លោក ថាក់ស៊ីន ចេញមុខនិយាយជំនួសកូនស្រី ក្រោយមានពាក្យសម្ដីល្អិច​ល្អៀងថា ភឿថៃ ជាបក្សអភិរក្សនិយម

អតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត្រា បានចេញមុខមកនិយាយការពារជំនួសកូនស្រីពាក់ព័ន្ធទៅនឹងព័ត៌មានល្អិចល្អៀង ក៏ដូចជាមានការចោទប្រកាន់ថា គណបក្សភឿថៃគឺជាបក្សអភិរក្សនិយម ។ នេះបើយោងតាមការចេញផ្សាយដោយសារព័ត៌មាន Thai PBS កាលពីថ្ងៃទី៥ ខែមេសាកន្លងទៅ ។

លោក ថាក់ស៊ីន បានបញ្ជាក់ថា គណបក្សភឿថៃមិនមែនជាបក្សអភិរក្សនិយមដូចមាត់អ្នកដទៃនិយាយនោះឡើយ ប៉ុន្តែជាគណបក្សកំណែទម្រង់ ដែលមានអាយុកាលចាប់តាំងតែពីការកកើតគណបក្សថៃស្រឡាញ់ថៃដែលត្រូវបានតុលាធម្មនុញ្ញរំលាយមកម្ល៉េះ ។

ថ្លែងទៅកាន់សមាជិកសមាជិកាបក្សក្នុងសន្និសីទតាមវីដេអូមួយនៅឯកិច្ចប្រជុំទូទៅនៃគណបក្សភឿថៃកាលពីថ្ងៃសុក្រ លោក ថាក់ស៊ីន បានអះអាងថា គណបក្សថៃស្រឡាញ់ថៃដែលត្រូវបានរំលាយចោលទៅហើយនោះ គឺជាគណបក្សដែលណែនាំឲ្យមានការផ្លាស់ប្តូរជាច្រើនដល់សង្គមជាតិថៃ រាប់ចាប់ពី​ប្រព័ន្ធគោលនយោបាយ​សន្តិសុខ​សុខភាព​សកលចំនួន ៣០ ​បាត ផ្ដល់ទៅកាន់​មូលនិធិតាម​ភូមិស្រុក និង​ការធានា​តម្លៃ​ផលិតផល​កសិកម្មជាដើម ។

អតីតនាយករដ្ឋមន្ត្រីវ័យ ៧៤ ឆ្នាំរូបនេះលើកឡើងថា គណបក្សភឿថៃបាននិងកំពុងបន្តអនុវត្តគោលនយោបាយកំណែទម្រង់របស់អ្នកកាន់តំណែងមុនរបស់ខ្លួន ជាពិសេសឥឡូវនេះគណបក្សក៏កំពុងចាប់ផ្តើមគម្រោង “កាបូបលុយឌីជីថល” ដែលលោកចាត់ទុកថាជា “គោលគំនិតថ្មីដ៏អស្ចារ្យ” ។

ឪពុករបស់ប្រធានគណបក្សភឿថៃរូបនេះបញ្ជាក់បន្ថែមថា លោកមានទំនុកចិត្តលើលោកនាយករដ្ឋមន្ត្រី សេដ្ឋា ថាវីស៊ីន នឹងអាចកាច់ចង្កូតនាវានាំប្រទេសថៃឲ្យឆ្ពោះទៅរកការអភិវឌ្ឍន៍បាន ដោយសារលោកជានាយកប្រតិបត្តិអាជីវកម្មដ៏មានបទពិសោធន៍ និងមានទំនាក់ទំនងយ៉ាងគាប់ប្រសើរជាមួយដៃគូវិនិយោគិនបរទេស ។

គួរបញ្ជាក់ថា លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្រ្តីថៃ ត្រូវបានដោះលែងឲ្យមានសេរីភាពឡើងវិញកាលពីថ្ងៃទី១៨ ខែកុម្ភៈ បន្ទាប់ពីអនុវត្តទោសទណ្ឌបានរយៈពេល ៦ ខែ ដោយសារតែស្ថានភាពរបស់លោកស៊ីទៅនឹងលក្ខខណ្ឌនៃការលើកលែងទោសដូចជា លោកស្ថិតក្នុងចំណោមទណ្ឌិត ៩៣០ ដែលចាត់ទុកជាមនុស្សចាស់ និងមានជំងឺ ឬមានអាយុលើស ៧០ ឆ្នាំ បូករួមទាំងស្នាដៃបម្រើប្រទេសជាតិនៅពេលកន្លងមកផងដែរ ៕

ដោយ ៖ សុខ ជីវ័ន្ត

ចុចអាន ៖ ប្រមុខ UN ឲ្យ អ៊ីស្រាអែល ឆ្លើយប្រាប់មកថា ហេតុអ្វីបុគ្គលិកជំនួយមនុស្ស​ធម៌ ១៩៦ នាក់ត្រូវស្លាប់?