ព័ត៌មានអន្ដរជាតិ
កូរ៉េខាងត្បូង និងអាមេរិក ធ្វើសមយុទ្ធរួមគ្នានៅសមុទ្រខាងកើត
កងទ័ពជើងទឹកកូរ៉េខាងត្បូង និងសហរដ្ឋអាមេរិកបានធ្វើសមយុទ្ធយោធារួមគ្នានៅសមុទ្រខាងកើតដើម្បីពង្រឹងចំណេះជំនាញរបស់ពួកគេក្នុងការទប់ស្កាត់ការគំរាមកំហែងសន្តិសុខដែនសមុទ្រ និងធានាសុវត្ថិភាពការធ្វើនាវាចរណ៍នៅក្នុងសមុទ្រ ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Yonhap នៅថ្ងៃទី៩ ខែមេសានេះ ។

មែនទែនទៅ សមយុទ្ធប្រចាំឆ្នាំដែលមានរយៈពេល ៩ ថ្ងៃបានចាប់ផ្តើមតាំងតែពីថ្ងៃទី១ ខែមេសាមកម្ល៉េះ នៅក្នុងដែនទឹកនៃទីក្រុង Pohang ចម្ងាយ ២៦២ គីឡូម៉ែត្រភាគអាគ្នេយ៍នៃទីក្រុងសេអ៊ូល ដោយមានការចូលរួមពីនាវាកងទ័ពជើងទឹកចំនួន ៩ គ្រឿង និងឧទ្ធម្ភាគចក្រចំនួន ៤ គ្រឿងមកពីប្រទេសទាំងពីរ ខណៈភាគីសហរដ្ឋអាមេរិកបានបញ្ជូននាវាបេសកកម្ម USS Miguel Keith (ESB 5) ជាលើកដំបូង អមដោយនាវាកងទ័ពជើងទឹក ២ គ្រឿងផ្សេងទៀត និងឧទ្ធម្ភាគចក្រ MH-53 ផងដែរ ។
នាវា Miguel Keith មានប្រវែង ២៤០ ម៉ែត្រត្រូវបានរចនាឡើងដើម្បីធ្វើជាមូលដ្ឋានបណ្ដែតទឹកសម្រាប់ឧទ្ធម្ភាគចក្រចុះចត និងផ្តល់ការគាំទ្រផ្សេងទៀតដល់ប្រតិបត្តិការយោធាក្នុងបេសកកម្មដែនសមុទ្រ ។ ចំណែកកូរ៉េខាងត្បូងបានបញ្ជូននាវាចំនួន ៦ គ្រឿង រួមទាំងឧបករណ៍រុករករ៉ែ Nampo MLS-II ក៏ដូចជាឧទ្ធម្ភាគចក្រល្បាតដែនសមុទ្រ P-3 និងឧទ្ធម្ភាគចក្រ UH-60 ។

យោងតាមកងទ័ពជើងទឹកកូរ៉េខាងត្បូង សមយុទ្ធនេះត្រូវបានធ្វើឡើងដើម្បីបណ្តុះបណ្តាលកងទ័ពជើងទឹកកូរ៉េខាងត្បូង និងអាមេរិកឲ្យចេះអនុវត្តយុទ្ធសាស្ត្រត្រួសត្រាយផ្លូវសម្រាប់ការធ្វើនាវាចរណ៍ប្រកបដោយសុវត្ថិភាព និងពង្រឹងសមត្ថភាពឆ្លើយតបរួមគ្នារបស់ពួកគេប្រឆាំងនឹងសេណារីយ៉ូសង្គ្រាមគ្រាប់ផ្ទុះ ។
គួរបញ្ជាក់ថា សមយុទ្ធរួមគ្នានេះក៏បានរៀបចំលំហាត់ផ្សេងៗទៀតផងដែរ ដូចជាជំនាញក្នុងការដាក់ រាវរក និងរំដោះមីន ផ្តល់ការគាំទ្រផ្នែកដឹកជញ្ជូន និងការចុះចតរបស់ឧទ្ធម្ភាគចក្រនៅលើនាវា ដើម្បីអនុវត្តសមត្ថភាពនាវិក ក៏ដូចជាការពារកំពង់ផែសំខាន់ៗ និងផ្លូវចរាចរណ៍តាមសមុទ្រ ៕

អត្ថបទ ៖ ប៊ុន សុភាព

-
សន្តិសុខសង្គម១ ថ្ងៃ ago
ភ្លៀងមួយមេធំ លាយឡំនឹងខ្យល់កន្ត្រាក់ បណ្ដាលឱ្យរលំដើមឈើសង្កត់លើរថយន្តមួយគ្រឿង
-
ព័ត៌មានអន្ដរជាតិ៧ ថ្ងៃ ago
រថយន្តដឹកសិស្សចុះកម្មសិក្សានៅថៃ ក្រឡាប់ពេលចុះភ្នំ ស្លាប់១៧នាក់ របួសជាង៤០នាក់
-
ព័ត៌មានជាតិ៧ ថ្ងៃ ago
កូនប្រុសអភិបាលខណ្ឌ៧មករា ស្លាប់ទាំងវ័យក្មេង ដោយសារគាំងបេះដូង
-
ជីវិតកម្សាន្ដ២ ថ្ងៃ ago
តារាប្រុសល្បីឈ្មោះក្នុងវិស័យថតស្ពតពាណិជ្ជកម្ម ប៉ែន ចាន់សិទ្ធ ទទួលមរណភាពដោយរាគាពាធ
-
ជីវិតកម្សាន្ដ១ ថ្ងៃ ago
Model ដែលរងសម្តីមិនសមរម្យពី MC កីឡាម្នាក់ ចេញមកតបថា ការសុំទោសនោះមិនពេញលេញ
-
សន្តិសុខសង្គម៥ ថ្ងៃ ago
Update៖ អគ្គិភ័យឆេះនៅជិតស្ពានជ្រោយចង្វារ មានទារកពីរនាក់បាត់បង់ជីវិត
-
ព័ត៌មានជាតិ១ សប្តាហ៍ ago
ឯកឧត្តម ឌី វិជ្ជា ប្រាប់ទៅលោក សម រង្ស៊ី ថា ល្មមៗបានហើយ កម្ពុជា មានច្បាប់ត្រឹមត្រូវ មិនមែនធ្វើអ្វីស្រេចលើការនឹកឃើញទេ
-
សន្តិសុខសង្គម៥ ថ្ងៃ ago
Update ៖ ដឹងមូលហេតុ ដែលអគ្គិភ័យឆាបឆេះបណ្ដាលឱ្យក្មេងប្រុសស្រី២នាក់ស្លាប់