លោក Zelensky៖ បើគ្មានជំនួយអាមេរិក អ៊ុយក្រែននឹងចាញ់រុស្ស៊ី 

ប្រធានាធិបតីអ៊ុយក្រែនលោក Volodymyr Zelensky បានព្រមានថា ប្រសិនបើសភាអាមេរិកមិនអនុម័តកញ្ចប់ជំនួយយោធាបន្ថែមទេនោះ អ៊ុយក្រែន នឹងចាញ់មិនខានឡើយ ហើយរុស្ស៊ី នឹងបានដៃទៅវាយប្រហារប្រទេសផ្សេងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងកាលពីថ្ងៃអាទិត្យទី៧ខែមេសា ប្រធានាធិបតីអ៊ុយក្រែនរូបនេះ និយាយថា “យើងត្រូវបញ្ជាក់ឲ្យច្បាស់ដល់សភាអាមេរិកថា ប្រសិនបើពួកគេមិនជួយទេ អ៊ុយក្រែននឹងចាញ់សង្គ្រាមរុស្ស៊ីហើយ។ អ៊ុយក្រែន ពិបាករស់ណាស់ បើគ្មានជំនួយបន្ថែម ហើយ​ប្រសិន​បើ​អ៊ុយក្រែន​ចាញ់​ ប្រទេស​ផ្សេង​ទៀត ក៏​នឹង​ត្រូវ​​វាយ​ប្រហារផងដែរ”។

អ៊ុយក្រែន បាន​អំពាវនាវ​ជា​បន្ទាន់ឲ្យ​ទីក្រុងវ៉ាស៊ីនតោន ​អនុម័ត​កញ្ចប់​ជំនួយ​បន្ថែមទំហំទឹកប្រាក់ ៦០ពាន់​លាន​ដុល្លារ​ ខណៈជំនួយនេះ ត្រូវបាន​គណបក្ស​សាធារណរដ្ឋ​ ​រារាំង​អស់​រយៈពេល​ជាច្រើន​ខែមកហើយ។

ការព្រមានរបស់លោក Zelensky ធ្វើឡើងចំពេល កងកម្លាំងរុស្ស៊ី កំពុងបង្កើនការវាយប្រហារទៅលើទីក្រុង Chasov Yar ក្នុងខេត្ត Donetsk ភាគខាងកើតប្រទេសអ៊ុយក្រែន ដែលមានចម្ងាយមិនដល់៣០គីឡូម៉ែត្រផង ពីទីក្រុង Kramatorsk ដែលជាមជ្ឈមណ្ឌលផ្លូវដែកនិងដឹកជញ្ជូនដ៏សំខាន់របស់អ៊ុយក្រែន។

ស្របពេលជាមួយគ្នានោះដែរ លោក Oleg Kalashnikov អ្នកនាំពាក្យកងពលតូចកាំភ្លើងធំទី២៦របស់អ៊ុយក្រែន ដែលកំពុងប្រយុទ្ធនៅសមរភូមិជួរមុខ Chasov Yar បានទទួលស្គាល់ថា ស្ថានភាពនៅក្នុងតំបន់គឺពិបាកនិងតានតឹងបំផុត ខណៈរុស្ស៊ី​ កំពុងបើកការ​វាយប្រហារ​លើ​ដីគោក និងតាម​អាកាស។

សូមបញ្ជាក់ជាថ្មី នៅថ្ងៃទី២៤ខែកុម្ភៈឆ្នាំ២០២២ រុស្ស៊ី បានបើកប្រតិបត្តិការយោធាពិសេសនៅអ៊ុយក្រែន ក្នុងគោលបំណងរំដោះតំបន់ Donbass ព្រោះថាបើយោងតាមភាគីរុស្ស៊ី, នៅទីនោះប្រជាជននៃសាធារណរដ្ឋ Donetsk និង Lugansk បានរស់នៅក្រោមគ្រាប់ផ្លោងរបស់កងកម្លាំងទីក្រុងកៀវ សឹងរាល់ថ្ងៃ។

គិតមកទល់ពេលនេះ សហរដ្ឋអាមេរិក បានផ្តល់ជំនួយយោធាប្រមាណជា ៤៤.២ពាន់លានដុល្លារ ឲ្យអ៊ុយក្រែន ដើម្បីទប់ទល់ជាមួយរុស្ស៊ី៕

អត្ថបទ៖ សុខ សុវណ្ណ

ចុចអាន៖ លោក Stoltenberg ថា ៩៩ ភាគរយទៅហើយដែល ណាតូ ជួយដល់ អ៊ុយក្រែន