ទាហាន មីយ៉ាន់ម៉ា ដកថយចេញព្រំដែន ថៃ ក្រោយផ្ទុះការប្រយុទ្ធគ្នាជាច្រើន​ថ្ងៃ

យោធាមីយ៉ាន់ម៉ាប្រហែល ២០០ នាក់បានជម្លៀសចេញពីស្ពានតភ្ជាប់ពីទីក្រុងព្រំដែន Myawaddy ទៅកាន់ប្រទេសថៃ ក្រោយផ្ទុះអាវុធដាក់គ្នាជាច្រើនថ្ងៃពីសំណាក់ក្រុមឧទ្ទាមប្រឆាំងរដ្ឋាភិបាលយោធា ។ ​នេះបើយោងតាមការចេញផ្សាយរបស់សារព័ត៌មាន CNA​ នៅថ្ងៃទី១១ ខែមេសានេះ ។

ការដកថយរបស់ទាហានរដ្ឋាភិបាលនៅទីក្រុង Myawaddy ដែលនៅជាប់នឹងស្រុក Mae Sot របស់ប្រទេសថៃ ក៏បង្ហាញពីការបាត់បង់ទំនុកចិត្តនៅច្រកព្រំដែនដ៏សំខាន់មួយផ្សេងទៀតផងដែរ ជាពិសេសបញ្ហាផ្លូវល្បឿនលឿនតភ្ចាប់ទៅកាន់ផ្នែកខ្លះនៃភាគកណ្តាលរបស់មីយ៉ាន់ម៉ា ស្របពេលដែលរដ្ឋាភិបាលយោធាមីយ៉ាន់ម៉ាក៏កំពុងបាក់ទ័ពនៅក្នុងតំបន់ព្រំដែន ក្រោយការប្រយុទ្ធជាមួយក្រុមឧទ្ទាមប្រដាប់អាវុធ ។

យោងតាមអ្នកនាំពាក្យនៃសហភាពជាតិ Karen (KNU) ដែលដឹកនាំការវាយលុកលើទីក្រុង Myawaddy បាននិយាយថា ទាហានយោធាប្រហែល ២០០ នាក់បានរត់ភៀសខ្លួនទៅប្រមូលផ្តុំនៅច្រកព្រំដែនចូលទៅក្នុងប្រទេសថៃ ខណៈអាជ្ញាធរថៃកំពុងពិភាក្សាជាមួយទាហាន ដើម្បីសម្រេចថាតើត្រូវផ្តល់ជម្រកដល់ពួកគេឬអត់ ។

គួរបញ្ជាក់ថា ការប្រយុទ្ធគ្នាចុងក្រោយបំផុតរវាងក្រុមឧទ្ទាមជាមួយយោធារដ្ឋាភិបាលបានធ្វើឲ្យប្រជាជនមីយ៉ាន់រាប់ពាន់នាក់ភៀសខ្លួនទៅកាន់ប្រទេសថៃ ខណៈជាធម្មតាមានមនុស្សប្រហែល ២,០០០ នាក់បានចាកចេញពីទីក្រុង Myawaddy ឆ្លងចូលស្រុក Mae Sot ប៉ុន្តែរយៈពេល ៣ ថ្ងៃចុងក្រោយនេះចំនួនអ្នកភៀសខ្លួនឡើងដល់ជិត ៤,០០០ នាក់ក្នុងមួយថ្ងៃ ៕

អត្ថបទ ៖ ប៊ុន សុភាព