថាធិប្បាយលើរបាយការណ៍ ពាក់ព័ន្ធការជម្លៀសបុគ្គលិកចេញពីស្ថានទូតមួយចំនួន។

អ្នកនាំពាក្យក្រសួងការបរទេសអ៊ីស្រាអែល លោក Lior Haiat (រូបថត៖ Media Line)

រឿងនេះកើតឡើង បន្ទាប់ពីមេដឹកនាំកំពូលអ៊ីរ៉ង់លោក Ayatollah Ali Khamenei បានបង្ហោះសារលើប្រព័ន្ធផ្សព្វផ្សាយសង្គម X ថា លោកនឹងឲ្យអ៊ីស្រាអែលស្តាយក្រោយ ចំពោះការសម្រេចចិត្តរបស់ខ្លួន វាយប្រហារលើការិយាល័យកុងស៊ុល នៅទីក្រុងដាម៉ាស ដែលសម្លាប់មនុស្ស១៣នាក់ ក្នុងនោះរួមមានទាំងមេទ័ពកំពូល Mohammad Reza Zahedi និងមេទ័ពរងរបស់ឆ្មាំបដិវត្តអ៊ីរ៉ង់ឈ្មោះ Mohammad Hadi Haji Rahimi ផងដែរ។

ទន្ទឹមនេះដែរ សហរដ្ឋអាមេរិក បានបង្ហាញក្តីកង្វល់អំពីភាពតានតឹងកាន់តែខ្លាំងឡើងរវាងអ៊ីរ៉ង់ និងអ៊ីស្រាអែល ដោយទីប្រឹក្សាសន្តិសុខជាតិសេតវិមាន លោក John Kirby ប្រាប់ទៅទូរទស្សន៍ CNN ថា រដ្ឋាភិបាលទីក្រុងវ៉ាស៊ីនតោន មានក្តីព្រួយបារម្ភជាពន់ពេកថា ស្ថានការណ៍ អាចនឹងវិវត្តទៅជាសង្រ្គាមទ្រង់ទ្រាយធំ។

ទីប្រឹក្សាសន្តិសុខជាតិសេតវិមាន លោក John Kirby (រូបថត៖ Mega)

ទោះបែបនេះក្តី លោក Kirby អះអាងថា គ្មាននរណាម្នាក់ ចង់ឃើញជម្លោះកាន់តែរីកធំទេ ប៉ុន្តែសហរដ្ឋអាមេរិក នឹងបន្តឈរជាមួយអ៊ីស្រាអែល ហើយផ្តល់ជំនួយយោធាថែមទៀត។

សូមបញ្ជាក់ជាថ្មី ក្នុងរយៈពេលប៉ុន្មានឆ្នាំចុងក្រោយនេះ អ៊ីស្រាអែល បានបើកការវាយប្រហាររាប់រយលើក ទៅលើគោលដៅនៅតំបន់ដែលគ្រប់គ្រងដោយរដ្ឋាភិបាលស៊ីរី ហើយអ្វីដែលគេបារម្ភគឺថា ការវាយប្រហារតាមអាកាសបែបនេះ ប្រៀបបាននឹងការចាក់សាំងលើភ្លើងពីលើសង្គ្រាមរបស់អ៊ីស្រាអែលប្រឆាំងក្រុមហាម៉ាស នៅតំបន់ហ្គាហ្សាស្ទ្រីប និងការប៉ះទង្គិចគ្នារវាងយោធាអ៊ីស្រាអែលនិងក្រុមហេសបូឡា នៅព្រំដែនលីបង់-អ៊ីស្រាអែល៕

អត្ថបទ៖ សុខ សុវណ្ណ

ចុចអាន៖ ពិភពលោក បង្វែរចក្ខុ ទៅតាមដានស្ថានការណ៍ អ៊ីស្រាអែល-អ៊ីរ៉ង់ ដែលប្រៀបដូច គ្រាប់បែករៀបនឹងផ្ទុះ