ព័ត៌មានអន្ដរជាតិ

វៀតណាម ព្រមានមនុស្សចាស់ កុមារ និងកម្មករសំណង់ប្រយ័ត្នកើតជំងឺ ៣ មុខ ពេលសីតុណ្ហភាពលើស ៤០ អង្សាសេ

បានផុស

១០ ខែ មុន

នៅ

ថ្ងៃអង្គារ ៩ មេសា ២០២៤

ដោយ

អ្នកជំនាញផ្នែកសុខភាពវៀតណាមបានចេញការព្រមានអំពីហានិភ័យ ក៏ដូចជាគ្រោះថ្នាក់សុខភាពចំនួន ៣ ដូចជា វិលមុខ សន្លប់ និងដាច់សរសៃឈាមខួរក្បាល ប្រសិនបើប្រជាពលរដ្ឋទាំងឡាយណាស្ថិតនៅក្រោមសីតុណ្ហភាពលើសពី ៤០ អង្សាសេ ជាពិសេសគឺមនុស្សចាស់ កុមារ និងកម្មករសំណង់តែម្ដង ។ នេះបើតាមការចេញផ្សាតដោយសារព័ត៌មាន Vietnam News កាលពីថ្ងៃទី៨ ខែមេសាកន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមមជ្ឈមណ្ឌលជាតិសម្រាប់ការព្យាករណ៍ឧតុនិយមបានឲ្យដឹងថា ខេត្ត Son La និងខេត្ត Hoa Binh ដែលសុទ្ធសឹងតែនៅភាគខាងជើងប្រទេសវៀតណាម ក៏ដូចជាខេត្តភាគកណ្តាល រាប់ចាប់ពីខេត្ត Thanh Hoa ដល់ខេត្ត Thua Thien-Hue នឹងប៉ះសីតុណ្ហភាពចាប់ពី ៣៧ អង្សាសេឡើងទៅ ។

ចំណែកនៅតំបន់ភាគខាងត្បូង និងតំបន់ផ្សេងទៀតនៅភាគខាងជើង បច្ចុប្បន្នកំពុងមានសីតុណ្ហភាពប្រហែល ៣៥ ទៅ ៣៧ អង្សាសេ ខណៈនៅទីក្រុងហូជីមិញ ប្រជាជនភាគច្រើនសម្រុកទៅសំងំនៅហាងកាហ្វេ ផ្សារទំនើប និងមជ្ឈមណ្ឌលពាណិជ្ជកម្មនានាដើម្បីរកកន្លែងត្រជាក់ ហើយអ្នកដែលធ្វើការនៅកន្លែងវាលត្រូវការពារខ្លួនដោយមានអាវការពារ ម៉ាស និងវ៉ែនតាការពារកម្ដៅថ្ងៃជាដើម ។

យោងតាមលោក Nguyen Phuoc Huy ប្រធានស្ថានីយ៍ឧតុនិយមខេត្តបានឲ្យដឹងថា នៅខេត្ត Dong Nai សីតុណ្ហភាពធ្លាក់ចុះបន្តិច ប៉ុន្តែនៅតែក្តៅចង់ឆេះ ហើយកំពុងបង្កផលប៉ះពាល់ទៅដល់សុខភាពទាំងមនុស្សចាស់ និងកុមារ ជាពិសេសដោយសារតែអាកាសធាតុក្តៅថ្ងៃនេះហើយ ទើបលោកសម្រេចឲ្យគ្រួសារកុំចេញពីផ្ទះដាច់ខាត លើកលែងតែករណីបន្ទាន់ ប៉ុន្តែក៏ត្រូវរង់ចាំរហូតដល់មេឃត្រជាក់បន្តិចផងដែរ ទើបអាចចេញទៅក្រៅបាន” ។

លោក Phuoc Huy បានកត់សម្គាល់ទៀតថា សីតុណ្ហភាពក្ដៅបែកផ្សែង និងការខ្សោះជាតិទឹកអាចនាំឲ្យមនុស្សមួយចំនួនកើតមានជំងឺដាច់សរសៃឈាមបេះដូង និងបង្កើនហានិភ័យនៃជំងឺដូចជា ណែនទ្រូង ចង្វាក់បេះដូងលោតខុសប្រក្រតី និងជំងឺខ្សោយបេះដូងជាដើម ហើយលោកថែមទាំងណែនាំដល់ប្រជាពលរដ្ឋឲ្យចៀសវាងការប៉ះពាល់នឹងពន្លឺព្រះអាទិត្យយូរថ្ងៃ កំណត់ការហាត់ប្រាណ និងទទួលទានទឹកឲ្យបានច្រើន ជាពិសេសអ្នកមានជំងឺលើសឈាម ជំងឺធាត់ និងជំងឺសរសៃឈាមបេះដូងត្រូវតែតាមដានសុខភាពខ្លួនឯងឲ្យបានដិតដល់ ។

គួរបញ្ជាក់ថា មិនមែនតែវៀតណាមនោះទេដែលជួបសីតុណ្ហភាពក្ដៅបែកផ្សែងបែបនេះ ពោលប្រទេសជាប់ភូមិផងរបងជាមួយដូចជា កម្ពុជា និងថៃក៏ក្ដៅចង់ខ្លោចដូចគ្នា ។ ជាក់ស្ដែងនាយកដ្ឋានឧតុនិយមថៃកាលពីពេលថ្មីៗនេះបានចេញការព្រមាននឹងមានសីតុណ្ហភាព ៤៣ អង្សាសេនៅតំបន់ភាគខាងជើង ខណៈនៅទីក្រុងបាងកកវិញអាចនឹងប៉ះរលកកម្ដៅរហូតដល់ ៣៩ អង្សាសេឯណោះ ៕